၂၀၁၇ မလေးရှား ဆီးဂိမ်းစ်ပြိုင်ပွဲတွင် ရွှေတံဆိပ်ရရှိခဲ့သည့် မြန်မာခြင်းလုံးအသင်း အောင်ပွဲခံနေစဉ် (ဓာတ်ပုံ - ညီညီစိုးညွန့်)
ဖိလစ်ပိုင်အိုလံပစ်ကော်မတီသည် ၂၀၁၉ ခုနှစ်တွင် ကျင်းပမည့် အကြိမ် (၃၀) မြောက် ဆီးဂိမ်းစ်ပြိုင်ပွဲ၌ ထည့်သွင်းကျင်းပမည့် အားကစားနည်း ၃၀ အား စတင်အဆိုပြုခဲ့ကြောင်း သိရသည်။
ဆီးဂိမ်းစ်ပြိုင်ပွဲနှင့် ပတ်သက်သည့် ပထမအကြိမ် အစည်းအဝေးကို ပြီးခဲ့သည့် ရက်ပိုင်းက ဖိလစ်ပိုင်နိုင်ငံ၌ ကျင်းပရာ မြန်မာနိုင်ငံ အိုလံပစ်ကော်မတီ၊ ကျန်းမာရေး အားကစားဝန်ကြီးဌာနမှ တာဝန်ရှိသူများ တက်ရောက်ခဲ့သည်။ ယင်းအစည်းအဝေးတွင် အရှေ့တောင်အာရှ နိုင်ငံ ၁၁ နိုင်ငံမှ တာဝန်ရှိသူများ တက်ရောက်ခဲ့ပြီး အိမ်ရှင်ဖိလစ်ပိုင်နိုင်ငံမှ အဆိုပြုသည့် အားကစားနည်းများတွင် ပြိုင်ပွဲအမျိုးအစားများ ထပ်တိုးခြင်း၊ အားကစားနည်းသစ်များ ထပ်တိုးကျင်းပရန် တောင်းဆိုနိုင်မည် ဖြစ်သည်။ ဖိလစ်ပိုင်နိုင်ငံက အဆိုပြုထားသည့် အားကစားနည်းများတွင် ၎င်းတို့အား သာသည့် တိုက်ခိုက်ရေး အားကစားနည်းများ အပြင် Dancesport ၊ Arnis ၊ Kurah စသည့် အားကစားနည်းများကို ထည့်သွင်းကျင်းပရန် စီစဉ်ထားသည်။ မြန်မာအားကစားအဖွဲ့ ရွှေ တံဆိပ်မျှော်မှန်းနိုင်သည့် လှေလှော်အားကစားနည်းမှာ ပါဝင်လာခြင်းမရှိဘဲ မြန်မာနိုင်ငံအပါအဝင် နိုင်ငံအချို့ပူးပေါင်း၍ တောင်းဆိုသွား ဖွယ်ရှိနေသည်။ မြန်မာနိုင်ငံအိုလံပစ်ကော်မတီသည် လှေလှော်အားကစားနည်းမှ ရိုးရာ လှေ၊ အပြည်ပြည်ဆိုင်ရာလှေနှင့် ကနူး/ကယက်ပြိုင်ပွဲအမျိုးအစား သုံးခုစလုံးပါဝင်လာရန် တောင်းဆိုမည်ဖြစ်ပြီး ပြိုင်ပွဲဝင်နိုင်ငံများအနေဖြင့် တောင်းဆိုလိုသည့် အားကစားနည်းများကို ဇွန် ၁၃ ရက် နောက်ဆုံးထား၍ ပေးပို့ရမည်ဖြစ်သည်။ ဖိလစ်ပိုင်အိုလံပစ်ကော်မတီသည် ပြိုင်ပွဲဝင်နိုင်ငံများ တောင်းဆိုသည့် အားကစားနည်းအချို့ကို ထပ်တိုးပြီး အားကစားနည်း ၃၀ ကျော်ဖြင့် ကျင်းပဖွယ် ရှိနေသည်။ လှေလှော်အားကစားနည်းသည် ၂၀၁၇ ခုနှစ်က မလေးရှားနိုင်ငံ၌ ကျင်းပသည့် (၂၉) ကြိမ်မြောက် ဆီးဂိမ်းစ်ပြိုင်ပွဲတွင်လည်း ပါဝင်ခဲ့ခြင်းမရှိဘဲ ဖိလစ်ပိုင်ဆီးဂိမ်းစ်တွင် ထပ်မံမပါဝင်ပါက မြန်မာအားကစားအဖွဲ့ အနေဖြင့် ရွှေတံဆိပ်ရရှိမှု လျော့ကျသွားဖွယ် ရှိနေသည်။
(၂၉) ကြိမ်မြောက် မလေးရှားဆီးဂိမ်းစ်ပြိုင်ပွဲတွင် မြန်မာနိုင်ငံအနေဖြင့် ရွှေခုနစ်ခု၊ ငွေ ၁၀ ခု၊ ကြေး ၂၀ ခုဖြင့် နိုင်ငံအလိုက် ဆု ရရှိမှုတွင် အဆင့် (၇) နေရာ၌ ရပ်တည်ခဲ့သည်။ မြန်မာအားကစားအဖွဲ့အတွက် ရွှေဆုများကို ပိုက်ကျော်ခြင်းအသင်း၊ ခြင်းလုံးအသင်းနှင့် ဝူရှူးအဖွဲ့တို့မှ နှစ်ခုစီ၊ သေနတ်ပစ်အဖွဲ့မှ တစ်ခုတို့ ရရှိခဲ့သည်။ မလေးရှားဆီးဂိမ်းစ် ပြိုင်ပွဲတွင် အိမ်ရှင်မလေးရှားက နိုင်ငံအလိုက် ပထမနေရာတွင် ရပ်တည်ခဲ့သည်။
ဖိလစ်ပိုင်အိုလံပစ်ကော်မတီ အဆိုပြုထားသည့် အားကစားနည်းများ
ပြေးခုန်ပစ်၊ ရေကူး၊ မြားပစ်၊ ကြက်တောင်၊ ဘေ့စ်ဘော/ Soft Ball ၊ ဘတ်စကက်ဘော၊ ဘိလိယက်၊ ဘိုးလင်း၊ လက်ဝှေ့၊ စက်ဘီး၊ မြင်းစီး/ပိုလို၊ ဓားရေး၊ ဘောလုံး၊ ဂေါ့ဖ်၊ ကျွမ်းဘား၊ ဂျူဒို/ဂျူဂျစ်ဆု၊ ကရာတေး၊ ရွက်လှေ၊ ပိုက်ကျော်ခြင်း/ခြင်းလုံး၊ သေနတ်ပစ်၊ Squash ၊ တိုက်ကွမ်ဒို၊ သုံးမျိုးစုံ၊ ဘော်လီဘော၊ အလေးမ၊ နပန်း/Kurash ၊ ဝူရှူး၊ Arnis ၊ Dancesport ၊ မွေလက်ဝှေ့
