အင်တာမီလန်အသင်းခေါင်းဆောင် လော်တာရိုမာတီနက်ဇ်က မိမိအနေဖြင့် လက်ရှိ ဥရောပထိပ်တန်းတိုက်စစ်မှူးများဖြစ်သည့် ဘာပေ၊ ဟာလန်း၊ ဟာရီကိန်း၊ လီဝန်ဒေါစကီး တို့နှင့် တစ်တန်းတည်းဖြစ်လာနိုင်သည်ဟု ပြောကြားခဲ့သည်။
အသက် (၂၆) နှစ်အရွယ်ရှိ အာဂျင်တီးနားတိုက်စစ်မှူး လော်တာရိုမာတီနက်ဇ်သည် ယခုရာသီတွင် စီးရီးအေချန်ပီယံဖြစ်ခဲ့သည့် အင်တာမီလန်အသင်းတွင် အဓိကကစားသမားအဖြစ် ခြေစွမ်းပြခဲ့သူဖြစ်ပြီး ပြိုင်ပွဲစုံ (၄၄) ပွဲတွင် (၂၇) ဂိုး သွင်းယူခဲ့သည်။
၎င်းသည် ယခုရာသီ စီးရီးအေ (၃၃) ပွဲတွင် (၂၄)ဂိုးအထိ သွင်းယူထားပြီး ဒုတိယနေရာမှ ဂျူဗင်တပ်စ်တိုက်စစ်မှူး ဗလာဟိုဗစ်(၁၆ဂိုး) ဂိုးကို (၈) ဂိုးအထိ ဖြတ်ထားသဖြင့် ရွှေဖိနပ်ဆုရရန်လည်း သေချာနေသည်။
သတင်းထောက်တစ်ဦးက ၎င်းအား ဘာပေ၊ ဟာလန်း၊ ဟာရီကိန်း၊ လီဝန်ဒေါစကီးတို့ အဆင့်မျိုးရောက်ပြီလားဟု မေးမြန်းခဲ့ရာ လော်တာရိုမာတီနက်ဇ်က "သူတို့ကို ကျွန်တော် မနာလိုမဖြစ်ပါဘူး။ ကျွန်တော်က အဖေသင်ပေးတဲ့အတိုင်း ကြိုးစားနေပါတယ်။ တစ်နေ့မှာ ကျွန်တော်လည်း သူတို့နဲ့ တစ်တန်းတည်း ဖြစ်လာနိုင်ပါတယ်"ဟု ပြောကြားခဲ့သည်။
