အဆိုပါ သဘောတူညီချက်ကို ဇွန် ၁၉ ရက်တွင် လက်မှတ်ရေးထိုးသွားမည်ဟုဆို
အမေရိကန်နှင့် အီရန်ကြား ငြိမ်းချမ်းရေးအတွက် မူဘောင်သဘောတူညီချက်တစ်ခု ရရှိပြီဖြစ်ကြောင်း ကြေညာခဲ့ကြပြီးနောက် ရေနံစျေးများကျဆင်းခဲ့ပြီး အဆိုပါသဘောတူညီချက်ကို ဇွန် ၁၉ ရက်တွင် ဆွစ်ဇာလန်နိုင်ငံ၌ လက်မှတ်ရေးထိုးသွားမည်ဖြစ်ကြောင်း ဘီဘီစီသတင်းတွင် ဖော်ပြခဲ့သည်။
သဘောတူညီချက်ကို လက်မှတ်ရေးထိုးပြီးသည်နှင့်တစ်ပြိုင်နက်တည်း ရေနံများ ပြန်လည်စီးဆင်းလိမ့်မည်ဟု အမေရိကန်သမ္မတဒေါ်နယ်ထရန့်က ပြောကြားခဲ့ပြီး သဘောတူညီချက် ကြေညာခဲ့ပြီးနောက်ပိုင်းတွင် ကမ္ဘာ့ရေနံဈေးနှုန်းများ ကျဆင်းသွားခဲ့သည်။
ဇွန် ၁၅ ရက်တွင် အမေရိကန်၏ WTI ရေနံစိမ်းဈေးနှုန်းသည် ၅ ရာခိုင်နှုန်း ကျဆင်းခဲ့ပြီး မတ်လနောက်ပိုင်း ပထမဆုံးအကြိမ်အဖြစ် ရေနံတစ်စည်လျှင် ဒေါ်လာ ၈၀ သို့ ပြန်လည်ရောက်ရှိခဲ့သည်။
ထို့အတူ Brent ရေနံစိမ်းဈေးနှုန်းသည်လည်း ၄ ရာခိုင်နှုန်းကျော် ကျဆင်းသွားခဲ့ပြီး ရေနံတစ်စည်လျှင် ဒေါ်လာ ၈၃ ဒသမ ၆၀ ဝန်းကျင်တွင် ရှိနေသည်။
ထရန့်က သူသည် ဟော်မုဇ်ရေလက်ကြားကို အခမဲ့ဖြတ်သန်းခွင့်နှင့်အတူ အပြည့်အဝ ဖွင့်ပေးရန် အခွင့်အာဏာ အပ်နှင်းလိုက်ပြီး တစ်ချိန်တည်းမှာပင် အမေရိကန်ရေတပ်၏ ပိတ်ဆို့ထားမှုကို ချက်ချင်းဖယ်ရှားပစ်ရန်လည်း အခွင့်အာဏာ အပ်နှင်းလိုက်ကြောင်း လူမှုမီဒီယာတွင် ရေးသားခဲ့သည်။
အီရန်နိုင်ငံခြားရေးဒုဝန်ကြီးကလည်း သဘောတူညီချက် အပြီးသတ်နိုင်ခဲ့ပြီဖြစ်ကြောင်း နိုင်ငံပိုင်ရုပ်သံလိုင်းမှတစ်ဆင့် အတည်ပြုပြောကြားခဲ့ပြီး၊ အီရန်၏ စစ်ဘက်ဆိုင်ရာ ကွပ်ကဲရေးအဖွဲ့ကမူ ယင်းသဘောတူညီချက်ကို အီရန်အတွက် အောင်ပွဲတစ်ခုအဖြစ် ပုံဖော်ပြောဆိုခဲ့သည်။
ပါကစ္စတန်ဝန်ကြီးချုပ်သည် အဆိုပါသဘောတူညီချက်ကို ပထမဆုံး စတင်ကြေညာခဲ့ခြင်းဖြစ်ပြီး ယင်းသဘောတူညီချက်ကြောင့် လက်ဘနွန်အပါအဝင် စစ်ဆင်ရေးများအားလုံး အဆုံးသတ်သွားမည်ဖြစ်ကြောင်း ပြောကြားခဲ့သည်။
