ကရင်အမျိုးသားအစည်းအရုံး (KNU) ထိန်းချုပ်နယ်မြေများတွင် တပ်မတော်၊ နယ်ခြားစောင့်တပ် (BGF) နှင့် ကရင်အမျိုးသားလွတ်မြောက်ရေးတပ်ဖွဲ့ (KNLA)၊ ကရင်အမျိုးသားကာကွယ်ရေးတပ်ဖွဲ့ (KNDO) တို့အကြား တိုက်ပွဲများ နေ့စဉ်ဖြစ်ပွားနေပြီး တပ်မဟာ(၁) နယ်မြေ ဒူးသထူးခရိုင်နှင့် တပ်မဟာ (၃) နယ်မြေ ညောင်လေးပင်ခရိုင်တို့တွင် စစ်ဘေးရှောင် ၁၅၄၈၆၆ ဦးရှိကြောင်း သြဂုတ် ၁၄ ရက်တွင် KNU က သတင်းထုတ်ပြန်သည်။
အဆိုပါသတင်းထုတ်ပြန်ချက်တွင် တပ်မဟာ(၂)နယ်မြေ တောင်ငူခရိုင်၊ တပ်မဟာ (၄) နယ်မြေ ဘိတ်-ထားဝယ်ခရိုင်၊ တပ်မဟာ (၅) နယ်မြေ ဖာပွန်ခရိုင်၊ တပ်မဟာ (၆) နယ်မြေ ဒူးပလာယာခရိုင်တို့ရှိ စစ်ဘေးရှောင်ပြည်သူအရေအတွက်ကို စိစစ်ဆဲဖြစ်ကြောင်းလည်း ဖော်ပြထားသည်။
ထို့ပြင် နှစ်ဖက်တိုက်ပွဲများအကြား အပြစ်မဲ့ပြည်သူအမြောက်အမြား၏ အသက်များစွာလည်း ဆုံးရှုံးခဲ့ရကြောင်းလည်း KNU က သတင်းထုတ်ပြန်သည်။
KNU ထိန်းချုပ်နယ်မြေအတွင်းရှိ စစ်ဘေးရှောင်ပြည်သူများအတွက် နေရာထိုင်ခင်း၊ လုံခြုံရေး၊ ကျန်းမာရေး၊ စားဝတ်နေရေး လိုအပ်ချက်များကို သက်ဆိုင်ရာ တပ်မဟာခရိုင်များအတွင်းရှိ တာဝန်ရှိသူများက တတ်နိုင်သည့်ဘက်မှ အကောင်းဆုံး စီစဉ်ဆောင်ရွက်ပေးလျက်ရှိကြောင်း KNU ၏ သတင်းထုတ်ပြန်ချက်တွင် ဖော်ပြထားသည်။
သို့သော်လည်း စစ်ဘေးရှောင်ပြည်သူဦးရေမှာ အများအပြားတိုးပွားလာခြင်းကြောင့် လိုအပ်ချက်များမှာလည်း ပိုမိုမြင့်မားလာကြောင်း KNU က ထုတ်ပြန်သည်။
လက်ရှိစစ်ဘေးရှောင်များအတွက် အဓိကအားဖြင့် ရိက္ခာ၊ နေရာထိုင်ခင်းနှင့် အမိုးအကာများ အများအပြား လိုအပ်လျက်ရှိကြောင်း၊ အကူအညီများ ပေးအပ်လိုသည့် အဖွဲ့အစည်း၊ ပုဂ္ဂိုလ်များကိုကြိုဆိုလျက်ရှိကြောင်း ထုတ်ပြန်ချက်တွင် ပါရှိသည်။
၂၀၂၂ ခုနှစ် ဇူလိုင်လအတွင်း KNLA၊ KNDO နှင့် တပ်မတော်၊ BGF တို့အကြား တိုက်ပွဲကြီး၊ တိုက်ပွဲငယ်နှင့် ပျောက်ကြားပစ်ခတ်မှုပေါင်း ၂၅၉ ကြိမ်ဖြစ်ပွားခဲ့ကြောင်း သြဂုတ် ၉ ရက်တွင် KNU က သတင်းထုတ်ပြန်ထားသည်။
အဆိုပါတိုက်ပွဲများအတွင်း တပ်မတော်၊ BGF ဘက်မှ ၃၈၆ ဦး သေဆုံးခဲ့ပြီး ၂၈၀ ဦး ထိခိုက်ဒဏ်ရာရရှိခဲ့ကြောင်း၊ KNLA၊ KNDO ဘက်မှ ၁၂ ဦး သေဆုံးခဲ့ပြီး ၂၆ ဦးထိခိုက်ဒဏ်ရာရရှိခဲ့ကြောင်းနှင့် အရပ်သား ၁၉ ဦး သေဆုံးခဲ့ပြီး ၂၆ဦး ထိခိုက်ဒဏ်ရာရရှိခဲ့ကြောင်း KNU ၏ သတင်းထုတ်ပြန်ချက်တွင် ဖော်ပြထားသည်။
