၂ဝဝ၉-၁၀ ရာသီရဲ့ တစ်ရာသီအတွင်းမေဂျာဖလား (၃)လုံးချန်ပီယံအဖြစ်ကနေ တဒင်္ဂအတွင်းမှာပဲ အီတလီပြည်တွင်းမှာတောင် လေးစားမှုကင်းမဲ့ခံရတဲ့အထိ ရုတ်ချည်းပျက်စီးသွားခဲ့ရတဲ့ အင်တာမီလန်ဟာ ပြီးခဲ့တဲ့နောက်ဆုံး (၅)ရာသီအတွင်းမှာတော့ အံ့အားသင့်စရာကောင်းတဲ့ တိုးတက်မှုအရှိန်အဟုန်နဲ့အတူ အသင်းရဲ့ခမ်းနားထည်ဝါသောပုံရိပ်ကို ပြန်လည်ပုံဖော်ထုဆစ်နိုင်ခဲ့တယ်။ စနစ်တကျ ရှိပြီး၊ နည်းလမ်းမှန်ကန်ခဲ့တဲ့ စီမံခန့်ခွဲမှုတွေနဲ့အတူ ဥရောပဘောလုံးဇာတ်ခုံရဲ့ စင်မြင့်ပေါ် ခန့်ထည်စွာ ပြန်လည်တက်လှမ်းလာနိုင်ခဲ့တယ်။ အသင်းရဲ့ကစားသမားအစုအဖွဲ့နဲ့ အနာဂတ်အလားအလာတွေက အားရကျေနပ်စရာ ကောင်းနေသလို၊ အမြင့်ဆုံးသောအောင်ပွဲတွေကို မျှော်လင့်နိုင်တဲ့ အခြေခံအုတ်မြစ်ကောင်းတွေကိုလည်း ပိုင်ဆိုင်ထားတယ်။