The Glory တောင်ကိုရီးယားဇာတ်လမ်းတွဲတွင် တစ်ဦးနှင့်တစ်ဦး ရန်ဘက်အဖြစ် ပရိသတ်မြင်ခဲ့ရသော်လည်း လက်တွေ့ဘဝတွင် ချစ်သူဖြစ်နေကြသည့် လီဒိုဟွန်းနှင့် လင်ဂျီယွန်းတို့အကြား ကြီးမားသည့်စိန်ခေါ်မှု တစ်ခုက စောင့်ကြိုနေသည်။
လတ်တလောဆိုရှယ်မီဒီယာတွင် ၎င်းတို့နှစ်ဦး ချစ်သူဖြစ်နေပြီဆိုသည့် သတင်းများ ပွက်လောရိုက်နေပြီး ဆောင်းဟေကိုနှင့်အတူ The Glory ဇာတ်လမ်းတွဲရိုက်ကူးရင်း ငြိခဲ့ကြခြင်းဖြစ်သည်။Dispatch မီဒီယာအတည် ပြုချက်အရ ၎င်းတို့နှစ်ဦးခိုးတွေ့နေကြသည်မှာ လေးလရှိပြီဖြစ်သည်။
သို့သော် လီဒိုဟွန်းက ယခုနှစ်အတွက် အလုပ်ကိစ္စအားလုံးပြီးစီးသွားပါက စစ်မှုတာ ဝန်ထမ်းဆောင်ရတော့မည်ဖြစ်သည်။ မည်သည့်အချိန် စစ်မှုထမ်းဖြစ်မည်ကိုမူ သတင်းများတွင် မဖော်ပြကြသေးပေ။
ထင်မှတ်မထားသည့် ၎င်းတို့နှစ်ဦးဆက်ဆံရေးကို ချပြလိုက်သည့်အတွက် ပရိသတ်များ အံ့အားသင့်ခဲ့ရပြီး The Glory ထဲမှ ၎င်းတို့နှစ်ဦး၏ဇာတ်ရုပ်ပိုင်နိုင်မှုကို ပရိသတ်အများစုက ချီးကျူးနေကြကာ အချစ်ကားတွဲ ရိုက်ကူးရန် မျှော်လင့်နေကြသည်။
လီဒိုဟွန်းသည် 18 Again ၊ Hotel Del Luna နှင့် Sweet Home စသည့်နာမည် ကျော်ဒရာမာဇာတ်လမ်းတွဲအချို့တွင် ပါဝင်ထားပြီး ၎င်းထက်အသက်ငါးနှစ်ကြီးသည့် လင်ဂျီယွန်းကလည်း ကိုရီးယားဗားရှင်းဖြင့် ပြန်ရိုက်ကူးထားသည့် Money Heist ၊ The Treacherous ၊The Royal Gambler နှင့် High Society စသည့် ဇာတ်လမ်းတွဲများ၊ ဇာတ်ကားများတွင် သရုပ်ဆောင်ခဲ့သည်။
၎င်းတို့ချစ်သူနှစ်ဦးတွင် တူညီမှုအချို့ ရှိနေကြပြီး ထိုအချက်များကြောင့်လည်း နီးစပ်သွားခြင်းဖြစ်လိိမ့်မည်ဟု ပရိသတ်များက ယူဆနေကြသည်။
ပထမတစ်ခုက နာမည်ဖြစ်သည်။လင်ဂျီယွန်းဆိုသည့် အနုပညာနာမည်က နာမည်အရင်းပင်ဖြစ်ပြီး လီိဒိုဟွန်းကမူ နာမည်အရင်း သုံးထားခြင်းမဟုတ်ပေ။ လီဒိုဟွန်း၏နာမည်အရင်းက လင်ဒုံဟွန်းဖြစ်သည်။နှစ်ဦး စလုံးတွင် ‘လင်’ဆိုသည့်နာမည်ပါနေသည်။
ဒုတိယတစ်ခုက သွေးအမျိုးအစားဖြစ်သည်။နှစ်ဦးစလုံး A သွေးကို ပိုင်ဆိုင်ထားသည်။
တတိယတူညီနေသည့်အချက်က မွေးရပ်နေရာဖြစ်သည်။လီဒိုဟွန်းက ဆိုးလ်တွင် မွေးပြီး အီဆန်တွင် ကြီးပြင်းခဲ့သည်။လင်ဂျီယွန်းကလည်း ကလေးဘဝကို ဆိုးလ်၌ပင် ဖြတ်သန်းခဲ့သည်။
နောက်ထပ်တူညီနေသည့် အရာတစ်ခုလည်း ရှိသေးသည်။နှစ်ဦးစလုံး ခရစ်ယာန်ဘာသာကို ကိုးကွယ်ကြသည်။ မီဒီယာအင်တာဗျူးတစ်ခုတွင် လင်ဂျီယွန်းက ၎င်းဘုရားကျောင်းတက်လေ့ရှိသည်ဟု ပြောဖူးသည်။
