ဘာစီလိုနာအသင်းခေါင်းဆောင် မက်ဆီကို အခြားကလပ်အသင်းဂျာစီနှင့်မြင်တွေ့ရန် စိတ်ကူးလုံးဝမရှိခဲ့ကြောင်း အသင်းဖော်သစ်ဖြစ်သူ ဂျူဗင်တပ်စ်အသင်းမှ ပြောင်းရွှေ့လာသည့် ယာနစ်က အသင်းနှင့်မိတ်ဆက်ပွဲတွင် မှတ်ချက်ပြုခဲ့သည်။

''မက်ဆီကို အခြားအသင်းတစ်သင်းဂျာစီနဲ့ ဘောလုံးကစားနေတာကို တွေးကြည့်လိုတောင် မရပါဘူး။ ကျွန်တော့်အတွက်တော့ ဒါဟာ ဖြစ်နိုင်စရာလုံးဝမရှိတာပါ။ ကျွန်တော့်ရဲ့မျှော်လင့်ချက်က သူနဲ့အတူ တွဲကစားဖို့ပါ။ ပြီးခဲ့တဲ့နှစ်ရက် သို့မဟုတ် သုံးရက်ခန့်က ကျွန်တော် မက်ဆီနဲ့အတူ တွေ့ဆုံခဲ့ပြီးပါပြီ။ ဒါပေမဲ့ သူနဲ့အတူ လေ့ကျင့်တာမျိုး သို့မဟုတ် တွဲကစားတာမျိုး လုံးဝမရှိသေးပါဘူး။ စီရော်နယ်လ်ဒို၊ တော့တီတို့လို ကစားသမားမျိုးတွေနဲ့ ကျွန်တော် တွဲကစားခဲ့ရတာ ကံကောင်းပါတယ်။ ဒါပေမဲ့ ဒီအသင်းမှာ တစ်သင်းလုံးနဲ့ ပျော်ပျော်ရွှင်ရွှင် ကစားချင်ပါတယ်။ ကျွန်တော်တို့ကစားသမား ၂၅ ဦးစလုံး အရေးကြီးပါတယ်။ အသင်းလိုက်စုစည်းမှုရှိမယ်လို့လည်း ယုံကြည်ပါတယ်''ဟု ယာနစ်က ပြောကြားခဲ့သည်။

မက်ဆီမှာ ယခုနွေရာသီကာလအတွင်း ဘာစီလိုနာအသင်းမှ ထွက်ခွာရန်နီးစပ်ခဲ့ပြီးမှ လက်ကျန်စာချုပ်သက်တမ်းကို အသင်း၌ဆက်လက်ကစားရန် ဆုံးဖြတ်ခဲ့သည်။

ယာနစ်(၃၁ နှစ်)သည် ဂျူဗင်တပ်စ်အသင်းမှ ပြောင်းရွှေ့ကြေး ယူရို သန်း ၆၀+ Add-ons ကြေး ယူရို ငါးသန်းဖြင့် ပြောင်းရွှေ့လာခဲ့ပြီး အပြန်အလှန်အားဖြင့် ဘာစီလိုနာကွင်းလယ်လူ အာသာမှာ ယူရို ၇၂ သန်း+ Add-ons ကြေး ယူရို ၁၀ သန်းဖြင့် ဂျူဗင်တပ်စ်အသင်းသို့ ရောက်ရှိခဲ့သည်။

ထို့ပြင် ၎င်းက ဂျူဗင်တပ်စ်ကဲ့သို့ အံ့အားသင့်စရာကောင်းသည့်အသင်းတစ်သင်းကို စွန့်ခွာရသည်မှာ ခက်ခဲကြောင်းနှင့် ဘောလုံးသမားတစ်ယောက်အနေဖြင့် ပိုမိုအောင်မြင်ရန်နှင့် စိန်ခေါ်မှုသစ်များကို လိုချင်သောကြောင့်သာဖြစ်ကြောင်းလည်း မှတ်ချက်ပြုခဲ့သည်။

ယာနစ်သည် ဘာစီလိုနာနှင့် လေးနှစ်သက်တမ်းရှိစာချုပ် ချုပ်ဆိုခဲ့ပြီး COVID-19 ဗိုင်းရပ်စ်ကူးစက်ခံခဲ့ရရာမှ ပြန်လည်သက်သာလာသူလည်းဖြစ်သည်။

၎င်းအနေဖြင့် ဘာစီလိုနာအသင်းတွင် အင်နီယေစတာ ဝတ်ဆင်ခဲ့သော ကျောနံပါတ် ၈ ဂျာစီကို ဝတ်ဆင်ကစားမည်ဖြစ်ကြောင်း သိရသည်။