အမေရိကန်က ဒုံးကျည်များကို ဂျာမနီ သို့မဟုတ် ဥရောပရှိ အခြားတစ်နေရာရာတွင် ချထားရန် ရည်ရွယ်ချက်ကို အတည်ပြုမည်ဆိုပါက တာလတ်ပစ် နျူကလီးယားလက်နက်များ ထုတ်လုပ်မှုကို ပြန်လည်စတင်မည်ဟု ဇူလိုင် ၂၈ ရက်တွင် ရုရှားသမ္မတဗလာ ဒီမာပူတင်က ခြိမ်းခြောက်ခဲ့သည်။

“အဲဒီအစီအမံတွေကို အမေရိကန်ပြည်ထောင်စုက လုပ်ဆောင်မယ်ဆိုရင် ကျွန်တော်တို့ဟာ တာလတ်ပစ်နဲ့ တာတိုပစ် နျူကလီးယားလက်နက် တိုက်ခိုက်မှုစွမ်းရည်တွေ ဖြန့်ကြက်တာနဲ့ပတ်သက်လို့ အရင်တုန်းက ကျင့် သုံးခဲ့တဲ့ တစ်ဖက်သတ် ဆိုင်းငံ့ထားတာကို စွန့်ပစ်ဖို့ စဉ်းစားသုံးသပ်သွားမှာဖြစ်ပါတယ်” ဟု စိန့်ပီတာစဘတ်မြို့တွင် ပြုလုပ်သည့် ရေတပ်စစ်ရေးပြအခမ်းအနားတွင် ပူတင်က ပြောကြားခဲ့သည်။

ယခုအခါ ရုရှား၌ ယင်းသို့သောစနစ် အများအပြား ထုတ်လုပ်မှုသည် နောက်ဆုံးအဆင့်ကို ရောက်နေပြီဟု ပူတင်က ဖြည့်စွက်ပြောကြားခဲ့သည်။

“ကျွန်တော်တို့ဟာ အဲဒါတွေကို ဖြန့် ကြက်ခြင်းအားဖြင့် တန်ပြန်ထင်ဟပ်တဲ့ အစီအမံတွေကို ချမှတ်သွားမှာဖြစ်ပါတယ်။ ဥရောပနဲ့ ကမ္ဘာ့အခြားဒေသတွေမှာရှိတဲ့ အမေရိကန်ရဲ့သြဇာခံနိုင်ငံတွေနဲ့ အမေ ရိကန်ရဲ့လုပ်ရပ်တွေကို ထည့်သွင်းစဉ်းစားပြီး လုပ်ဆောင်သွားမှာဖြစ်ပါတယ်”ဟု ရုရှားသမ္မတက သတိပေးခဲ့သည်။

ကီလိုမီတာ ၅၀၀ နှင့် ၅,၀၀၀ (မိုင် ၃၀၀ နှင့် ၃,၄၀၀) အကြား သွားနိုင်သော ယင်းသို့သော ဒုံးကျည်များသည် ၁၉၈၇ ခုနှစ်တွင် အမေရိကန်ပြည်ထောင်စုနှင့် ဆိုဗီယက်ပြည်ထောင်စုတို့က လက်မှတ်ရေးထိုးခဲ့သော  လက်နက်ထိန်းချုပ်ရေး သဘောတူစာချုပ်တွင်ပါဝင်ခဲ့သော အကြောင်းအရာဖြစ်ခဲ့သည်။

သို့ရာတွင် ၂၀၁၉ ခုနှစ် အမေရိကန်နှင့် ရုရှားတို့သည် တာလတ်ပစ်နျူကလီးယား လက်နက်များ သဘောတူစာချုပ်မှ နုတ်ထွက်ခဲ့ကြသည်။ ယင်းသို့ နုတ်ထွက်ခြင်းမှာ သဘောတူစာချုပ်ကို ချိုးဖောက်မှုများ ရှိနေသောကြောင့်ဖြစ်သည်ဟု နှစ်နိုင်စလုံးက အပြန်အလှန် စွပ်စွဲခဲ့ကြသည်။

ယင်းသို့သော ဒုံးကျည်များကို အမေရိကန်ပြည်ထောင်စုက ပြည်ပတွင် ဖြန့်ကြက်မထားမချင်း တာလတ်ပစ် ဒုံးကျည်ထုတ်လုပ်မှုများကို မိမိတို့ ပြန်လည်စတင်မည်မဟုတ်ဟု သဘောတူစာချုပ်မှ နုတ်ထွက်ခဲ့ပြီးနောက် ရုရှားက ပြောကြားခဲ့သည်။

တိုမာဟော့ ခရုစ်ဒုံးကျည်များအပါအဝင် တာဝေးပစ် အမေရိကန်ဒုံးကျည်များကို ဂျာမနီတွင် အခါအားလျော်စွာ ချထားမှုသည် ၂၀၂၆ ခုနှစ်တွင် စတင်လိမ့်မည်ဟု ဇူလိုင်လစောစောပိုင်းတွင် အမေရိကန်နှင့်ဂျာမနီတို့က ပြောကြားခဲ့ကြသည်။

အရေးကြီးသော ရုရှားစီမံအုပ်ချုပ်ရေး နေရာများနှင့် စစ်ရေးနေရာများသည် နောင်တွင် နျူကလီးယား ထိပ်ဖူးများ တပ်ဆင်လာနိုင်သည့် ယင်းသို့သော ဒုံးကျည်များရောက်နိုင်သည့် အကွာအဝေးတွင် ရှိလာလိမ့်မည်ဟု ပူတင်က ပြောကြားခဲ့သည်။ ပစ်လွှတ်ပြီး ၁၀ မိနစ်ခန့်အတွင်းတွင် အဆိုပါဒုံးကျည်များသည် မိမိတို့၏ နယ်မြေများထဲကို ရောက်လာလိမ့်မည်ဟု ဆိုသည်။

အမေရိကန်သည် မကြာသေးမီက ဒိန်းမတ်နှင့်ဖိလစ်ပိုင်တို့တွင် ပြုလုပ်ခဲ့သော စစ်ရေးလေ့ကျင့်မှုများတွင် တိုင်ဖွန်းတာလတ်ပစ် ဒုံးကျည်များကို ချထားခဲ့သည် ပူတင်က ပြောကြားခဲ့သည်။                                    

Ref:AFP