ဂျာမနီနှင့် ဘိုင်ယန်မြူးနစ်၏ ဂန္ထဝင်တိုက်စစ်မှူး ဂတ်မူလာသည် ပြီးခဲ့သည့် တနင်္ဂနွေနေ့နံနက်ပိုင်းက ကွယ်လွန်သွားခဲ့ပြီး ကွယ်လွန်ချိန်တွင် အသက်(၇၅)နှစ်ရှိပြီဖြစ်ကြောင်း သိရသည်။
ဂတ်မူလာသည် ၁၉၄၅ ခုနှစ်၊ နိုဝင်ဘာ(၃) ရက်နေ့တွင် မွေးဖွားခဲ့သူဖြစ်ပြီး ၁၉၆၆ ခုနှစ်တွင် အနောက်ဂျာမနီလက်ရွေးစင်အဖြစ် စတင်ရွေးချယ်ခံခဲ့ရသည်။
လက်ရွေးစင်ကစားသမားအဖြစ် (၈)နှစ်သာ ဖြတ်သန်းခဲ့သော်လည်း (၆၂)ပွဲကစားကာ (၆၈)ဂိုး သွင်းယူနိုင်ခဲ့သည်။
ထို့ပြင် ဘိုင်ယန်မြူးနစ်အတွက် (၆၀၇)ပွဲကစားကာ (၅၅၆)ဂိုး သွင်းယူပေးခဲ့သည်။
ထို့ကြောင့် ဘောလုံးသမိုင်းတစ်လျှောက် အကောင်းဆုံးအဆုံးသတ်သမားတစ်ဦးအဖြစ် သတ်မှတ်ထားကြပြီး (၆)ကိုက်စည်းအတွင်းမှ မိုဟာမက်အလီဟုလည်း တင်စားညွှန်းဆိုခဲ့ကြသည်။
ဂတ်မူလာသည် ဘိုင်ယန်မြူးနစ်အသင်းနှင့် ဆု ဖလားအောင်ပွဲများစွာ ရယူနိုင်ခဲ့သလို၊ အနောက်ဂျာမနီအသင်းနှင့်လည်း ယူရို-၁၉၇၂ နှင့် ၁၉၇၄ ကမ္ဘာ့ဖလားချန်ပီယံဆုများ ရယူနိုင်ခဲ့သည်။
ထို့ပြင် Ballon d'Or(၁၉၇၀)အပါအဝင် တစ်ဦးချင်းထူးချွန်ဆုများစွာကိုလည်း ရယူနိုင်ခဲ့ပြီး အမေရိကန်၌ သွားရောက်ကစားခဲ့ဖူးသူလည်းဖြစ်သည်။
ဂတ်မူလာသည် ၂၀၁၅ ခုနှစ်တွင် အယ်လ်ဇိုင်းမားရောဂါ စတင်ခံစားခဲ့ရပြီး (၆)နှစ်အကြာ၌ ကွယ်လွန်ခဲ့ခြင်းဖြစ်သည်။
ဂတ်မူလာကွယ်လွန်ခြင်းအတွက် ဂျာမနီဘောလုံးအဖွဲ့ချုပ်က ''အကြီးကျယ်အခမ်းနားဆုံး ဂျာမန်ဘောလုံးသမားတစ်ဦး ကွယ်လွန်သွားတဲ့အတွက် ဂျာမနီဘောလုံးအဖွဲ့ချုပ်အနေနဲ့ ကြေကွဲဝမ်းနည်းရပါတယ်။ ငြိမ်းချမ်းစွာ အနားယူပါ ဂတ်မူလာ''ဟု Twitter တွင် ရေးသားခဲ့သည်။
ဘိုင်ယန်မြူးနစ်အသင်း၏ ဥက္ကဋ္ဌ ဟာဘတ်ဟိုင်နာက ''ဒီနေ့ဟာ ဘိုင်ယန်မြူးနစ်အသင်းနဲ့ ပရိသတ်တွေအတွက် ကြေကွဲစရာမှောင်မိုက်တဲ့ နေ့တစ်နေ့ပါပဲ။ ဂတ်မူလာဟာ အသင်းရဲ့အကြီးကျယ်အခမ်းနားဆုံး တိုက်စစ်မှှူးတစ်ဦးပါ။ ဂတ်မူလာမပါဘဲ ကျွန်တော်တို့အားလုံး နှစ်သက်မြတ်နိုးရတဲ့ ဘိုင်ယန်မြူးနစ်အသင်း ဖြစ်မလာနိုင်ပါဘူး။ သူ့အမည်နဲ့ သူ့ရဲ့အမှတ်တရတွေဟာ ထာဝရရှင်သန်နေမှာပါ''ဟု ဆိုခဲ့သည်။
ဘိုင်ယန်မြူးနစ်အသင်းကလည်း ဂတ်မူလာအတွက် ဝမ်းနည်းကြောင်း ပြသသည့်အနေဖြင့် အသင်း၏ဝက်ဘ်ဆိုက်နှင့် လူမှုကွန်ရက်စာမျက်နှာများတွင် အနက်ရောင်များ ပြောင်းလဲခဲ့ကြောင်း သိရသည်။
ဂတ်မူလာ ကွယ်လွန်ခြင်းအတွက် ဘောလုံးလောကမှ ဝမ်းနည်းကြေကွဲကြောင်းများ အသီးသီးထုတ်ပြန်ခဲ့ကြရာတွင် ဘိုင်ယန်မြူးနစ်အသင်းကို ကိုင်တွယ်ခဲ့ဖူးသည့် လက်ရှိမန်စီးတီးနည်းပြ ဂွါဒီယိုလာကလည်း ''သူက ဘိုင်ယန်မြူးနစ်နဲ့ ဂျာမနီအသင်းအတွက်တင်မဟုတ်ဘဲ ဘောလုံးလောကတစ်ခုလုံးအတွက် ဂန္ထဝင်ကစားသမားပါ။ ဘောလုံးသမိုင်းရဲ့ အကောင်းဆုံးတိုက်စစ်မှူးလည်း ဖြစ်ပါတယ်။ သူ့ရဲ့မိသားစု၊ သူ့ရဲ့မိတ်ဆွေတွေနဲ့ ဘိုင်ယန်ပရိသတ်တွေနည်းတူ ဝမ်းနည်းရပါတယ်။ ငြိမ်းချမ်းပါစေ ဂတ်မူလာ''ဟု ရေးသားခဲ့သည်။
