ယူရို-၂၀၂၄ ပြိုင်ပွဲရဲ့ Underdog အသင်းတွေအကြောင်းပြောမယ်ဆိုရင် တူရကီအသင်းကို မေ့ထားလို့မရပါဘူး။ ၂၀၀၂ ကမ္ဘာ့ဖလားမှာတတိယ၊ ယူရို-၂၀၀၈ မှာ ဆီမီးဖိုင်နယ်အဆင့်တွေဆီရောက်ရှိခဲ့တဲ့အထိ ကိန်းခန်းကြီးမားခဲ့ဖူးပေမယ့် ဒီဘက်နောက်ပိုင်းမှာတော့ တူရကီဟာ ဥရောပရဲ့သာမန်အဆင့်အသင်းတစ်သင်းအဖြစ်သာရှိနေပြီး၊ ကမ္ဘာ့ဖလား၊ ယူရိုအစရှိတဲ့ပြိုင်ပွဲကြီးတွေမှာလည်း အသိအမှတ်ပြုစလောက်စရာ အောင်မြင်မှုတွေ၊ စွမ်းဆောင်ရည်တွေနဲ့ဝေးကွာနေတာ အချိန်တစ်ခုကြာခဲ့ပါပြီ။ အထူးသဖြင့် ၂၀၀၂ ပြိုင်ပွဲနောက်ပိုင်း ကမ္ဘာ့ဖလားနောက်ဆုံး (၅)ကြိမ်ဆက် (၂၀၀၆ မှ ၂၀၂၂ အထိ)ခြေစစ်ပွဲမအောင်မြင်ခဲ့သလို၊ ယူရိုပြိုင်ပွဲ နောက်ဆုံး (၃)ကြိမ်မှာလည်း ခြေစစ်ပွဲ (၂)ကြိမ် အောင်မြင်ခဲ့ပေမယ့် (၂)ကြိမ်စလုံး အုပ်စုအဆင့်နဲ့ပဲ ကျေနပ်ခဲ့ရတာပါ။