မန္တလေးတိုင်းဒေသကြီး၊ ပျော်ဘွယ်မြို့နယ်တွင် စက်သုံးဆီ အရောင်းဆိုင်နှင့် ကွမ်းပစ္စည်းရောင်းဝယ်ရေးဝန်း အတွင်းရှိ စက်သုံးဆီသိုလှောင်ရုံအတွင်း မီးလောင်မှု ၂၀၂၆ ခုနှစ် မတ်လ ၂၆ ရက်နေ့ နံနက် ၈ နာရီ ၃၀ မိနစ် အချိန် ဝန်းကျင်က ဖြစ်ပွားခဲ့သည်။
ပျော်ဘွယ်မြို့နယ်၊ ရမည်းသင်းခရိုင်၊ ကန်သာကျေးရွာအုပ်စု၊ ဆွဲမှန်ကျေးရွာတွင် AC / DC DOCANDO အမျိုးအစား (၁) လုံးပန့် စက်သုံးဆီ အရောင်းဆိုင်နှင့် ကွမ်းပစ္စည်းရောင်းဝယ်ရေးဝန်းအတွင်းရှိ ၁၅ ပေ x ၂၀ ပေ၊ သွပ်မိုး၊ သွပ်ကာ တစ်ထပ် စက်သုံးဆီသိုလှောင်ရုံအတွင်း အလင်းရောင်ရရှိရန် သွယ်တန်းထားသော နှစ်ပင်လိမ်ဝါယာကြိုးအပူလွန်ကဲရာမှတစ်ဆင့် မီးလောင်မှုဖြစ်ပွားခဲ့ကြောင်း မြန်မာနိုင်ငံမီးသတ်ဌာနမှ သတင်းရရှိပါသည်။
မီးလောင်ရာသို့ ပျော်ဘွယ်မြို့နယ်မီးသတ်စခန်းမှ မီးငြိမ်းသတ်ယာဉ် ၃ စီး၊ မီးသတ်ရေသယ်ယာဉ် ၂ စီး၊ ပြည်သာယာနယ်မြေမီးသတ်စခန်းမှ မီးငြှိမ်းသတ်ယာဉ် ၁ စီး၊ မီးသတ်ရေသယ်ယာဉ် ၁ စီး၊ ရမည်းသင်းခရိုင်မီးသတ်စခန်းမှ မီးငြှိမ်းသတ်ယာဉ် ၁ စီး၊ မီးသတ်ရေသယ်ယာဉ် ၂ စီး၊ အုပ်ချုပ်မှု ယာဉ် ၂ စီး၊ စုစုပေါင်း ၁၂ စီးတို့ဖြင့် သန္ဓေတပ်ဖွဲ့ဝင် ၄၀ ဦး၊ အရန်မီးသတ်တပ်ဖွဲ့ဝင် ၂ဝ ဦးဖြင့် ထွက်ခွာပြီး ငြိမ်းသတ်ခဲ့ရာ နံနက် ၉ နာရီ ၈ မိနစ်အချိန်ခန့်တွင် မီးထိန်းနိုင်ခဲ့ပြီး၊ နံနက် ၉ နာရီ ၁၇ မိနစ် အချိန်ခန့်တွင် မီးငြိမ်းခဲ့ကြောင်း ဆက်လက် သိရှိရပါသည်။
မီးလောင်မှုအား မီးသတ်ဆေးဘူး 3 Kg ၅ ဘူး၊ အမြှပ်မီးသတ်ဆေးရည် (FOAM) (၁၂၀)ဂါလန်၊ ရေဂါလန် (၁၂၀၀၀) ခန့်ဖြင့် မီးငြိမ်းသတ်ခဲ့ကြောင်း၊မီးလောင်မှုကြောင့် ၁၅ ပေ x ၂၀ ပေ သွပ်မိုး၊ သွပ်ကာ တစ်ထပ် စက်သုံးဆီသိုလှောင်ရုံ အဆောက်အဦ တစ်လုံး၊ ၃၀ ပေ x ၄၀ ပေ နံကပ်နှစ် ထပ်၊ လူနေအိမ်၏ပြတင်းတံခါး (၄) ချပ် ၊ CANTA (၁၀) ပေ နောက်တွဲကားဘော်ဒီ (ဟောင်း) တစ်ခု ၊ 92 အောက်တိန်းဆီ (ပလတ်စတစ်ပုံး ၄ ပုံး) (၂၀) ဂါလန်၊ ဒီဇယ်ဆီ (ပလတ်စတစ်ပုံး ၃ ပုံး) (၁၅) ဂါလန်တို့ မီးလောင်ဆုံးရှုံးခဲ့သည်။
မီးလောင်မှုဖြစ်ပွားမှုနှင့်ပတ်သက်ပြီး တာဝန်ရှိသူ အမျိုးသားအား ပျော်ဘွယ်မြို့၊ မြို့မရဲတပ်ဖွဲ့စခန်းမှပ - ၄၉ / ၂၀၂၆ ၊ ပုဒ်မ ( ၂၈၅ ) ဖြင့် အမှုဖွင့်အရေးယူဆောင်ရွက်ထားကြောင်း သိရသည်။
ဓာတ်ပုံ-မြန်မာနိုင်ငံမီးသတ်တပ်ဖွဲ့
