ဘိုင်ယန်မြူးနစ်အသင်းသည် ဘောလုံးသမားတိုင်းအတွက် အိပ်မက်တစ်ခုဖြစ်ကြောင်း နောက်ခံလူသစ် ကင်မင်ဂျေးက ဖွင့်ဟပြောကြားခဲ့သည်။
ဘိုင်ယန်မြူးနစ်အသင်းသည် နာပိုလီအသင်းမှ တောင်ကိုရီးယား လက်ရွေးစင်နောက်ခံလူ ကင်မင်ဂျေးအား (၅)နှစ်စာချုပ်ဖြင့် ခေါ်ယူပြီး ၂၀၂၈ ခုနှစ်အထိ စာချုပ်ချုပ်ဆိုခဲ့သည်။
"ဘိုင်ယန်မြူးနစ်သင်းဟာ ဘောလုံးသမားတိုင်းအတွက် အိပ်မက်တစ်ခုပါ။ မြူးနစ်မှာ ဖြစ်လာမယ့် အရာတွေကို ကျွန်တော် အမှန်တကယ် မျှော်လင့်နေမိပါတယ်။ ဒါဟာ ကျွန်တော့်အဖို့ ဘဝသစ်တစ်ခု စတင်ခြင်းပါ။ ဒီအသင်းမှာ ကျွန်တော် ဆက်လက်တိုးတက်မှု ရရှိပါလိမ့်မယ်။ ကလပ်နဲ့ ဆွေးနွေးမှုမှာ သူတို့ ကျွန်တော့်ကို ဘယ်လိုစိတ်ဝင်စားသလဲဆိုတာ အစကတည်းမှာပဲ ရှင်းရှင်းလင်းလင်း ဖြစ်ခဲ့ပါတယ်။ ကျွန်တော့်ရဲ့ပထမဆုံး ရည်မှန်းချက်က ပွဲများစွာ ကစားခွင့်ရဖို့ပါပဲ။ ထပ်ဖြည့်ရရင်တော့ ရနိုင်သ လောက် ဆုဖလားများစွာ ကျွန်တော် ရယူချင်ပါတယ်"ဟု ကင်မင်ဂျေးက ပြောကြားခဲ့သည်။
အသက်(၂၆)နှစ် အရွယ်ရှိ ကင်မင်ဂျေး၏ ပြောင်းရွှေ့ ကြေးကို တရားဝင်ထုတ်ပြန်ခြင်း မရှိသော်လည်း ဘိုင်ယန်အသင်းအနေဖြင့် နာပိုလီထံ စာချုပ်လျော်ကြေးပမာဏအတိုင်း ယူရို သန်း(၅၀)ပေးချေခဲ့ရသည်ဟု သတင်းများက ဖော်ပြခဲ့သည်။ ကင်မင်ဂျေးသည် ဘိုင်ယန်မြူးနစ်အသင်းတွင် ကျောနံပါတ်(၃) ဂျာစီ ကို ဝတ်ဆင်သွားမည်ဖြစ်ကြောင်း သိရသည်။
ကင်မင်ဂျေးသည် နာပိုလီအသင်း စီးရီးအေချန်ပီယံဆု ဆွတ်ခူးခဲ့ရာတွင် အဓိကအခန်းကဏ္ဍမှ ပါဝင်ခဲ့ပြီး အမှတ်ပေးပွဲ (၃၅)ပွဲအထိ ပါဝင်ကစားခွင့်ရခဲ့ပြီးနောက် ရာသီကုန်တွင် စီးရီးအေတစ်နှစ်တာအကောင်းဆုံး နောက်ခံလူဆုကို ဆွတ်ခူးရရှိခဲ့သည်။
