ယင်းခြေစမ်းပွဲကို ယခင်က ၂၀၂၂ ကမ္ဘာ့ ဖလားခြေစစ်ပွဲ အုပ်စုနောက်ဆုံးပွဲမတိုင်မီ ကြိုတင်ပြင်ဆင်သည့်အနေဖြင့် ယှဉ်ပြိုင်ကစားရန် စီစဉ်ထားသော်လည်း အာရှဘောလုံး အဖွဲ့ချုပ် (AFC) က ကမ္ဘာ့ဖလားခြေစစ်ပွဲ လက်ကျန်ပွဲများကို လာမည့်နှစ်သို့ ရွှေ့ဆိုင်းခဲ့ရာ မြန်မာ-ဂျော်ဒန်ခြေစမ်းပွဲကိုလည်း ဖျက်သိမ်းခဲ့ခြင်းဖြစ်သည်။
နိုဝင်ဘာ ၆ ရက်တွင် ရန်ကုန်မြို့၌ ယှဉ်ပြိုင်ကစားရန် စီစဉ်ထားသည့် မြန်မာ့လက်ရွေးစင်အသင်းနှင့် ဂျော်ဒန်လက်ရွေးစင်အသင်းတို့၏ ခြေစမ်းပွဲကို နှစ်ဖက်ဘောလုံး အဖွဲ့ချုပ် ညှိနှိုင်းပြီးနောက် ဖျက်သိမ်းလိုက်ပြီ ဖြစ်ကြောင်း သိရသည်။
ယင်းခြေစမ်းပွဲကို ယခင်က ၂၀၂၂ ကမ္ဘာ့ ဖလားခြေစစ်ပွဲ အုပ်စုနောက်ဆုံးပွဲမတိုင်မီ ကြိုတင်ပြင်ဆင်သည့်အနေဖြင့် ယှဉ်ပြိုင်ကစားရန် စီစဉ်ထားသော်လည်း အာရှဘောလုံး အဖွဲ့ချုပ် (AFC) က ကမ္ဘာ့ဖလားခြေစစ်ပွဲ လက်ကျန်ပွဲများကို လာမည့်နှစ်သို့ ရွှေ့ဆိုင်းခဲ့ရာ မြန်မာ-ဂျော်ဒန်ခြေစမ်းပွဲကိုလည်း ဖျက်သိမ်းခဲ့ခြင်းဖြစ်သည်။
မြန်မာနိုင်ငံဘောလုံး အဖွဲ့ချုပ် (MFF) သည် မြန်မာ့လက်ရွေးစင်အသင်း၏ နိုင်ငံတကာခြေစမ်းပွဲကို ဖျက်သိမ်းခဲ့ရသော်လည်း လာမည့်နှစ်တွင်ကစားရမည့် ကမ္ဘာ့ဖလားခြေစစ်ပွဲအပေါ်မူတည်၍ နိုင်ငံတကာခြေစမ်းပွဲများ စီစဉ်ပေးသွားမည်ဖြစ်ကြောင်း သိရသည်။
" ဂျော်ဒန်အသင်းနဲ့ ခြေစမ်းပွဲကို နှစ်ဖက်ဘောလုံးအဖွဲ့ချုပ် ညှိနှိုင်းပြီး ဖျက်သိမ်းလိုက်ပြီဖြစ်ပါတယ်။ ဒီနှစ်ထဲမှာ နိုင်ငံတကာပြိုင်ပွဲယှဉ်ပြိုင်ဖို့မရှိတဲ့အပြင် ကိုရိုနာဗိုင်းရပ်စ်ကြောင့် ပြင်ဆင်တဲ့အပိုင်းမှာရော၊ ကစားရမယ့်နေရာတွေပါ အခက်အခဲရှိတာကြောင့် ဖျက်သိမ်းလိုက်တာဖြစ်ပါတယ်။ လက်ရွေးစင်အသင်းရဲ့ နိုင်ငံတကာ ပြိုင်ပွဲယှဉ်ပြိုင်ရမယ့် ကာလရောက်ရင်တော့ နိုင်ငံတကာခြေစမ်းပွဲကစားနိုင်ဖို့ စီစဉ်ပေးသွားမှာဖြစ်ပါတယ်။ ဒီနှစ်ထဲမှာ နိုင်ငံတကာ ပြိုင်ပွဲနဲ့ ခြေစမ်းပွဲတွေ ကစားဖို့မရှိသေးပါဘူး" ဟု MFF အထွေထွေအတွင်းရေးမှူး ဦးကိုကိုသိန်းက ပြောကြားခဲ့သည်။
