ဘိုင်ယန်မြူးနစ်အသင်းခေါင်းဆောင် နော်ယာက လက်ရှိအသင်းလူစာရင်းသည် ၂၀၁၃ ခုနှစ်တွင် ချန်ပီယံဖြစ်ခဲ့သည့်အသင်းထက် ပိုကောင်းသည်ဟု ပြောကြားခဲ့သည်။
ထို့ပြင် PSG အသင်းနှင့်ကစားရမည့် ချန်ပီယံလိဂ်ဗိုလ်လုပွဲတွင် ယင်းအသင်းထက် သာလွန်အောင်စွမ်းဆောင်သွားမည်ဟုလည်း နော်ယာက ကြုံးဝါးခဲ့သည်။
ဘိုင်ယန်အသင်းသည် ၂၀၁၂-၁၃ ရာသီက အသင်းသမိုင်းတစ်လျှောက် ပထမဆုံးဖလား(၃)လုံးဆွတ်ခူးမှုအဖြစ် ချန်ပီယံလိဂ်ဖလား၊ ဘွန်ဒစ်လီဂါဖလားနှင့် ဂျာမန်ဖလားများ ဆွတ်ခူးရရှိခဲ့သည်။
ယင်းအသင်းမှ လက်ရှိအသင်းတွင်ရှိနေသူများအဖြစ် နော်ယာအပြင် ဘိုတန်၊ အလာဘာနှင့် မူလာသာ ကျန်ရှိတော့ပြီး တိုက်စစ်မှူး လီဝန်ဒေါစကီးမှာ အဆိုပါဗိုလ်လုပွဲတွင် ပြိုင်ဘက် ဒေါ့မွန်အသင်း၌ ကစားနေသူဖြစ်သည်။
(၃၄)နှစ်အရွယ်ရှိပြီဖြစ်သူ နော်ယာသည် လက်ရှိအသင်းလူစာရင်းက ပိုမိုတောင့်တင်းသည်ဟု ယုံကြည်နေပြီး လိုင်ယွန်အသင်းနှင့် ဆီမီးဖိုင်နယ်တွင် အရန်ခုံ၌ထိုင်နေသည့် ဘရာဇီးလ်ကွင်းလယ်ဖန်တီးရှင် ကော်တင်ဟို၊ ကမ္ဘာ့ဖလားချန်ပီယံအသင်းသားများဖြစ်သည့် ဟာနန်ဒက်ဇ်၊ ပါဗာနှင့် တိုလစ်ဆို၊ ဂျာမန်နောက်ခံလူ ဇူလာတို့ကို ထောက်ပြကာ သုံးသပ်ခဲ့ခြင်းဖြစ်သည်။
''၂၀၁၃ နဲ့ခြားနားတာက တစ်သင်းလုံးမှာ ထိပ်တန်းကစားသမား အများအပြားရှိပါတယ်။ အဲဒီတုန်းကတော့ ထိပ်တန်းကစားသမားအနည်းငယ်နဲ့သာ အနိုင်ရခဲ့တာပါ။ (၁၈)ဦးလူစာရင်းမှာလည်း အရည်အသွေးရှိကစားသမားတွေ ကျွန်တော်တို့အသင်းမှာ ရှိပါတယ်။ ဒီလိုကစားသမားတွေကို ကျွန်တော်တို့ ပိုင်ဆိုင်ထားတာဟာ အလွန်ကောင်းပါတယ်''ဟု နော်ယာက ပြောကြားခဲ့သည်။
နော်ယာ၏ဘိုင်ယန်မြူးနစ်အသင်းသည် လက်ရှိတွင် ပြိုင်ပွဲစုံ(၂၀)ပွဲဆက်တိုက် အနိုင်ကစားထားကြောင်း သိရသည်။
