ကိုရိုနာဗိုင်းရပ်စ်ကပ်ဘေးကြောင့် ကိုပါအမေရိကပြိုင်ပွဲအား ၂၀၂၂ ခုနှစ်သို့ ရွှေ့ဆိုင်းခဲ့ခြင်းကို အလွန်စိတ်ပျက်မိကြောင်း မက်ဆီက ဝန်ခံခဲ့သည်။
ကိုပါအမေရိကပြိုင်ပွဲကို အာဂျင်တီးနားနှင့် ကိုလံဘီယာနိုင်ငံတို့က ပူးတွဲအိမ်ရှင်အဖြစ် ယခုနှစ် ဇွန် (၁၂) ရက်မှ ဇူလိုင် (၁၂)ရက်အထိ ကျင်းပရန်စီစဉ်ထားသော်လည်း ကပ်ဘေးကြောင့် ၂၀၂၁ ခုနှစ်သို့ ရွှေ့ဆိုင်းခဲ့ရသည်။
မက်ဆီက ''ကိုပါအမေရိကပြိုင်ပွဲကို တစ်နှစ်ရွှေ့ဆိုင်းလိုက်တဲ့အတွက် ကျွန်တော် အရမ်းစိတ်ပျက်မိပါတယ်။ ဒီပြိုင်ပွဲက ဒီနှစ်မှာ ကျွန်တော့်ရဲ့ အဓိကပွဲဖြစ်ပြီး ရွှေ့ဆိုင်းလိုက်ရတဲ့အတွက် ခံရခက်ပါတယ်။ ဒါပေမဲ့ လိုအပ်လို့လုပ်တာဖြစ်လို့ နားလည်ပါတယ်''ဟု ဆိုခဲ့သည်။
မက်ဆီသည် ကိုပါအမေရိကဖလား ပြိုင်ပွဲတွင် အာဂျင်တီးနားအသင်းနှင့်အတူ (၅) ကြိမ်ပါဝင်ခဲ့ပြီး ဗိုလ်လုပွဲ (၃)ကြိမ်တက်ခဲ့သော်လည်း ဒုတိယသာ ရရှိခဲ့သည်။
၎င်းအနေဖြင့် (၆)ကြိမ်မြောက်ယှဉ်ပြိုင်မည့် ကိုပါအမေရိကပြိုင်ပွဲ ကျင်းပချိန်တွင် အသက်(၃၄)နှစ်ပြည့်လုနီးပါး ဖြစ်နေမည်ဖြစ်သည်။
မက်ဆီသည် လာမည့် ၂၀၂၂ ကာတာကမ္ဘာ့ဖလားပြိုင်ပွဲတွင် သူ၏နောက်ဆုံးနိုင်ငံတကာပြိုင်ပွဲအဖြစ် ယှဉ်ပြိုင်ဖွယ်ရှိကြောင်း သတင်းများက ဖော်ပြခဲ့သည်။
