လန်ဒန်မှာ မွေးခဲ့တဲ့ အင်္ဂလန်သား ဟာရီကိန်းအတွက် စပါးတိုက်စစ်မှူး ဖြစ်လာဖို့၊ အင်္ဂလန် တိုက်စစ်မှူး ဖြစ်လာဖို့က မခက်ခဲသလိုပါပဲ။ (၁၁) နှစ်အရွယ်ကတည်းက စပါးလူငယ်အသင်းကို ရောက်ရှိခဲ့ပြီး (၁၆)နှစ်အရွယ်မှာပဲ အသင်းကြီးဆီ ခေါ်ယူခြင်းခံခဲ့ရပါတယ်။ အင်္ဂလန်အသင်းမှာလည်း သက်တမ်းအလိုက် လူငယ်အသင်းအဆင့်ဆင့်မှာ ရွေးချယ်ခံခဲ့ရသူဖြစ်ပါတယ်။ ဒါပေမဲ့ ဟာရီကိန်းရဲ့ ကစားသမားဘဝက ထင်သလောက်တော့ မချောမွေ့ခဲ့ပါဘူး။ စပါးအသင်းမှာ နေရာအခိုင်အမာရလာတာ ၂၀၁၄-၁၅ ရာသီမှဖြစ်ပြီး အစောပိုင်းမှာ အကြိမ်ကြိမ်အငှားချခံခဲ့ရတာပါ။ ဒီလိုအနေအထားမှာပဲ စပါးအသင်းကို မလွတ်တမ်းဖက်တွယ်ထားခဲ့တာကြောင့် အသင်းအပေါ် သူ့ရဲ့ သံယောဇဉ်ကြီးမားမှုကို မြင်သာပါတယ်။ နောက်ပိုင်း ဆုဖလားအောင်ပွဲတွေနဲ့ ဝေးပြီးရင်းဝေးနေခဲ့ချိန်မှာလည်း ဒီအတိုင်းပါပဲ။ ဒါပေမဲ့ ခုနှစ်တွေ အကြိမ်ကြိမ် ပြောင်းလဲသွားတဲ့နောက် အသက်(၂၈)နှစ် အရွယ်ကို ရောက်လာချိန်မှာတော့ ဟာရီကိန်းက ဆုဖလားလက်မဲ့ဘဝနဲ့ ကစားသမားဘဝ အဆုံးသတ်လိုက်ရမှာကို တွေးကြောက်လာပုံရပါတယ်။