နိုင်ငံခြားငွေလဲလှယ်မှု စျေးကွက်တွင် စျေးကစားမှုကို ဖြစ်စေသည့် ငွေကြေးတစ်ရပ်၏ ရုတ်တရက် မတည်မငြိမ်ဖြစ်မှုကို ငွေကြေးအကျပ်အတည်းဟုဆိုကြသည်။ ယင်းအကျပ်အတည်းသည် ရည်ညွှန်းငွေလဲလှယ်နှုန်း သို့မဟုတ် ငွေကြေးဆိုင်ရာ မူဝါဒချမှတ်မှုများ အပါအဝင် အကြောင်းခြင်းရာများစွာတို့ကြောင့် ဖြစ်ပွားနိုင်သည်။ ယင်းကို ငွေလဲလှယ်နှုန်းအား နှုန်းရှင်မျှောခြင်းကို အကောင်အထည်ဖော်မှု သို့မဟုတ် စျေးကွက်ကို လမ်းဖွင့်ပေးမည့်အစား စျေးကွက်ကို ပျက်ပြားစေသည့် ငွေကြေးဆိုင်ရာမူဝါဒများကို ရှောင်ကြဉ်မှုတို့အားဖြင့် ဖြေရှင်းနိုင်သည်ဟု ဆိုကြသည်။

ငွေကြေးအကျပ်အတည်းတစ်ရပ်ကို ဖြစ်စေသည့် အကြောင်းခြင်းရာများ၌ ဗဟိုဘဏ်၏ မူဝါဒများမှသည် စျေးကစားခြင်းသက်သက်အထိ အကြောင်းအရာများစွာ ပါဝင်ပြီး ကြိုတင်ခန့်မှန်းနိုင်ရန်လည်း ခက်ခဲတတ်သည်။ အတိတ်၌ ဖြစ်ပေါ်ခဲ့သည့် ငွေကြေးအကျပ်အတည်းကို ဖြစ်စေသော အဓိကအကြောင်းရင်းမှာ ပြင်ပ၌ ဖြစ်ပေါ်နေသော ငွေလဲလှယ်နှုန်းကို နှုန်းရှင်မျှောခြင်းနှင့်အညီ ရည်ညွှန်းငွေလဲလှယ်နှုန်းကို ကန့်သတ်ထားမှုအား ထိန်းထားရန် ဗဟိုဘဏ်က ပျက်ကွက်ခြင်းဖြစ်သည်။ ဥပမာအားဖြင့် ဂျော့ဆိုးရော့စ်သည် ဗြိတိန်အစိုးရအနေဖြင့် ဗြိတိန်၌ ငွေကြေးဖောင်းပွမှုနှုန်းက ဂျာမနီ၏ သုံးဆဖြစ်သည့်အခါ ရှဲဒိုးအနေဖြင့် သတ်မှတ်ထားသော ဗြိတိန်ပေါင်၏ ရည်ညွှန်းငွေလဲလှယ်နှုန်းအား ကာကွယ်နိုင်မည်မဟုတ်ဟူ၍ အလောင်းအစား လုပ်ခဲ့သည်။ နောက်ဆုံး၌ ဆိုးရော့စ်၏ တွက်ကိန်း မှန်ကန်ခဲ့ပြီး ပေါင်ငွေ ထိုးဆင်းသွားကာ ၎င်းအနေဖြင့် ဒေါ်လာဘီလျံနှင့်ချီသော အကျိုးအမြတ်များ ရရှိခဲ့သည်။

ရည်ညွှန်းငွေလဲလှယ်နှုန်း ပုံသေထားရှိမှု မရှိသည့်အခါ၌ပင်လျှင် သတ်မှတ်ထားချက်များအတွင်း မçတည်ရင်းနှီးမြှုပ်နှံမှုကို ထိန်းထားရန်အတွက် ၎င်းငွေကြေး၏ တန်ဖိုးကို ထောက်ကန်ထားနိုင်ရေး ဗဟိုဘဏ်၏ ဆန္ဒကြောင့်လည်း ငွေကြေးအကျပ်အတည်း ထွက်ပေါ်လာနိုင်သည်။ ဥပမာအားဖြင့် ၂၀၁၄ ခုနှစ်အစောပိုင်းတွင် ပွင့်သစ်စ စျေးကွက်များသည် အရင်းအနှီးများ စီးထွက်သွားမှုကို ကြုံတွေ့ရပြီး ၎င်းတို့၏ငွေကြေးအနေဖြင့် တန်ဖိုးထိုးကျသွားမှုဆီသို့ ဦးတည်သွားခဲ့သည်။ ဗဟိုဘဏ်များက ရင်းနှီးမြှုပ်နှံသူများကို ဆွဲဆောင်ရန် အတိုးနှုန်းများကို မြှင့်တင်ခြင်းအားဖြင့် တုံ့ပြန်ခဲ့သည်။ သို့သော် အတိုးနှုန်း ပို၍မြင့်မားလာခြင်းက စီးပွားရေးကြီးထွားမှုနှင့် အမှန်တကယ် တန်ဖိုးတက်မှု ပိုမိုနှေးကွေးသွားခြင်းဆီသို့ ဦးတည်သွားခဲ့သည်။

အခြားသောဖြစ်ရပ်များတွင် နိုင်ငံများသည် ၎င်းတို့၏ ပို့ကုန်များအတွက် ဝယ်လိုအားကို လှုံ့ဆော်ရန် ၎င်းတို့၏ငွေကြေးကို တမင်နှိမ့်ချလိုက်ခြင်းအား ဆက်လက် ထိန်းသိမ်းထားလိုကြသည်။ ယင်းနှင့်ပတ်သက်၍ အကျော်ကြားဆုံးဥပမာမှာ တရုတ်နိုင်ငံ ဖြစ်သည်။ တရုတ်နိုင်ငံသည် ၎င်းတို့၏ အမေရိကန်ဒေါ်လာနှင့် ရည်ညွှန်းငွေလဲလှယ်နှုန်းကို ဆယ်စုနှစ်နှင့်ချီလျက် ထိန်းထားခဲ့သည်။ တရုတ်သည် အရန်နိုင်ငံခြားငွေကြေး အလွန်များပြားစွာ ရှိသောကြောင့် ရည်ညွှန်းငွေလဲလှယ်နှုန်းကို ကာကွယ်ရန် မည်သည့်အခါမျှ ဒုက္ခမတွေ့ခဲ့ပေ။ သို့သော် ယင်းသည် စျေးကွက်၏ အခြားနယ်ပယ်များ၌ ဟန်ချက် ပျက်ယွင်းမှုကို ဖြစ်စေခဲ့သည်။

မည်သည့်အခါတွင်မဆို ဖြစ်ပေါ်လာနိုင်သည့် အကျပ်အတည်းတစ်ရပ်ကို ကာကွယ်နိုင်သော ကာကွယ်ရေးနည်းလမ်းများစွာတို့အပါအဝင် ငွေကြေးအကျပ်အတည်းတစ်ရပ်အား ဖြေရှင်းရန် ဖြစ်နိုင်ဖွယ်ရှိသော နည်းလမ်းများစွာရှိသည်။ ငွေကြေးအကျပ်အတည်းတစ်ရပ်ကို အကောင်းဆုံး ဖြေရှင်းရန်သည် ပထမအဆင့်မှာပင် ကာကွယ်ရေးနည်းလမ်းများအားဖြင့် ရှောင်ရှားရန်ဖြစ်သည်။ ဗဟိုဘဏ်များက စျေးကွက်ကို တိုက်ရမည့် ရည်ညွှန်းငွေလဲလှယ်နှုန်း ကန့်သတ်ထားမှုနှင့် ဆန့်ကျင်လျက် စျေးကွက်က အမြဲတမ်းစျေးနှုန်း သတ်မှတ်သည်ဟူသည့်အချက်အား သေချာစေခြင်းဖြင့် ငွေလဲလှယ်နှုန်းကို နှုန်းရှင်မျှော ခြင်းက ငွေကြေးအကျပ်အတည်းကို ရှောင်ရှားမှုဆီသို့ ဦးတည်သွားစေသည်။ ဥပမာအား ဖြင့် ဗြိတိန်အနေဖြင့် ဂျော့ဆိုးရော့စ်အား ခံတိုက်ရန်အတွက် ဗဟိုဘဏ်သည် စျေးကစားသူများ လက်မှနေ၍ သူ၏ငွေကြေးကို ကာကွယ်ရန် ငွေကြေးဘီလျံနှင့်ချီလျက် သုံးစွဲရန် လို အပ်ခဲ့သည်။

ဗဟိုဘဏ်များသည် ပို၍ကျယ်ပြန့်လာသော အကျပ်အတည်းတစ်ရပ်ကို ကာကွယ်ရန် လုံးဝလိုအပ်မှု မရှိမချင်း စျေးကွက်ကို ဆန့်ကျင်လျက် ကုန်သွယ်ခြင်း အကျုံးဝင်သော ငွေကြေးဆိုင်ရာမူဝါဒများကို ရှောင်ရှားခြင်း ပြုသင့်သည်။ ဥပမာအားဖြင့် ပွင့်သစ်စစျေးကွက် စီးပွားရေးများသည် ငွေကြေးများစီးထွက်မှုနှင့်ပတ်သက်၍ ရှောင်လွှဲ၍မရနိုင်ခြင်းကို လက်ခံနိုင်ရမည်ဖြစ်ပြီး ဗဟိုဘဏ်အနေဖြင့် ဆက်ထိန်းထားနိုင်ရန် ငွေကြေးသန်းနှင့် ချီကုန်ကျမည့် အတိုးနှုန်းများ မြှင့်တင်မှုပြုလုပ်ရန် ကြိုးပမ်းမည့်အစား နိုင်ငံခြားတိုက်ရိုက် ရင်းနှီးမြှုပ်နှံမှုကို ဆွဲဆောင်နိုင်ရန် ရင်းနှီးမြှုပ်နှံမှုမူဝါဒများကို ပြုပြင်ပြောင်းလဲသင့်သည်။ ယင်းသည် ပို့ကုန်မြင့်တက်ရေးနှင့် ပြည်တွင်းစီးပွားရေး တိုးတက်ရေးတို့ကိုပင်လျှင် အထောက်အကူပြုနိုင်သည်။

မည်သို့ပင်ဆိုစေကာမူ ငွေကြေးအကျပ်အတည်းတစ်ရပ်သည် နိုင်ငံတစ်နိုင်ငံအား နိုင်ငံရေးအကျပ်အတည်း တစ်ရပ်ဆီသို့ ဦးတည်သွားစေနိုင်သောကြောင့် ငွေကြေးအကျပ်အတည်းကို ဖြေရှင်းရေးအတွက် ထိရောက်သော နည်းလမ်းများကို အမြန်ဆုံး ရှာဖွေနိုင်ရန် လိုအပ်မည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။

■ ဖေဖော်ဝါရီ ၄ ရက်ထုတ် The Daily Eleven သတင်းစာ၏ အယ်ဒီတာ့အာဘော်