မြန်မာနိုင်ငံလျှို့ဝှက်အက်ဥပဒေနှင့် လဝကဥပဒေတို့ဖြင့် ဖမ်းဆီးထားသည့် သြစတြေးလျနိုင်ငံသား ရှောင်တာနယ် ပြန်လည်လွတ်မြောက်သည့်သတင်း မဟုတ်ကြောင်း နိုင်ငံတော်စီမံအုပ်ချုပ်ရေးကောင်စီ ပြောရေးဆိုခွင့်ရှိသူ ပြန်ကြားရေးဒုတိယဝန်ကြီး ဗိုလ်ချုပ်ဇော်မင်းထွန်းက ပြောကြားသည်။ 

ရှောင်တာနယ်အား ပြန်လည်လွှတ်ပေးလိုက်ကြောင်း ကြားသိရသည်ဟု ကမ္ဘောဒီယားသတင်းဌာနတစ်ခုက ဖော်ပြခဲ့ပြီး ယင်းသတင်းမှာ မဟုတ်ကြောင်း ဗိုလ်ချုပ်ဇော်မင်းထွန်းက ပြောကြားသည်။

“မဟုတ်ပါဘူး။ က​မ္ဘောဒီယားက ​တောင်းဆိုတာ မဟုတ်ပါဘူး။ သြစ​တျေးလျနိုင်ငံ နိုင်ငံခြား​ရေးဝန်ကြီးက သူ့ကို ဆက်သွယ်ပြီး​တော့ ကျွန်​တော်တို့ ​ရှောင်တာနယ်ကို လွှတ်​ပေးဖို့ ​ပြောတဲ့အ​ကြောင်း ​ပြော​ပေးပါဆို​တော့ သူ့အ​နေနဲ့ ကျွန်​တော်တို့ကို ​တောင်းဆိုတာ မဟုတ်ပါဘူး။ သူတို့​ပြောတဲ့အတိုင်း ​ပြော​ပေးပါတယ်လို့ ​ပြောတာရှိပါတယ်။ ကျွန်​တော်တို့အ​နေနဲ့လည်း ဥပ​ဒေအရ ​ဆောင်ရွက်စရာ ရှိသမျှ ​ဆောင်ရွက်​​နေပါတယ်။ စဉ်းစား​ပေးပါမယ်။ ဒါပဲ အ​ကြောင်းပြန်ခဲ့တာ ဖြစ်ပါတယ်။ ဗိုလ်ချုပ်မှူးကြီးနဲ့ လာ​တွေ့တုန်းကတည်းက ​ပြောခဲ့တဲ့စကားပါပဲ” ဟု ဗိုလ်ချုပ်ဇော်မင်းထွန်းက ပြောကြားသည်။

သြစတြေးလျနိုင်ငံသား ရှောင်တာနယ်သည် NLD ပါတီအစိုးရလက်ထက် စီးပွားရေးအကြံပေးပုဂ္ဂိုလ်အဖြစ် ဆောင်ရွက်ခဲ့သူဖြစ်ပြီး ၂၀၂၁ ခုနှစ်၊ ဖေဖော်ဝါရီ ၁ ရက်တွင် တပ်မတော်က နိုင်ငံတော်တာဝန်ကို လွှဲပြောင်းရယူပြီးနောက်ပိုင်း ၎င်းကိုလည်း ဖမ်းဆီးထိန်းသိမ်းခဲ့ပြီး အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်၊ စီမံ/ဘဏ္ဍာ ပြည်ထောင်စုဝန်ကြီးဟောင်း ဦးကျော်ဝင်းနှင့် ဦးစိုးဝင်း၊ ဒုတိယဝန်ကြီးဟောင်း ဦးဆက်အောင်တို့နှင့်အတူ မြန်မာနိုင်ငံလျှို့ဝှက်အက်ဥပဒေဖြင့် တရားစွဲဆိုခံထားရသည်။