နည်းပညာအခက်အခဲကြောင့် Wave ငွေလွှဲအသုံးပြုသူများ ယာယီပြတ်တောက်မှု ကြုံတွေ့ခဲ့ရပြီး ငွေလွှဲမှုနှင့် အကောင့်များ၏ လုံခြုံရေးအတွက် အာမခံကြောင်း Wave Money က ထုတ်ပြန်ခဲ့သည်။
ဖေဖော်ဝါရီ ၈ ရက် ညနေပိုင်းမှ စတင်ကာ Wave ငွေလွှဲအသုံးပြုသူများမှာ ငွေလွှဲမရခြင်းများ ကြုံတွေ့ခဲ့ရကြောင်း Wave Money အသုံးပြုသူများက ပြောကြားသည်။
“ပိုက်ဆံလွှဲလို့ မရတော့ဘူး။ လိုင်းကျတာလား ဘာလားတော့ မသိဘူး။ ကုန်ဖိုးလွှဲရမယ့်ငွေတွေက အကောင့်ထဲမှာ ပိတ်မိနေတယ်” ဟု Wave Money အသုံးပြုသူတစ်ဦးက ပြောကြားသည်။
ငွေလွှဲအတွက် အသုံးပြုမရခြင်းမှာ နည်းပညာ အခက်အခဲကြောင့်ဖြစ်ပြီး ဝန်ဆောင်မှု နှောင့်နှေးခဲ့ကြောင်း၊ လက်ရှိတွင် ပုံမှန်အတိုင်း အသုံးပြုနိုင်ပြီဖြစ်ကြောင်း Wave Money က ထုတ်ပြန်သည်။
“Wave Money နဲ့ Wave Pay ဝန်ဆောင်မှုများမှာ မနေ့က ညနေပိုင်းတွင် နည်းပညာ အခက်အခဲလေး အနည်းငယ်ကြောင့် ဝန်ဆောင်မှုလေးများ အနည်းငယ် နှောင့်နှေးခဲ့ပြီး ယခုအချိန်မှာတော့ ပုံမှန်အတိုင်း ပြန်လည်ကောင်းမွန်စွာအသုံးပြုနိုင်နေပြီဖြစ်ပါတယ်။ လူကြီးမင်းတို့ရဲ့ Wave Money ငွေလွှဲ ဆောင်ရွက်ချက်များနှင့် Wave Money Account များမှာလည်း အပြည့်အဝလုံခြုံမှုရှိနေကြောင်း အာမခံပြောကြားလိုပါတယ်” ဟု Wave Money က ထုတ်ပြန်သည်။
ထို့ပြင် သတင်းမှားများ ထွက်ပေါ်လာခြင်းအပေါ် စိတ်ပူရန်မလိုကြောင်း၊ အသုံးပြုသူတစ်ဦးချင်း၏ ကိုယ်ရေးအချက်အလက်များကို မျှဝေခြင်းမပြုရန် Wave Money က သတိပေးထားသည်။
“ လူမှုကွန်ရက်များပေါ်မှ မဟုတ်မှန်သော ကောလာဟလ သတင်းအမှားများကြောင့် စိတ်ပူပန်မှုမရှိစေရန်နှင့် လူကြီးမင်း၏ OTP ၊ PIN နှင့် ကိုယ်ရေးအချက်အလက် နံပါတ်တို့ကိုလည်း မည်သူတစ်ဦးတစ်ယောက်ကိုမျှ မျှဝေခြင်းမျိုး မပြုရန်လည်း ထပ်မံသတိပေးမေတ္တာရပ်ခံလိုပါတယ်။ ကျေးဇူးတင်ပါတယ်။ အထူးသတိပြုရန်။ Wave Money အမည်ဘေးတွင် Blue Mark (အပြာရောင်အမှန်ခြစ်) လေးပါမှသာ Wave Money Offical Page အစစ်ဖြစ်ပြီး Wave Money Call Center နံပါတ်များသည်လည်း ၉၀၀ နှင့် ၀၉၇၉၀၀၀၉၀၀၀ တို့သာဖြစ်သောကြောင့် လူကြီးမင်းတို့ထံသို့ အခြားဖုန်းနံပါတ်များ၊ Facebook အကောင့်များဖြင့် Wave Money ဝန်ထမ်းဟုဆိုကာ OTP ကုဒ်နံပါတ်၊ PIN နံပါတ်များ လာရောက်ဆက်သွယ်တောင်းယူပါက လုံးဝ (လုံးဝ) မပေးကြပါရန် အသိပေးအပ်ပါသည်” ဟု Wave Money က ထုတ်ပြန်ခဲ့သည်။
Wave Money အား ယခင်က တယ်လီနောဆက်သွယ်ရေးကုမ္ပဏီက ရှယ်ယာ ၅၁ ရာခိုင်နှုန်း ပိုင်ဆိုင်ထားပြီး ယင်းရှယ်ယာများကို ဒေါ်လာ ၅၃ သန်းဖြင့် Yoma သို့ ရောင်းချရန် ပြီးခဲ့သည့်လပိုင်းက သဘောတူညီမှု ရရှိခဲ့သည်။
Wave Money သည် မြန်မာနိုင်ငံတွင် ငွေလွှဲခြင်းနှင့် ဒစ်ဂျစ်တယ်ငွေပေးချေမှု ဖြေရှင်းချက်များကို ဦးဆောင်နေသည့် ကုမ္ပဏီတစ်ခုဖြစ်ပြီး မြန်မာ့မိုဘိုင်းလ်ဘဏ္ဍာရေးဝန်ဆောင်မှု စည်းမျဉ်းဥပဒေသစ်အရ ဘဏ်မဟုတ်သော အဖွဲ့အစည်းအဖြစ် ပထမဆုံး လုပ်ကိုင်ခွင့်ရရှိခဲ့ကာ ရိုးမဘဏ်နှင့် တယ်လီနောအုပ်စုတို့အကြား ၂၀၁၆ ခုနှစ် နိုဝင်ဘာလက ဖက်စပ်လုပ်ငန်းအဖြစ် တယ်လီနော (မြန်မာ) က ရှယ်ယာ ၅၁ ရာခိုင်နှုန်း၊ ရိုးမအုပ်စုဝင် ရိုးမ မဟာဗျူဟာရင်းနှီးမြှုပ်နှံမှု လီမိတက် (YSIL) က ၄၄ ရာခိုင်နှုန်း၊ ရိုးမဘဏ်က ရှယ်ယာ ငါးရာခိုင်နှုန်းဖြင့် လုပ်ကိုင်ခဲ့ကြခြင်း ဖြစ်သည်။
၂၀၂၀ ပြည့်နှစ်တွင် Wave Money အနေဖြင့် ငွေလွှဲခြင်း၊ ငွေပေးချေခြင်းတို့တွင် အမေရိကန်ဒေါ်လာ ၈ ဒသမ ၇ ဘီလျံအထိ ဆောင်ရွက်ပေးခဲ့ကြောင်း၊ တစ်နိုင်ငံလုံးရှိ မြို့နယ် ၂၉၅ ခုတွင် Wave Shops နှင့် Wave Money အေးဂျင့် ၄၅၀၀၀ ကျော်ရှိခဲ့ကြောင်း တယ်လီနော၏ ထုတ်ပြန်ချက်အရ သိရသည်။
