ဝူရှူးကြေးတံဆိပ်ရ ငြိမ်းချမ်းကိုကို (ဓာတ်ပုံ-ညီညီစိုးညွန့်)

အာရှအားကစားပြိုင်ပွဲတွင် ဝင်ရောက် ယှဉ်ပြိုင်နေသည့် မြန်မာအားကစားအဖွဲ့ သည် သြဂုတ် ၂၇ ရက်ပွဲစဉ်များအပြီးအထိ ကြေးတံဆိပ်နှစ်ခုသာရသေးပြီး ၁၉၉၄ ဟီရို ရှီးမား အာရှအားကစားပြိုင်ပွဲနောက်ပိုင်း အဆိုးရွားဆုံးဆုတံဆိပ်ရရှိမှု မကြုံတွေ့ရစေ ရန်အတွက် လက်ကျန်ပွဲများတွင် ဆုတံဆိပ် ရယူနိုင်ရန် လိုအပ်နေကြောင်း သိရသည်။

မြန်မာအားကစားအဖွဲ့သည် အာရှအား ကစားပြိုင်ပွဲကျင်းပသည့် ၁၉၅၁ ခုနှစ်မှစ၍ ဝင်ရောက်ယှဉ်ပြိုင်ခဲ့ပြီး ၂၀၁၄ အာရှအား ကစားပြိုင်ပွဲအထိ ရွှေ ၁၆ ခု၊ ငွေ ၃၁ ခု၊ ကြေး ၅၅ ခုရရှိထားသည်။

မြန်မာအားကစားအဖွဲ့ သည် ပြိုင်ပွဲသက်တမ်းတစ်လျှောက် ၁၉၈၂ ပြိုင်ပွဲတွင် ဆုတံဆိပ်တစ်ခုမျှ ရယူနိုင်ခြင်းမရှိ  ဘဲ ယင်းနောက်ပိုင်းတွင် အဆိုးရွားဆုံးမှတ် တမ်းအဖြစ် ၁၉၉၀ နှင့် ၁၉၉၄ ပြိုင်ပွဲတွင် ကြေးတံဆိပ်နှစ်ခုသာ ရယူနိုင်ခဲ့သည်။

ကြေးတံဆိပ်တစ်ခုရယူထားသည့် မြန်မာပိုက်ကျော်ခြင်းအသင်း (ဓာတ်ပုံ-ညီညီစိုးညွန့်)

လက်ရှိ (၁၈) ကြိမ်မြောက် အာရှအားကစားပြိုင်ပွဲ တွင်လည်း သြဂုတ် ၂၇ ရက်အထိ ကြေးတံဆိပ် နှစ်ခုသာရထားရာ လက်ကျန်ပြိုင်ပွဲများတွင် ဆုတံဆိပ်ရယူနိုင်ခြင်းမရှိပါက ၁၉၉၄ ခုနှစ် နောက်ပိုင်း အဆိုးရွားဆုံးဆုတံဆိပ်ရရှိမှုနှင့် ပြန်လည်ကြုံတွေ့ရမည်ဖြစ်သည်။

မြန်မာအား ကစားအဖွဲ့သည် လက်ကျန်ရက်များတွင် ပြိုင်ပွဲအမျိုးအစားသုံးမျိုးသာ ယှဉ်ပြိုင်ရန် ကျန်ရှိတော့ပြီး ပိုက်ကျော်ခြင်း လေးယောက် တွဲအမျိုးသားပြိုင်ပွဲနှင့် အမျိုးသမီးပြိုင်ပွဲ၊ ကနူး^ကယက်ပြိုင်ပွဲတစ်ပွဲ ယှဉ်ပြိုင်ရမည် ဖြစ်သည်။

ယင်းပြိုင်ပွဲအမျိုးအစားသုံးမျိုး အနက် ပိုက်ကျော်ခြင်းပြိုင်ပွဲတွင်သာ ဆု တံဆိပ်ရယူနိုင်ရန် အလားအလားရှိနေပြီး အကယ်၍ ဆုတံဆိပ်ရယူနိုင်ခြင်းမရှိပါက နှစ်ပေါင်း ၂၀ ကျော်အကြာတွင် ဆုတံဆိပ် ရရှိမှုမှတ်တမ်းဆိုးနှင့် ကြုံတွေ့ရမည်ဖြစ် သည်။

မြန်မာအားကစားအဖွဲ့သည် ၁၉၉၈ ခုနှစ်မှ ၂၀၁၄ ခုနှစ်အထိ ကျင်းပခဲ့သည့် ပြိုင်ပွဲငါးကြိမ်တွင် ၂၀၀၆ ဒိုဟာ အာရှအားကစားပြိုင်ပွဲတစ်ကြိမ်သာ ရွှေဆုနှင့်လွဲချော် ခဲ့ပြီး ကျန်အကြိမ်များတွင် ရွှေဆုရယူနိုင်ခဲ့သည်။

၂၀၁၀ နှင့် ၂၀၁၄ အာရှအားကစား ပြိုင်ပွဲတွင် နှစ်ကြိမ်ဆက်တိုက် ရွှေတံဆိပ်ရယူ နိုင်ခဲ့သည့် မြန်မာပိုက်ကျော်ခြင်းအသင်း သည် လေးယောက်တွဲပြိုင်ပွဲတွင် ဆုရယူနိုင် ရန် အလားအလာကောင်းနေသည်။