မန်ယူကွင်းလယ်ကစားသမား ကက်စီမီရိုက မိမိအနေဖြင့် အသင်းခေါင်းဆောင်အဖြစ် ဆောင်ရွက်ရသည်ကို နှစ်သက်ကြောင်း ပြောကြားခဲ့သည်။
မန်ယူအသင်းသည် အသင်းတွင် ခြေစွမ်းပြနိုင်ခြင်းမရှိဘဲ ပုံမှန်ပွဲထွက်ခွင့်ရရန် ရုန်းကန်နေရသည့် လက်ရှိအသင်းခေါင်းဆောင် မက်ဂွိုင်းရားအား ရာထူးမှ ဖယ်ရှားဖွယ်ရှိနေကြောင်း သတင်းများထွက်ပေါ်နေသည်။
ကက်စီမီရိုသည် ပြီးခဲ့သည့် ၂၀၂၂ နွေရာသီကမှ ရီးယဲလ်မက်ဒရစ်အသင်းမှ မန်ယူအသင်းထံသို့ ပြောင်းရွှေ့ခဲ့သူဖြစ်သော်လည်း အသင်းခေါင်းဆောင်ဖြစ်လိုကြောင်း ပြောကြားခဲ့ခြင်းဖြစ်သည်။
ကက်စီမီရိုက "ရိုးရိုးသားသားပြောရမယ်ဆိုရင် ကျွန်တော့်အနေနဲ့ အသင်းခေါင်းဆောင်ဖြစ်ရတာကို နှစ်သက်ပါတယ်။ လူတွေ စံနမူနာယူရတဲ့သူအဖြစ် ဦးဆောင်ရတာကို ကျွန်တော် သဘောကျပါတယ်။ လေ့ကျင့်ခန်းကို အစောဆုံး ရောက်လာတာမျိုးတွေပေါ့။ တကယ်တမ်းပြောရရင် အသင်းခေါင်းဆောင်လက်ပတ်ဆိုတာက သင်္ကေတတစ်ခုထက် မပိုပါဘူုး။ ဒါပေမဲ့ အသင်းခေါင်းဆောင်တွေဟာ ဒိုင်လူကြီးတွေနဲ့ စကားပြောရသလို၊ အသင်းဖော်တွေကိုလည်း အားပေးရပါတယ်။ တစ်သင်းလုံးက စံနမူနာယူရတဲ့ ကစားသမားမျိုးဖြစ်ပြီး ကျွန်တော် အဲဒီလို ဖြစ်ချင်ပါတယ်" ဟု ပြောကြားခဲ့သည်။
သို့သော် မက်ဂွိုင်းရားအား အသင်းခေါင်းဆောင်ရာထူးမှ ဖယ်ရှားခဲ့ပါက ၎င်း၏ ရာထူးကို ဒု-ခေါင်းဆောင် ဘရူနိုဖာနန်ဒက်စ်က ရယူသွားဖွယ်ရှိကြောင်း သိရှိရသည်။