ဒီရာသီ ပရီးမီးယားလိဂ်ပွဲစဉ် (၇)အပြီး အဝါကတ်အပြခံရဆုံးအသင်းစာရင်းမှာ ချယ်လ်ဆီးက ထိပ်ဆုံးမှာ ရပ်တည်နေတယ်။ အောက်တိုဘာ (၆)ရက်(တနင်္ဂနွေနေ့)က ကစားခဲ့တဲ့ နော်တင်ဟမ်ဖောရက်စ်နဲ့ပွဲအပြီး ချယ်လ်ဆီးအသင်းမှာ စည်းကမ်းပိုင်းဆိုင်ရာ ပြဿနာရှိနေလားဆိုတဲ့ မေးခွန်းတွေ ကျယ်ကျယ်လောင်လောင် ထွက်ပေါ်လာတာပါ။ စတန်းဖို့ဒ်ဘရစ်ကွင်းမှာ ကစားခဲ့တဲ့ နော်တင်ဟမ်ဖောရက်စ်နဲ့ တစ်ဖက် (၁)ဂိုးစီ သရေကျတဲ့ပွဲမှာ အဝါကတ် (၆)ကတ်အထိ အပြခံခဲ့ရတဲ့ ချယ်လ်ဆီးအသင်းဟာ အလိုအလျောက် ဒဏ်ငွေ ပေါင် (၅၀၀၀၀) ဆောင်ခဲ့ရတယ်။