နိုင်ငံတကာပွဲစဉ်တွေအပြီး ဥရောပထိပ်တန်းလိဂ်ပြိုင်ပွဲတွေ ပြန်လည်စတင်ချိန်မှာပဲ စပိန်ထိပ်သီးကလပ် ရီးယဲလ်မက်ဒရစ်အတွက် စိန်ခေါ်မှုတွေ ဖိအားတွေစောင့်ကြိုခဲ့တယ်။ လာလီဂါ၊ ချန်ပီယံလိဂ်နဲ့ စပိန်စူပါဖလားပြိုင်ပွဲတွေရဲ့ လက်ရှိချန်ပီယံအသင်းလည်းဖြစ်၊ ဒီရာသီအစမှာလည်း ဥရောပစူပါဖလားကိုစံချိန်တင် (၆)ကြိမ်မြောက်ရရှိထားတဲ့ ရီးယဲလ်မက်ဒရစ်လိုအသင်းအတွက် ဖိအားတွေရှိပါဦးမလားလို့ထင်နိုင်ပေမယ့် ဒီလိုအောင်မြင်မှုတွေ၊ စွမ်းဆောင်နိုင်မှုတွေကပဲ ထိပ်တန်းကလပ်အသင်းကြီးတွေအတွက် ပိုမိုကြီးမားတဲ့ တာဝန်နဲ့ဖိအားကို ဖြစ်တည်စေခဲ့တာပါ။