ကမ္ဘာ့ဘောလုံးအဖွဲ့ချုပ်(ဖီဖာ) သည် အမျိုးသမီးပရိသတ်များ ဘောလုံးကွင်းအတွင်းသို့ ဝင်ရောက်ကြည့်ရှုခွင့်အတွက် ဆွေးနွေးရန် အီရန်နိုင်ငံသို့ လာမည့်ရက်ပိုင်းအတွင်း သွား ရောက်မည်ဖြစ်ကြောင်း အတည်ပြုထုတ်ပြန်ခဲ့သည်။
အီရန်အမျိုးသမီးပရိသတ်တစ်ဦးသည် ဘောလုံးကွင်းအတွင်းသို့ ဝင်ရောက်ခဲ့ခြင်းအတွက် ဖမ်းဆီးထိန်းသိမ်းခံရခြင်းကို မကျေမနပ်ဖြစ်ကာ တရားရုံးရှေ့မှာပင် မိမိကိုယ်ကိုယ် မီးရှို့ခဲ့ပြီးနောက် ပြီးခဲ့သည့်စက်တင်ဘာ(၈)ရက်က ဆေးရုံ၌ သေဆုံးခဲ့သည်။
ဆာဟာကိုဒါရီအမည်ရှိ အသက်(၂၉)နှစ်အရွယ် အဆိုပါအမျိုးသမီးသည် ပြီးခဲ့သည့်မေလက ၎င်းအားပေးသည့် အက်စတီဟယ်လ်အသင်း၏ ပွဲတစ်ပွဲကို အမျိုးသားအ ယောင်ဆောင်ကာ ကွင်းအတွင်းသို့ ဝင်ရောက်ခဲ့ခြင်းအတွက် ထောင်ဒဏ် (၆)လကျခံရမည်ဖြစ်၍ ယင်းကဲ့သို့ အဆုံးစီရင်ခဲ့ခြင်းဖြစ်သည်။ ယင်းဖြစ်ရပ်အတွက် ဆွေးနွေးမှုပြုလုပ်ရန် ဖီဖာက စီစဉ်နေခြင်းဖြစ်သည်။
ဖီဖာက "အောက်တိုဘာလမှာ ကစားမယ့် အီရန်ရဲ့ကမ္ဘာ့ဖလားခြေစစ်ပွဲမှာ အမျိုးသမီးပရိသတ်တွေ ကွင်းထဲဝင်ခွင့်ရရှိရေးအတွက် ဆွေးနွေးဖို့ ကိုယ်စားလှယ်အဖွဲ့တစ်ဖွဲ့ကို စေလွှတ်သွားမှာပါ"ဟု ထုတ်ပြန်ခဲ့သည်။
အီရန်နိုင်ငံသည် ၁၉၈၁ ခုနှစ်ကတည်းက အမျိုးသမီးများအားဘောလုံးကွင်းနှင့် အခြားအားကစားကွင်းများသို့ ဝင်ရောက်ကြည့်ရှုခွင့် ပိတ်ပင်ထားသည်။
