ချယ်လ်ဆီးအသင်း၏နည်းပြ လမ်းပတ်က မိမိအနေဖြင့် အဆင့်(၄) နေရာ ရယူပေးရန်အတွက် ရောက်ရှိလာခြင်းမဟုတ်ဘဲ ဆုဖလားအောင်ပွဲများ ရယူပေးရန် ရောက်လာခဲ့ခြင်းဖြစ်သည်ဟု ကြုံးဝါးပြောကြားခဲ့သည်။
လမ်းပတ်သည် ပြီးခဲ့သည့်ရာသီ တွင် ချယ်လ်ဆီးအသင်းနည်းပြအဖြစ် စတင်ခန့်အပ်ခံခဲ့ရပြီး ပရီးမီးယားလိဂ်ပြိုင်ပွဲ၌ အဆင့်(၄)နေရာ ရယူနိုင်ခဲ့သည်။
သို့သော် လာမည့်ရာသီသစ်အတွက် ပြင်ဆင်ရာတွင် ကစား သမားသစ်များစွာ ခေါ်ယူအားဖြည့်နိုင်ခဲ့ပြီးနောက် လမ်းပတ်က ဆုဖလား အောင်ပွဲများအတွက် တိုက်ပွဲဝင်သွားမည်ဟု ပြောကြားခဲ့ခြင်းဖြစ်သည်။
လမ်းပတ်က "ကျွန်တော် ဒီအသင်းကို ရောက်လာတာ အဆင့်(၄)နေရာအတွက် တိုက်ပွဲဝင်ဖို့ ဒါမှမဟုတ် အကယ်ဒမီကစားသမားတွေကို ခေါ်ယူနေရာပေးဖို့ မဟုတ်ပါဘူး။ အောင်ပွဲတွေ ရယူဖို့ ရောက်လာတာပါ။ ပြီးခဲ့တဲ့နှစ်က ကျွန်တော်တို့ ကစားသမားသစ်တွေ မခေါ်နိုင်ခဲ့ပါဘူး။ ဒီနှစ်တော့ ကစားသမားသစ်တွေ ခေါ်နိုင်ခဲ့ပြီဖြစ်သလို၊ ကျွန်တော်တို့ မျှော်လင့်နိုင်တဲ့ နယ်နမိတ်လည်း ကျယ်ပြန့်သွားပါပြီ"ဟု ပြောကြားခဲ့သည်။
သို့သော် လမ်းပတ်က ရာသီအဖွင့်ပွဲတွင် ကစားသမားသစ်(၃)ဦးဖြစ်သော ဇီယာ့ရှ်၊ ချီဝဲလ်နှင့် သီယာဂိုဆေးလ်ဗားတို့ ကြံ့ခိုင်မှုပိုင်းဆိုင်ရာ ပြဿနာများကြောင့် ပါဝင်နိုင်ဦးမည် မဟုတ်ကြောင်းလည်း ဆိုခဲ့သည်။
