ပြည်ခိုင်ဖြိုးပါတီမှ ဝင်ရောက်ယှဉ်ပြိုင်မည့် ဒုတိယဗိုလ်ချုပ်ကြီး(ငြိမ်း) တေဇကျော်နှင့် မန္တလေးတိုင်းဝန်ကြီးချုပ် ဦးမျိုးအောင်တို့သည် ၎င်းတို့၏ မဲဆန္ဒနယ်ဖြစ်သည့် အောင်မြေသာစံမြို့နယ်၊ အိုးဘိုရပ်တွင် မဲဆွယ်စည်းရုံးရေး များကို ယနေ့(နိုဝင်ဘာ ၉ ရက်)တွင် ပြုလုပ်ခဲ့သည်။
ဒုတိယဗိုလ်ချုပ်ကြီးအဖြစ်တာဝန်ထမ်းဆောင်ခဲ့သည့် ဦးတေဇကျော်သည် ပြည်သူ့လွှတ်တော်ကိုယ်စားလှယ် လောင်းအဖြစ်လည်းကောင်း၊ မန္တလေးတိုင်းဒေသကြီးဝန်ကြီးချုပ်ဖြစ်သည့် ဦးမျိုးအောင်သည် တိုင်းဒေသကြီးလွှတ်တော်ကိုယ်စားလှယ်လောင်းအဖြစ်လည်းကောင်း၊ အမျိုးသားလွှတ်တော် ကိုယ်စားလှယ်လောင်းအဖြစ် ဦးခင်မောင်မြင့်ကလည်းကောင်း၊ တိုင်းဒေသကြီးကိုယ်စားလှယ်လောင်းအဖြစ် ဦးမျိုးမြင့်ကလည်းကောင်း အောင်မြေသာစံမြို့နယ်ကိုယ်စားပြုပြီး ဝင်ရောက်ယှဉ်ပြိုင်ကြမည် ဖြစ်သည်။
အောင်မြေသာစံမြို့နယ် ကိုယ်စားပြုဝင်ရောက်ယှဉ်ပြိုင်သွားမည့် ကိုယ်စားလောင်းများသည် အိုးဘိုရပ်ကွက်တွင် မဲဆွယ်စည်းရုံးရေးခရီးစတင်ခဲ့ခြင်းဖြစ်ပြီး ပါတီဝင်များ၊ ဒေသခံများနှင့် တွေ့ဆုံခဲ့ကြခြင်းဖြစ်သည်။
အဆိုပါလူထုတွေ့ဆုံပွဲတွင် ပြည်ခိုင်ဖြိုးပါတီ၏ သဘောထားရပ်တည်ချက်များ၊ ရွေးကောက်ပွဲကြေညာစာတမ်း အပါအဝင် လူထုအားဆောင်ရွက်ပေးမည့် ကတိကဝတ်များနှင့်ပတ်သက်ပြီးလည်း ကိုယ်စားလှယ်လောင်း အသီးသီးက မဲဆွယ်ပြောကြားခဲ့သည်။
" ရွေးကောက်ပွဲပြီးရင်ရော အခုလို အတူတွေ့ဆုံပြီး အခက်ခဲတွေ တင်ပြခွင့်ရမှာလားဆိုတဲ့ မေးခွန်းကို ဖြေချင်ပါတယ်။ကတိပေးတယ်ခင်ဗျ။ အောင်မြေသာစံမှာသာ ကျွန်တော်နဲ့ကျွန်တော့်အဖွဲ့ကို ရွေးချယ်ပါ။ ကျွန်တော်ပြန်ဆင်းလာပါမယ်။ ခဏခဏလည်း ကျွန်တော်ဆင်းပါတယ်။ ဒါပေမယ့် တစ်တိုင်းလုံး သွားနေရတော့ အချိန်ကန့်သတ်ချက်ရှိတာပေါ့။တင်ပြလာတဲ့အခက်အခဲတွေမှာ ဖြစ်နိုင်တဲ့ကိစ္စတွေ အကုန်ဆောင်ရွက်ပေးပါ့မယ်။ ရွေးကောက်ခံနီးကတိတွေပေးသွားတယ်။ပြီးရင်ပျောက်သွားတယ်။ နောက်တစ်ခါရွေးကောက်ပွဲကျမှ ပေါ်လာတယ်။ အဲလိုမဖြစ်စေရဘူး။ ကျွန်တော်ရင်ဘတ်ထဲက စကားပါ။မန္တလေးကိုချစ်တယ်။ မန္တလေးအတွက်ဆို ဘာပဲလုပ်ပေးရ လုပ်ပေးရပါ။ကျွန်တော်ကတိက ဝတ်တွေအများကြီးမပေးချင်ပါဘူး။ အလုပ်နဲ့သက်သေပြချင်ပါတယ်" ဟု တိုင်းဒေသကြီးကိုယ်စားလှယ်လောင်း အဖြစ်ဝင်ရောက်ယှဉ်ပြိုင်မည့် မန္တလေးတိုင်းဝန်ကြီးချုပ် ဦးမျိုးအောင်က ပြောကြားသည်။
ဦးမျိုးအောင်သည် လက်ရှိ မန္တလေးတိုင်းဒေသကြီးဝန်ကြီးချုပ်အဖြစ် တာဝန်ထမ်းဆောင်နေသလို ဝန်ကြီးချုပ်မဖြစ်ခင် တိုင်းဒေသကြီးအစိုးရအဖွဲ့၏ ဝန်ကြီးဌာနသုံးခုတွင် ဝန်ကြီးအဖြစ်လည်းကောင်း၊ ယခင်အစိုးရလက်ထက်များက မန္တလေးမြို့တော်စည်ပင်သာယာရေးကော်မတီ၏ လမ်းတံတားဌာနမှူး၊ အဆောက်အအုံကုန်ရုံဌာနမှုးများအဖြစ်လည်းကောင်း အဆင့်ဆင့်တာဝန်ထမ်းဆောင်ခဲ့သူဖြစ်သည်။
