ရုပ်သံကို ရိုက်ကူးခဲ့သည့် အမျိုးသမီးမှာ ခြိမ်းခြောက်ခံရခြင်းများရှိလာဟုဆို
ကိုရင်လေးကို ရိုက်နှက်သည့် ဘုန်းကြီးဟုဆိုကာ လူမှုကွန်ရက်စာမျက်နှာများတွင် မှားယွင်းဖော်ပြခံရပြီးနောက် ဦးဇင်းတစ်ပါးလူထွက်ခဲ့ရပြီး ရုပ်သံကို ရိုက်ကူးခဲ့သည့် အမျိုးသမီးမှာ ခြိမ်းခြောက်ခံရခြင်းများရှိလာကြောင်း ယင်းဖြစ်စဉ်ကို လိုက်ပါဆောင်ရွက်နေသည့် ဆရာတော် ဦးသုနန္ဒက မိန့်ကြားသည်။
“တချို့ မီဒီယာတွေနဲ့ အွန်လိုင်းပေ့ချ်တွေမှာ ဒီဦးဇင်းက ကျူးလွန်တာပါဆိုပြီး ဓာတ်ပုံကြီးပျံ့သွားတာ။ အမှန်က ကျူးလွန်တဲ့ အဲဒီဦးဇင်းမဟုတ်ဘူး။ အခုဘယ်လိုဖြစ်သွားလဲဆိုတော့ စွပ်စွဲခံရတဲ့ ဦးဇင်းက ငယ်လည်းငယ်တော့ ကြောက်လန့် ငိုယိုပြီး လူထွက်သွားတယ်။ သာသနာအတွက် နှမြောတယ်။ ပညာတတ်ဦးဇင်းတစ်ပါး။ ဓမ္မာစရိယဘွဲ့လည်း ရထားသလို BA ဘွဲ့လည်း ရထားတယ်” ဟု ဆရာတော် ဦးသုနန္ဒက မိန့်ကြားသည်။
ကိုရင်လေးကို ရိုက်နှက်ခဲ့သူမှာ မြိတ်မြို့ ကျောက်ဖြူတောင် ပဋိပတ္တိတောရကျောင်းမှ ဦးတေဇဆိုသူ ဘုန်းကြီးဖြစ်ပြီး ကိုရင်လေးကို ရိုက်နှက်နေသည့် ရုပ်သံများ လူမှုကွန်ရက်တွင် ပျံ့နှံ့လာပြီးနောက် သက်ဆိုင်ရာက ဖမ်းဆီးထိန်းသိမ်းခဲ့ကြောင်း သိရသည်။
လက်ရှိတွင် ကျူးလွန်ခဲ့သည့် ဘုန်းကြီးကို လူဝတ်လဲလိုက်ပြီး လူအမည်မှာ ဦးထွန်းလှိုင်(၄၁ နှစ်) ဖြစ်ကြောင်း၊ မြိတ်မြို့မရဲစခန်းတွင် အမှုရင်ဆိုင်နေရပြီဖြစ်ကြောင်း သိရသည်။
ထို့ပြင် ကိုရင်လေးကို ရိုက်နှက်နေသည့် ရုပ်သံကို ရိုက်ကူးခဲ့သည့် အမျိုးသမီးမှာလည်း ခြိမ်းခြောက်မှုများ ရင်ဆိုင်နေရသဖြင့် ရှောင်တိမ်းနေရသည်ဟု ဆရာတော်က ဆက်လက်မိန့်ကြားသည်။
“ရိုက်ခဲ့တဲ့သူကလည်း မြိတ်မြို့ကပဲ။ သူက သူ့သားလေးကို အဲဒီကျောင်းမှာ ကိုရင်ဝတ်ပေးရင်းနဲ့ သူပါ ဝေယျဝစ္စလုပ်ပေးရင်းနေတာ။ ကိုရင်ကို ရိုက်တော့ အဲ့ဒီလောက်ကြီးတော့ မလုပ်သင့်ပါဘူးဆိုပြီး ဘုန်းကြီးကိုပြောတော့ သူနဲ့ အဆင်မပြေဖြစ်လို့ သူ့သားကိုရင်ပါခေါ်ပြီး ကျောင်းမှာ မနေတော့တာ။ အခုသူလည်းတရားစွဲခံရမယ်ဘာညာနဲ့ ခြိမ်းခြောက်မှုတွေရှိလို့ ရှောင်နေရတယ်” ဟု ဆရာတော်က မိန့်ကြားသည်။
လက်ရှိတွင် ရိုက်နှက်ခံရသည့် ကိုရင်လေးမှာ ကျန်းမာရေးကောင်းမွန်နေပြီး မိဘနှစ်ပါးမှာ ပင်လယ်တွင် အလုပ်လုပ်ကိုင်နေသူများဖြစ်သဖြင့် ဖြစ်စဉ်ကို မသိရှိသေးကြောင်း သိရသည်။
“ကိုရင်က မိဘနှစ်ယောက်လုံးရှိတယ်။ မြိတ်မှာကျတော့ နှစ်ယောက်စလုံးက ပင်လယ်ထွက် အလုပ်လုပ်နေရတာ။ ဖုန်းလိုင်းကလည်း မမိ၊ အင်တာနက်လိုင်းကလည်း မမိဆိုတော့ ဒီဖြစ်စဉ်ကို သိဦးမှာ မဟုတ်သေးဘူး” ဟု ဆရာတော်က မိန့်ကြားသည်။
ကျူးလွန်ခဲ့သည့် ဘုန်းကြီးကို လူဝတ်လဲကာ ရာဇသတ်ကြီးပုဒ်မ၂၉၅-(က) ဖြင့် အရေးယူထားကြောင်း သိရသည်။
ရာဇသတ်ကြီး ပုဒ်မ၂၉၅-(က)မှာ လူတစ်စားကိုးကွယ်သည့် ဘာသာ သာသနာကိုဖြစ်စေ ဘာသာရေးယုံကြည်မှုကိုဖြစ်စေစော်ကားခြင်းဖြင့် ထိုလူတစ်စား၏ ကိုးကွယ်ရာ ဘာသာရေးစိတ်ဓာတ်ကို နာကျဉ်းစေရန်ကြံရွယ်၍ မသမာစိတ်ဖြင့် တမင်ကျူးလွန်သော ပြုလုပ်မှုဖြစ်ပြီး ယင်းအမှုကို ကျူးလွန်ပါက အာမခံမပေးနိုင် ကျေအေးခွင့်မရှိဘဲ ထောင်ဒဏ် နှစ်နှစ်အထိ ထောင်ဒဏ်တစ်မျိုးမျိုးကိုဖြစ်စေ၊ ငွေဒဏ်ကိုဖြစ်စေ၊ ဒဏ်နှစ်ရပ်လုံးကို ဖြစ်စေ ချမှတ်နိုင်ကြောင်းပြဌာန်းထားသည်။
ပုံစာ- ကိုရင်လေးကို ရိုက်နှက်ခဲ့သည့် ဘုန်းကြီးကို တွေ့ရစဉ်။
