ရီးယဲလ်မက်ဒရစ်အသင်းတိုက်စစ်မှူး ဘန်ဇီမာသည် တံကောက်ကြောဒဏ်ရာကြောင့် ယခုရာသီကုန်အထိအနားယူရဖွယ်ရှိနေကြောင်း သိရသည်။

ဘန်ဇီမာသည် နည်းပြဇီဒန်းလက်အောက်တွင် ခြေစွမ်းပြကစားနေသူဖြစ်ပြီး ဧပြီ (၂၆)ရက်က ဂီတာဖေးကို (၀-၀)ဂိုးဖြင့်သရေကျသည့်ပွဲ၌ ပွဲချိန်ပြည့်ပါဝင်ခဲ့သူလည်းဖြစ်သည်။

သို့သော် ဘန်ဇီမာသည် စနေနေ့က ပြုလုပ်ခဲ့သည့် အသင်း၏ လေ့ကျင့်ရေးအစီအစဉ်ကို တံကောက်ကြောဒဏ်ရာကြောင့် ပျက်ကွက်ခဲ့ကြောင်းသိရသည်။

ရီးယဲလ်မက်ဒရစ်အသင်း၏ ထုတ်ပြန်ချက်တွင် ''ဘန်ဇီမာရဲ့ အခြေအနေကို စမ်းသပ်ကြည့်တဲ့အခါ တံကောက်ကြောမှာ ကြွက်သားဒဏ်ရာရနေတာကို တွေ့ရပါတယ်။ သူဘယ်လောက်အနားယူရမယ်ဆိုတာတော့ အတည်မပြုနိုင်သေးပါဘူး။ ဆက်လက်ပြီး စစ်ဆေးရဦးမှာပါ'' ဟုပါရှိသည်။

အသက် (၃၁)နှစ်အရွယ်ရှိ ပြင်သစ်တိုက်စစ်မှူး ဘန်ဇီမာသည် ယခုရာသီတွင် ရီးယဲလ်မက်ဒရစ်အသင်းအတွက် ခြေစွမ်းပြကစားနေသူဖြစ်ပြီး အသင်းအတွက်ပြိုင်ပွဲစုံ (၅၁)ပွဲတွင် ဂိုး (၃၀)အထိသွင်းယူထားသလို၊ လာလီဂါပြိုင်ပွဲတွင်လည်း (၂၁)ဂိုးသွင်းယူပေးထားသူဖြစ်သည်။