မန်စီးတီးနည်းပြ ဂွါဒီယိုလာက အသင်းတွင် ကြံ့ခိုင်မှုပြည့်ဝသည့် ကစားသမား (၁၃)ဦးသာ ရှိပြီး အကယ်ဒမီမှ လူငယ်ကစားသမားများကို အသုံးပြုသွားရန် အသင့်ရှိကြောင်း ပြောကြားခဲ့သည်။
ဂွါဒီယိုလာသည် စက်တင်ဘာ (၂၄)ရက်က ဘုန်းမောက်အသင်းကို (၂-၁)ဂိုးဖြင့် အနိုင်ရခဲ့သည့် Carabao ဖလား တတိယအဆင့်ပွဲစဉ်တွင် ပုံမှန်ပွဲထွက်ကစားသမားအများစုကို လူငယ်ကစားသမားများကို အသုံးပြုခဲ့သည်။
မန်စီးတီးအသင်းတွင် အဓိကတိုက်စစ်မှူး အဂွဲရိုးအပါအဝင် ကစားသမားအများစု ကြံ့ခိုင်မှုပြည့်ဝရန် ရုန်းကန်နေရသည့်အတွက် လာမည့်ရက်သတ္တပတ်များအတွင်း ကစားည့်ပွဲစဉ်များတွင် လူငယ်ကစားသမားများကို အသုံးပြုရဖွယ်ရှိကြောင်း ဂွါဒီယိုလာက ဆိုခဲ့ခြင်းဖြစ်သည်။
ဂွါဒီယိုလာက "ဘုန်းမောက်ကို အနိုင်ရတဲ့ပွဲက လူငယ်ကစားသမားတွေရဲ့ စွမ်းဆောင်မှုဟာ တကယ်ကို ကောင်းပါတယ်။ လက်ရှိအခြေအနေမှာ ကျွန်တော်တို့အနေနဲ့ အကယ်ဒမီထွက်ကစားသမားတွေကို လိုအပ်ပါတယ်။ အသင်းမှာ ကြံ့ခိုင်မှုပြည့်ဝတဲ့ ကစားသမား (၁၃)ဦးသာ ရှိတာကြောင့် လူငယ်ကစားသမားတွေကို ကျွန်တော်တို့ အသုံးပြုရမှာပါ။ ဖိုဒန်၊ အဲရစ်၊ လိန်းဒီလပ်တို့ဟာ အနာဂတ်မှာ အားကိုးရမယ့် ကစားသမားတွေ ဖြစ်ပါတယ်"ဟု ပြောကြားခဲ့သည်။
မန်စီးတီးအသင်းသည် ပရီးမီးယားလိဂ်ပွဲစဉ် (၃)အဖြစ် စက်တင်ဘာ (၂၇)ရက်တွင် လက်စတာအသင်းကို အိမ်ကွင်း၌ လက်ခံကစားရမည်ဖြစ်သည်။
