မန္တလေးမြို့၌ လူမှုကွန်ရက်စာမျက်နှာတွင် တရားမဝင်သုံးလုံးထီဂဏန်းအား ပေါက်မဲအဖြစ် သတ်မှတ်၍ မော်တော်ယာဉ်အား ပြသကာ ကံစမ်းမဲလက်မှတ်များ တရားမဝင်ရောင်းချနေသူ အမျိုးသားတစ်ဦးကို ဖမ်းဆီးအရေးယူထားကြောင်း သိရသည်။
ဖြစ်စဉ်မှာ ဒီဇင်ဘာ ၈ ရက် နံနက် ၉ နာရီ ၁၅ မိနစ်ခန့်တွင် လူမှုကွန်ရက်စာမျက်နှာ ရွှေဘုန်း Automobile Channel 2 အမည်ဖြင့် ဖွင့်လှစ်ထားသော Facebook Page ၌ ဒီဇင်ဘာ ၁၆ ရက်တွင် ဖွင့်လှစ်မည့် သုံးလုံးထီဂဏန်းကို ပေါက်မဲအဖြစ် သတ်မှတ်၍ ယာဉ်နံပါတ် 1S--- ပါ FORD DOUBLE CAB အနက်ရောင်မော်တော်ယာဉ်အား ကံစမ်းမဲလက်မှတ် တစ်စောင်လျှင် ၃၇၅၀၀၀ ကျပ်နှုန်းဖြင့်လည်းကောင်း၊ ယာဉ်နံပါတ် 5I---- ပါ TOYOTA WISH အဖြူရောင် မော်တော်ယာဉ်အား ကံစမ်းမဲလက်မှတ် တစ်စောင်လျှင် ၂၁၅၀၀၀ ကျပ်နှုန်းဖြင့် လည်းကောင်း ကံစမ်းနိုင်ကြောင်း အမျိုးသားတစ်ဦးမှ Live လွှင့်ပြီး ကြော်ငြာ၍ ကံစမ်းမဲလက်မှတ်များကို KBZ Pay ဖြင့် ငွေလွှဲပေးပို့ဝယ်ယူ ကံစမ်းနိုင်ကြောင်း ဖော်ပြထားသည်ကို တွေ့ရှိရသဖြင့် အမှတ်(၁၁)မှုခင်းရဲတပ်ဖွဲ့စုမှ တပ်ဖွဲ့ဝင်များ ပါဝင်သော ပူးပေါင်းအဖွဲ့က စုံစမ်းရှာဖွေခဲ့ကြောင်း သိရသည်။
ထိုသို့စုံစမ်းရာ မန္တလေးတိုင်းဒေသကြီး၊ ချမ်းမြသာစည်မြို့နယ်၊ ၂၇ လမ်းနှင့် ၆၆ လမ်းထောင့်တွင် ရွှေဘုန်း Automobile Channel 2 Facebook Page ပိုင်ရှင်ဖြစ်သူ ချမ်းအေးသာစံမြို့နယ်၊ စိတ္တရမဟီရပ်ကွက်၊ သီရိမင်္ဂလာအိမ်ရာ၊ တိုက်(E)၊ အခန်း(၈)နေ နေမျိုးထက် (၃၆)နှစ်အား MDY-2/1S---- FORD RANGER အနက်ရောင် မော်တော်ယာဉ် တစ်စီးနှင့်အတူ တွေ့ရှိရသဖြင့် စစ်ဆေးခဲ့ကြောင်း သိရသည်။
စစ်ဆေးရာ အဆိုပါမော်တော်ယာဉ်မှာ ရွှေဘုန်း Automobile Channel 2 Facebook Page ၌ ကြော်ငြာထားသည့် တရားမဝင် ကံစမ်းမဲဖွင့်လှစ်ရာတွင် လောင်းကစားပစ္စည်းအဖြစ် အသုံးပြုမည့် မော်တော်ယာဉ်ဖြစ်ကြောင်း သိရှိရ၍ ၎င်းနေထိုင်သည့် တိုက်ခန်းသို့ သွားရောက်စစ်ဆေးခဲ့ရာ အောက်ထပ်ကားပါကင်မှ တရားမဝင် ကံစမ်းမဲဖွင့်လှစ်ရာတွင် အသုံးပြုရန် ကြော်ငြာထားသည့် SHN-38/5I---- TOYOTA WISH အဖြူရောင် မော်တော်ယာဉ် တစ်စီး၊ တိုက်ခန်းအတွင်းမှ Laptop တစ်လုံးနှင့် သုံးလုံးဂဏန်းများ ရေးမှတ်ထားသည့် စာအုပ် ငါးအုပ်တို့အား ထပ်မံသိမ်းဆည်း ရမိခဲ့ကြောင်း သိရသည်။
အဆိုပါဖြစ်စဉ်နှင့်ပတ်သက်၍ ဖမ်းဆီးရမိသူ နေမျိုးထက်အား ချမ်းမြသာစည်မြို့နယ်၊ အမှတ်(၃)နယ်မြေရဲစခန်း (ပ)၂၀၃/၂၀၂၅၊ လောင်းကစားဥပဒေပုဒ်မ ၁၈(က) ဖြင့် အမှုဖွင့်အရေးယူထားကြောင်း မြန်မာနိုင်ငံရဲတပ်ဖွဲ့မှ သိရသည်။
