​မေ ၂၅ ရက်တွင် အီရန်တောင်ပိုင်းရှိ ဒုံးကျည်စခန်းများနှင့် ရေမြှုပ်မိုင်းထောင်ရန် ကြိုးပမ်းနေသည့် ရေယာဉ်များကို တိုက်ခိုက်ခဲ့ကြောင်း အမေရိကန်ဗဟိုစစ်ဌာနချုပ်က ထုတ်ပြန်​ကြေညာခဲ့သည်။ ယခုတိုက်ခိုက်မှုကြောင့် အပစ်အခတ်ရပ်စဲရေး မရေမရာဖြစ်နေမှုကို ပိုဆိုးသွားစေခဲ့သည်။

ဗဟိုစစ်ဌာနချုပ် ပြောရေးဆိုခွင့်ရှိသူ တင်ဟော့ကင်းစ်၏အဆိုအရ အရှေ့အလယ်ပိုင်းပဋိပက္ခကို အဆုံးသတ်ရေး ဆွေးနွေးရန် အီရန်ထိပ်တန်းအရာရှိများ ကာတာနိုင်ငံ၊ ဒိုဟာမြို့သို့ ရောက်နေချိန် အဆိုပါတိုက်ခိုက်မှုများ ပြုလုပ်ခဲ့ခြင်းဖြစ်သည်။ ၎င်းထုတ်ပြန်ချက်တွင် တိုက်ခိုက်မှုအသေးစိတ်ကို မ​ဖော်ပြခဲ့ဘဲ အီရန် ဒုံးကျည်ပစ်လွှတ်ရေးစခန်းများနှင့် ရေ​အောက်မိုင်းထောင်မည့် ​ရေယာဉ်များကို ပစ်မှတ်ထားတိုက်ခိုက်ခဲ့သည်ဟုသာ ​အသိပေးခဲ့သည်။

ယခုလုပ်ရပ်သည် ဧပြီလ ၈ ရက်က စတင်ခဲ့သည့် အပစ်အခတ်ရပ်စဲရေးကို ခြိမ်းခြောက်လျက်ရှိပြီး မေ ၂၆ ရက်နံနက်ပိုင်းတွင် ကမ္ဘာ့ရေနံစျေးနှုန်းများ တစ်စည်လျှင် ဒေါ်လာ ၁၀၀ အောက် ဆက်လက်ရှိနေခဲ့သည်။

အစ္စရေးဝန်ကြီးချုပ် ဘန်ဂျမင်နေတန်ယာဟုက လက်ဘနွန်ရှိ ဟစ်ဇ်ဘိုလာအဖွဲ့ကို အမြစ်ပြတ်ချေမှုန်းမည်ဟု ကြုံးဝါးထားသည့်အတွက် ငြိမ်းချမ်းရေးသဘောတူညီချက်ရရန် မျှော်လင့်ချက်မှာ ထပ်မံမှေးမှိန်ခဲ့ရသည်။ မည်သည့်ငြိမ်းချမ်းရေး သဘောတူညီချက်မဆို လက်ဘနွန်ရှိ တိုက်ပွဲများနှင့်လည်း သက်ဆိုင်ရမည်ဟု အီရန်ဘက်က တောင်းဆိုထားခြင်း​ကြောင့်ဖြစ်သည်။

ထရန့်က ၎င်း၏လူမှုကွန်ရက်စာမျက်နှာတွင် အီရန်အနေဖြင့် ၎င်းတို့၏ သန့်စင်ပြီးယူရေနီယံများကို ဖျက်ဆီးပစ်ရန် အမေရိကန်ထံ လွှဲပြောင်းပေးအပ်ရမည်ဖြစ်ကြောင်း၊ ထိုသို့မဟုတ်ပါက နိုင်ငံတကာ အသိသက်သေများရှေ့တွင် ယူရေနီယံများကို အီရန်အတွင်း၌ပင် ဖျက်ဆီးပစ်ရမည်ဖြစ်ကြောင်း ရေးသားထားသည်။

အီရန်နှင့် ငြိမ်းချမ်းရေးသဘောတူညီချက် တစ်စိတ်တစ်ပိုင်းအနေဖြင့် ဆော်ဒီအာရေဗျ၊ ယူအေအီး ၊ ကာတာ၊ ပါကစ္စတန်၊ အီဂျစ်၊ တူရကီ၊ ဘာရိန်းနှင့် ဂျော်ဒန်နိုင်ငံတို့က အေဘရာဟမ်သဘောတူညီချက်တွင် မဖြစ်မနေ ပါဝင်လက်မှတ်ရေးထိုးရမည်ဟုလည်း ထရန့်က တိုက်တွန်းနေပြန်သည်။

အစ္စရေးကို ရန်လိုမုန်းတီးခဲ့ကြသည့် နိုင်ငံများနှင့် ၂၀၂၀ ခုနှစ်တွင် စေ့စပ်ပေးခဲ့သည့် သဘောတူညီချက်ဖြစ်ပြီး မော်ရိုကို၊ ဆူဒန်၊ ဘာရိန်းနှင့် ယူအေအီးတို့က အဆိုပါသဘောတူညီချက်တွင် လက်မှတ်ရေးထိုးထားပြီး ဖြစ်သည်။အေဘရာဟမ်သဘောတူညီချက်သည် အစ္စရေး-ပါလက်စတိုင်း ပဋိပက္ခကို ဖြေရှင်းနိုင်ခြင်း မရှိသည့်အတွက် အရှေ့အလယ်ပိုင်းတွင် ယခုထိ လူထောက်ခံမှု နည်းနေဆဲဖြစ်သည်။

ဆော်ဒီအာရေဗျနှင့် ကာတာကဲ့သို့ ပင်လယ်ကွေ့ဒေသတွင်း ဩဇာကြီးမားသည့် နိုင်ငံများကမူ လွတ်လပ်သည့်ပါလက်စတိုင်းနိုင်ငံ မထူထောင်နိုင်သရွေ့ အစ္စရေးနှင့် ပြန်လည်ဆက်ဆံမည်မဟုတ်ဟု ပြောကြားထားသည်။

Ref: AFP,Photo: AL-MONITOR