မော်လမြိုင်မြို့ရှိ မုပွန်နယ်မြေရဲစခန်းမှ အချုပ်ခန်းဖောက်ပြေးသူ သုံးဦးအနက် တစ်ဦးအား ဧပြီ ၁၉ ရက်က နံနက်ပိုင်းက ပြန်လည်ဖမ်းဆီးရမိခဲ့ကြောင်း လုံခြုံရေးတပ်ဖွဲ့နှင့် နီးစပ်သူမျးထံမှ သိရသည်။
ထိုဖြစ်စဉ်မှာ ပြီးခဲ့သည့် ဧပြီ ၁၇ ရက်နေ့ မွန်းလွဲ ၁ နာရီခွဲအချိန်ခန့်က အဆိုပါ မုပွန်နယ်မြေရဲစခန်းရှိ အချုပ်ခန်းအတွင်း ချုပ်နှောင်ထားသောအချုပ်သား သုံးဦးက အချုပ်ခန်းအမိုးအား ဖောက်ထွက်ကာ တာဝန်ကျရဲတပ်ဖွဲ့ဝင်ထံမှ သေနတ်အားလုယူကာ ပစ်ခတ်ပြီး ထွက်ပြေးသွားကြကြောင်း သိရသည်။
ထိုသို့ အချုပ်သားများက သေနတ်ဖြင့်ပစ်ခတ်မှုကြောင့် ရဲတပ်ကြပ်ကြီးထွန်းရှိန် သေဆုံးခဲ့ပြီး အချုပ်သားသုံးဦးသည် M – 16 သေနတ် တစ်လက်နက်နှင့် ထွက်ပြေးလွတ်မြောက်သွားခြင်းဖြစ်ကြောင်း လုံခြုံရေးတပ်ဖွဲ့နှင့် နီးစပ်သူများထံမှ သိရသည်။
ထွက်ပြေးလွတ်မြောက်သွားသည့် အချုပ်သားသုံးဦးအနက်မှ တစ်ဦးအား ဧပြီ ၁၉ ရက် နံနက် ၈ နာရီ ၄၅ မိနစ်အချိန်ခန့်က မုဒုံမြို့နယ်ကျိုက်ရွဲကျေးရွာ မော်လမြိုင် - မုဒုံကားလမ်းမဘေးတွင် ပြန်လည်ဖမ်းဆီးရမိခဲ့ကြောင်း လုံခြုံရေးတပ်ဖွဲ့နှင့် နီးစပ်သူတစ်ဦးက ပြောကြားသည်။
၎င်းကဆက်လက်ပြီး “ပြန်လည်ဖမ်းဆီးရမိခဲ့တဲ့ အချုပ်သားက အသက် (၂၀) နှစ်အရွယ် နေစိုးစံဆိုသူဖြစ်တယ်လို့ သိရတယ်။ သူက မူးယစ်ဆေးဝါးအမှု၊ လုယက်မှုတို့နဲ့ ဖမ်းဆီးချုပ်နှောင်ထားသူလို့ သိရပါတယ်”ဟု ပြောကြားသည်။
ပြန်လည်ဖမ်းဆီးရမိခဲ့သူ နေစိုးစံဆိုသူအား မော်လမြိုင်မြို့မရဲစခန်းတွင်ထားရှိကာ စစ်ဆေးမှုများလုပ်ဆောင်နေကြောင်း ၎င်းကဆိုသည်။
လွတ်မြောက်နေဆဲဖြစ်သည့် အချုပ်သားနှစ်ဦးအား ပြန်လည်ဖမ်းဆီးရမိနိုင်ရေးအတွက် သက်ဆိုင်ရာ လုံခြုံရေးအဖွဲ့အစည်းများအား ဆက်လက်ပိတ်ဆို့ရှာဖွေမှုများလုပ်ဆောင်နေဆဲဖြစ်ကြောင်း သိရသည်။
