မြန်မာနိုင်ငံသို့ ချစ်ကြည်ရေးခရီးလာရောက်လည်ပတ် သည့် ရုရှားရေတပ်မှ စစ်ရေယာဉ် ၃ စင်းသည် ယနေ့(မတ် ၁၀ ရက်)ညနေပိုင်းတွင် ရန်ကုန်မြို့၊ သီလဝါ ဆိပ်ကမ်း MITT တံတားမှ ပြန်လည်ထွက်ခွာသွားကြောင်း သိရသည်။
ထိုသို့ ပြန်လည်ထွက်ခွာသည့် ရုရှားစစ်ရေယာဉ်သုံးစင်းအား တပ်မတော်(ရေ)မှအရာရှိကြီးများနှင့် အရာရှိ၊ စစ်သည်များ၊ မြန်မာနိုင်ငံဆိုင်ရာရုရှားစစ်သံမှူးနှင့် တာဝန်ရှိသူများက ဆိပ်ကမ်းတွင် ပို့ဆောင်နှုတ်ဆက်ခဲ့ကြောင်း သိရသည်။
အဆိုပါစစ်ရေယာဉ်များတွင် အဖွဲ့ခေါင်းဆောင်ဖြစ်သူ Captain 1st Rank Andrei Gaevoi ဦးစီး၍ အရာရှိ၊ စစ်သည်စုစုပေါင်း ၃၅၀ ဦးတို့လိုက်ပါလာပြီး မြန်မာနိုင်ငံတွင် မတ် ၅ ရက်နေ့မှ မတ် ၁၀ ရက်အထိ ခရီးစဉ်အတွင်း ရန်ကုန်မြို့ရှိ အထင်ကရနေရာများသို့ လေ့လာ လည်ပတ်ခြင်း၊ တပ်မတော်(ရေ)မှအရာရှိ၊ စစ်သည်များနှင့် ရုရှားရေတပ်မှအရာရှိ၊ စစ်သည် များအကြား ချစ်ကြည်ရေးဘောလုံးပြိုင်ပွဲ၊ ဘော်လီဘောပြိုင်ပွဲ၊ လွန်ဆွဲပြိုင်ပွဲနှင့် ဘတ်စကက်ဘောပြိုင်ပွဲများ ယှဉ်ပြိုင်ကစားခြင်း၊ စစ်ရေယာဉ်များပေါ်သို့ အပြန်အလှန် လေ့လာခြင်းများ ဆောင်ရွက်ခဲ့ကြကြောင်း သိရသည်။
