ပြန်လည်ဦးမော့လာတဲ့ မန်ယူအသင်းမှာ ချီးကျူးရမယ့်ကစားသမားတွေ သုံးလေးဦးမက ရှိနေပေမဲ့ ဒီအချိန်မှာ အထင်ရှားဆုံးဖြစ်နေတာကတော့ တိုက်စစ်မှူး ဟွိုင်လန်းပါပဲ။ အသက်(၂၁)နှစ်စွန်းစွန်းသာရှိသေးတဲ့ ဒိန်းမတ် တိုက်စစ်မှူး ဟွိုင်လန်းက မန်ယူအသင်းရဲ့ ပျောက်ဆုံးနေတဲ့ တိုက်စစ်မြားဦးကို ပြန်မြင်တွေ့ရသလိုလည်း ဖြစ်စေခဲ့ပါတယ်။ ဟွိုင်လန်းက ဝေဖန်မှုတွေကို ကြံ့ကြံ့ခံဖြတ်သန်းရင်း သူ့အစွမ်းအစကို သက်သေပြခဲ့သူလည်းဖြစ်ပါတယ်။ အတ္တလန်တာအသင်းကနေ Add-ons ကြေးအပါအဝင် ပေါင် (၇၂)သန်းနဲ့ ရောက်ရှိလာခဲ့တဲ့ ဟွိုင်လန်းက မန်ယူအသင်းမှာ ခရစ္စမတ်ရောက်တဲ့အထိ ပရီးမီးယားလိဂ်ဂိုး မသွင်းနိုင်ခဲ့ပါဘူး။ ဒါကြောင့် ဝေဖန်ပြစ်တင်မှု၊ လှောင်ပြောင်ရှုတ်ချမှုတွေနဲ့ ရင်ဆိုင်ခဲ့ရပေမဲ့ လက်ရှိအချိန်မှာတော့ ပရီးမီးယားလိဂ်(၅)ပွဲဆက် ဂိုးသွင်းနိုင်သူဖြစ်နေခဲ့ပါပြီ။ မန်ယူအသင်းနောက် ဆုံးကစားခဲ့တဲ့ ပရီးမီးယားလိဂ်ပွဲစဉ်(၆)ပွဲမှာ ဟွိုင်လန်းက (၅)ပွဲ ယှဉ်ပြိုင်ကစားခဲ့ပြီး အဲဒီ(၅)ပွဲစလုံး ဂိုးသွင်းနိုင်ခဲ့တာပါ။