၂၀၂၃ ခုနှစ်က ကုန်ဆုံးဖို့သိပ်မလိုတော့ပါဘူး။ လာလီဂါပြိုင်ပွဲကလည်း ၂၀၂၃ ခုနှစ်ရဲ့ နှုတ်ဆက်ပွဲစဉ်ကို ကစားပြီးသွားပြီ။ ပြီးခဲ့တဲ့ ၂၀၂၃ ရဲ့ ရာသီဝက်လောက်ကတော့ လာလီဂါရဲ့ မဟာအသင်းကြီးနှစ်သင်းအတွက် ဒဏ်ရာတွေကြားမှ ရုန်းကန်ခဲ့ရတဲ့ရာသီတစ်ခုလို့ပြောရင်မှားမယ်မထင်ပါဘူး။ ဟုတ်ပါတယ်။ ရီးယဲလ်မက်ဒရစ်နဲ့ ဘာစီလိုနာနှစ်သင်းစလုံးကို ဒီရာသီမှာ ဒဏ်ရာပြဿနာတွေက နှိပ်စက်ခဲ့ကြတယ်။ နှစ်သင်းစလုံး ၂၀၂၃-၂၄ ရာသီစကတည်းက အခုရာသီဝက်ကျိုးခါနီး ၂၀၂၃ ကိုနှုတ်ဆက်တဲ့အချိန်အထိ အမာခံကစားသမားတွေကို လူစုံတက်စုံပွဲထုတ်နိုင်တာမျိုးတွေမလုပ်နိုင်ခဲ့ကြဘူး။ အဓိက ကစားသမားအများကိုကြည့်ရင်လည်း ကာလရှည်နားနေရသူ၊ အချိန်ပိုင်းနားနေရသူတွေနဲ့ ဒဏ်ရာတွေက နှစ်သင်းစလုံးကိုနှိပ်စက်ခဲ့ကြတယ်။