လှိုင်သာယာစက်မှုဇုန်တွင် စက်ရုံ ၁၄ ရုံ ပိတ်သိမ်းခဲ့သည်နှင့်ပတ်သက်ပြီး လူမှုကွန်ရက်စာမျက်နှာတွင် ပျံ့နှံ့ခဲ့သည်။ အဆိုပါကိစ္စအား လှိုင်သာယာစက်မှုဇုန် ဥက္ကဋ္ဌမှ ရန်ကုန်တိုင်းဒေသကြီးလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီအား စာပေးပို့ခဲ့ပြီး ယင်းကော်မတီမှဖြစ်စဉ်နှင့် ပတ်သက်ပြီးလေ့လာမှုများ ပြုလုပ်ခဲ့သည်။ လေ့လာမှုများပြုလုပ်ခဲ့သည့် ဘဏ္ဍာရေး၊ စီမံကိန်းနှင့် စီးပွားရေးကော်မတီဥက္ကဋ္ဌ ဒေါ်စန္ဒာမင်းအား တွေ့ဆုံမေးမြန်းခဲ့သည်များကို ပြန်လည်ဖော်ပြအပ်ပါသည်။

‘ဌာနကပို့တဲ့စာရင်းကိုပဲ အပေါ်ကထိုင်ပြီးတော့ ဖတ်နေမယ်ဆိုရင်တော့ မြေပြင်အခြေအနေ အများကြီးကွာနေမှာပါ’

■မေး -          လှိုင်သာယာကစက်ရုံတွေ ပိတ်သိမ်းတယ်ဆိုတဲ့ ကိစ္စကို ဆရာမတို့ကော်မတီက ဘယ်လိုစသိတာလဲ။

■ ဖြေ- မကြာသေးမီကပဲ လှိုင်သာယာစက်မှုဇုန် တစ်ခုတည်းမှာပဲ သတင်းလာပို့တာက စက်ရုံ ၁၄ ရုံအခြေအနေနဲ့ ပတ်သက်ပြီးတော့ မကြာခင်မှာ ပိတ်သိမ်းတော့မယ်ဆိုတဲ့ စက်ရုံရှိတယ်။ ပိတ်သိမ်းသွားတဲ့ စက်ရုံတွေရှိတယ်ဆိုပြီးတော့ ဇုန်ဥက္ကဋ္ဌ တွေကအကြောင်းကြားလာတာ ရှိပါတယ်။ ဘာကြောင့်ပိတ်သိမ်းသွားတယ်ဆိုတာကို ဇူလိုင် ၂၄ ရက် စက်မှုဇုန်ရဲ့ ကနောင်ခန်းမမှာ ဇုန်ဥက္ကဋ္ဌရယ်၊ ပိတ်သိမ်းသွားပြီးဆိုတဲ့ စက်ရုံတွေကပိုင်ရှင်တွေ၊ တာဝန်ခံတွေ ဆက်သွယ်လို့ရသလောက် စက်ရုံရှစ်ရုံကျော်က လာပြီးတော့ ဖြေသွားပါတယ်။ ဖြေသွားတဲ့အထဲမှာ ကျွန်မတို့ ဘဏ္ဍာရေး၊ စီမံကိန်းစီးပွားရေးကော်မတီရဲ့ ရည်ရွယ်ချက်က စက်ရုံတွေပိတ်သိမ်းသွားတယ်လို့ အဲဒီလာပြီးသတင်းလာပေးတဲ့အချိန်မှာ ဒီစက်ရုံတွေကနိုင်ငံရဲ့ SME နဲ့ ပတ်သက်တဲ့စက်ရုံတွေ ဖြစ်တယ်။ SME အဆင့်ရှိတဲ့စက်ရုံတွေ ဘာကြောင့် ပိတ်သိမ်းသွားတာလဲဆိုတဲ့ဟာကို သိဖို့လိုပါတယ်။ ဘာကြောင့်ပိတ်သိမ်းသွားလဲဆိုတဲ့ အဖြေကိုသိမှ ကျွန်မတို့ရဲ့ ရန်ကုန်တိုင်းဒေသကြီးအစိုးရ၊ ရန်ကုန်တိုင်းဒေသကြီး လွှတ်တော်အနေနဲ့ သူတို့အပေါ်မှာ ဘယ်လောက်ကူညီပံ့ပိုးပေးရမလဲဆိုတဲ့ဟာမျိုး အဖြေကို ရှာလို့ရမှာ ဖြစ်ပါတယ်။ ဒါမှမဟုတ်ဘဲ စက်ရုံကတော့ ၁၄ ရုံလောက်ပါပဲ။ လှိုင်သာယာစက်မှုဇုန်တစ်ခုတည်းကိုပဲ စက်ရုံပေါင်း ၇၀၀ ကျော်ရှိပါတယ်။ အဲဒီတော့ဒီ ၇၀၀ ကျော်ထဲမှာ ၁၄ ရုံလောက်ပိတ်လိုက်တယ်ဆိုတာ ဘာမှမထူးဘူးလို့ တွေးလို့လည်းရပါတယ်။ ကျွန်မတို့ စီးပွားရေးတစ်ခုတည်းကိုပဲ ကြည့်မယ်ဆိုရင်တိုင်းဒေသကြီး အစိုးရဘက်က ကြည့်မယ်ဆိုရင် ရန်ကုန်တိုင်းတစ်တိုင်းလုံးမှာ မြို့နယ် ၄၅ မြို့နယ်ရှိပါတယ်။ ဒီ ၄၅ မြို့နယ်ထဲမှာပဲ သီလဝါအပါအဝင် စက်မှုဇုန် ပေါင်း ၂၉ ဇုန်ရှိပါတယ်။ ဒီ ၂၉ ဇုန်မှာ စက်ရုံပေါင်း ဘယ်လောက်ဆိုတာ အတိအကျမသိပေမဲ့ ထောင်နဲ့သောင်းနဲ့ရှိတယ်ဆိုတဲ့ အခြေအနေမှာစက်ရုံ ၁၄ရုံပိတ်လိုက်လို့ ကျွန်မတို့ စီးပွားရေး မကျသွားပါဘူ။ ဒါက အစိုးရတစ်ရပ်အနေနဲ့ အပေါ်က ကြည့်မယ်ဆိုရင် macromanagement လို့ ခေါ်ပါတယ်။ macroeconomies ၊ macromanagement ၊ မက်ကရို စီးပွားရေးနဲ့ကြည့်မယ်ဆိုရင် ထောင်နဲ့သောင်းနဲ့ စက်ရုံတွေထဲမှာ စက်ရုံ ၁၄ ရုံပိတ်သွားတာ ရန်ကုန်တိုင်းဒေသကြီးရဲ့ စီးပွားရေးကို ဘာမှစိုးရိမ်စရာမရှိဘူး။ ကျဆင်းသွားမယ်ဆိုတာလည်း မဟုတ်ဘူး။ ဒါပေမဲ့ ကျွန်မတို့ ဘဏ္ဍာရေး၊ စီမံကိန်းနှင့် စီးပွားရေးကော်မတီ  လွှတ်တော်ရဲ့ကော်မတီတစ်ရပ် အနေနဲ့ ဒီစက်ရုံ ၁၄ ရက် ဘာကြောင့် သေသေချာချာ သွားရောက်စစ်ဆေးသလဲဆိုတော့ ကျွန်မတို့က micromanagement လုပ်တာပါ။ microeconomies ကို အလေးထားတယ်။ တစ်ရုံချင်း၊ တစ်ဦးချင်း၊ လုပ်ငန်းရှင်တစ်ဦးချင်းကို ကျွန်မတို့ စိတ်ဝင်စားတယ်။ အလေးထားတယ်။ micro  ကိုမှ ကျွန်မတို့ နိုင်နိုင်နင်းနင်း မအောင်မြင်နိုင်ဘူးဆိုရင် macro မှာ အောင်မြင်ဖို့ အခြေအနေ မရှိဘူး။ micro တွေတစ်ခုချင်းလဲသွားရင် macro မအောင်မြင်ဘူး။ ရန်ကုန်တိုင်းဒေသကြီးအစိုးရရဲ့ အကြည့် macroeconomies ၊ macromanagement ဖြစ်တယ်။ တိုင်းလွှတ်တော်ကော်မတီတစ်ရပ်အနေနဲ့က micromanagement ကြည့်ပါတယ်။

■မေး -          ပိတ်သိမ်းခဲ့တယ်ဆိုတဲ့ စက်ရုံ ၁၄ ရုံကို ကွင်းဆင်းစစ်ဆေးတဲ့အခါမှာ ဘယ်လိုအချက်တွေကြောင့် ပိတ်သိမ်းခဲ့တာပါသလဲ။

■ ဖြေ - ကျွန်မတို့ကစက်ရုံ ၁၄ ရုံကိစ္စကို ကော်မတီအနေနဲ့ sensitive ဖြစ်ပါတယ်။ ဒါကြောင့် ကျွန်မတို့အနေနဲ့ ဒီ ၁၄ ရုံမှာ ဆက်သွယ်လို့ရ သမျှလုပ်ငန်းရှင်တွေကိုတွေ့တယ်။ တွေ့တဲ့အခါမှာ အဖြေတွေရတယ်။ တချို့ကတော့ လုံးဝဆက်သွယ်လို့ မရတော့ဘူး။ ဒီနေရာမှာ စက်ရုံလည်း လုံးဝမရှိတော့ဘူး။ အားလုံးပြောင်းရွှေ့သွားပါတယ်။

ပုလဲအထည်ချုပ်စက်ရုံက လာဖြေတာက အခုချိန်မှာ သူ့မှာ အလုပ်သမားက ၆၉၀ ရှိပါတယ်။ သူတို့က နာမည်နှစ်ခုနဲ့လုပ်ထားတဲ့ ပုလဲအထည်ချုပ်စက်ရုံနဲ့ မြန်မာဧပရယ်ဆိုပြီးတော့ MIC မှာနာမည်နှစ်ခုနဲ့ တင်ထားတာဖြစ်တဲ့အတွက် ပုလဲအထည်ချုပ်စက်ရုံဆိုတာကို မသုံးတော့ဘဲနဲ့ မြန်မာဧပရယ်စက်ရုံဆိုပြီးတော့ ဆက်လက်ရပ်တည်နေပါတယ်လို့ ဖော်ပြသွားပါတယ်။  ဝါးဟားဟားရေခဲမုန့်ကတော့ လုံးဝပိတ်သိမ်းပြီးဆိုတာကို ၂၅ ရက် ၆ လ ၂၀၁၈ ခုနှစ်မှာ လုံးဝပိတ်သိမ်းသွားပြီဆိုတာကို  သိရပါတယ်။ မီးချောင်းပီနံ အိတ်စက်ရုံကတော့ အလုပ်သမား ၁၀၁ ယောက်ရှိပါတယ်။ ၃ ရက် ၅ လ ၂၀၁၈ ကပဲ ပိတ်သိမ်းသွားပါတယ်။ ဘာကြောင့် ပီနံအိတ် စက်ရုံပိတ်သိမ်းသွားရသလဲဆိုတော့ တရုတ်က ဝင်လာတဲ့ဈေးပေါတယ်။ ကွာလတီ ညံ့တယ်ဆိုတဲ့ ပီနံအိတ်တွေကို မယှဉ်နိုင်ပါဘူး။ သူတို့ထုတ်လုပ်တဲ့ ပီနံအိတ်စက်ရုံက နှစ်တင်းဝင်အိတ်ကိုပဲ ရာသီချိန်ပဲ သုံးရပါတယ်။ ကော်စေ့အသစ်တွေနဲ့ ထုတ်လုပ်ထားပြီးတော့ ဈေးပေါပေါနဲ့မဟုတ်ဘဲနဲ့ ကွာလတီမြင့်ပြီးတော့ ဈေးမြင့်ပါတယ်တဲ့ ဒါကြောင့် တရုတ်ကဝင်ရောက် ပီနံအိတ်တွေကို ယှဉ်ပြိုင်နိုင်စွမ်းမရှိဘူးဖြစ်တဲ့ ပိတ်သိမ်းလိုက်တယ်လို့ ပြောပါတယ်။  မြို့မဆင်ဖြူတော် ပဲသန့်စင်စက်ရုံက ကိုယ်ပိုင်စက်ရုံမဟုတ်ဘဲနဲ့ ငှားပြီးလုပ်တာဖြစ်တယ်။ ပဲဆန်ခါချတဲ့လုပ်ငန်းကိုပဲ လုပ်တာဖြစ်တယ်တဲ့ နဝလီလုပ်တာပဲ ဖြစ်တယ်။ စက်ရုံတွေကို လွန်ခဲ့တဲ့တစ်နှစ်ခွဲက အခုချိန်အထိ စက်ကို နဝလီလာမအပ်ဘူးဖြစ်တဲ့ လွန်ခဲ့တဲ့ တစ်နှစ်ခွဲလောက်ကိုက စက်ရုံပိတ်သိမ်းပါတယ်။ အခုချိန်မှာလည်း စက်တွေကို အားလုံးရောင်းစားလိုက်ပါပြီတဲ့ အခုချိန်မှာ မြို့မဆင်မတော်က ၂၉ ရက် ၆ လ ၂၀၁၈ မှာက တည်းက ပိတ်သိမ်းစာရင်းပြလိုက်ပါပြီး။ ယူကေခြေအိတ်စက်ရုံက စံချိန်တွေ မထွက်ဘူး။ နည်းပညာတွေနိမ့်ပါတယ်။ ခြေအိတ်အပျက် အစီးတွေ တအားများနေတယ်။ အဓိကတော့ မီးခဏခဏပျက်တဲ့အတွက် မရပ်တည်နိုင်တာ ဖြစ်ပါတယ်တဲ့။ မီးစက်ရှိတယ်။ ဒါပေမဲ့ မီးပြတ်တဲ့အချိန်နဲ့ မီးစက်နှိုးတဲ့အချိန်မှာပျက်သွားတဲ့ အရေအတွက်က တအားများတာဖြစ်တဲ့အတွက် သူတို့တွေ မထိန်းသိမ်းနိုင်တော့ဘူး။ ကြိုးစားပြီးတော့ ယခုချိန်အထိတော့ ရပ်တည်နေပါတယ်။ ၁၂ လပိုင်းအထိတော့ သူတို့မှာ လိုင်စင်သက်တမ်း ရှိပါသေးတယ်။ သူတို့ပိတ်သိမ်းမယ်ဆိုရင်တော့ ကျွန်မတို့ကို အကြောင်းကြားမယ်လို့ ပြောပါတယ်။ အလုပ် သမားက ၃၆၁ ယောက်ရှိပါတယ်။

ရေခဲတောင်အအေးခန်းက နဝလီပဲ လက်ခံတာဖြစ်တယ်။ သူ့ကိုပစ္စည်းလာရောက် အပ်နှံကျဆင်းလာတဲ့အတွက်  ၄ ရက် ၆လ ၂၀၁၈ ရက်နေ့မှာ ပိတ်သိမ်းလိုက်ပြီ ဖြစ်ပါတယ်။ မြတ်ပန်းမွှေးသနပ်ခါးစက်ရုံကတော့ စက်ရုံထဲမှာစက်တွေလည်း မရှိတော့ဘူး။ အလုပ်သမားတွေလည်း မရှိတော့ဘူး။ လုပ်ငန်းရှင်ကို ဆက်သွယ်လို့မရတဲ့အတွက် စက်ရုံမြေပိုင်ရှင်ကိုပဲ တွေ့ဆုံတဲ့အခါမှာ စက်ရုံငှားပြီးလုပ်တာ ဖြစ်ပါတယ်။ သူတို့တွေ ထွက်သွားတာ ၄ ရက် ၆ လ ၂၀၁၈ ရက်နေ့ပဲ ပိတ်သိမ်းစာရင်းကို ထည့်လိုက်ပါပြီးတဲ့ မြတ်ပန်းမွှေးသနပ်ခါးဟာ အလုပ်သမား ၄၉ ယောက် ရှိပါတယ်။ ChamZon အထည်ချုပ်စက်ရုံကတော့ အလုပ်သမား ၃၈၀ ရှိတယ်။ ၄ ရက် ၆ လ ၂၀၁၈ ခုနှစ်မှာပဲ ပိတ်သိမ်းစာရင်းကို တင်ပြလိုက်ပါတယ်။ အဓိကကတော့ သူတို့ ပိတ်သိမ်းပြီးတော့ မူလပိုင်ရှင်မရှိတော့ဘူး။ အဲဒီနေရာမှာ နောက်တစ်ဦးကို ငှားထားပြီးတော့ စက်ရုံပိုင်ရှင်အသစ်၊ နာမည်အသစ်နဲ့ လည်ပတ်နေတာကို တွေ့ရပါတယ်။ Success Time ဖိနပ်စက်ရုံက ၄ ရက် ၆ လ ၂၀၁၈ ရက်နေ့မှာ လုံးဝပိတ်သိမ်းလိုက်ရပါတယ်။ နောက်ပြီးတော့ သိပ်မကြာခင်အချိန်မှာပဲ ပိုင်ရှင်အသစ်တစ်ယောက်က ဒေါင်ဟိုး ဖိနပ်စက်ရုံအဖြစ်နဲ့ ပြန်ဖွင့်နေပါတယ်။ စက်ရုံပိုင်ရှင်အသစ်၊ အလုပ်သမားအသစ် လည်ပတ်နေတာကို တွေ့ရပါတယ်။ Beauty Place လူသုံး ကုန်စက်ရုံက နဂိုက A21 ဆပ်ပြာတွေထုတ်ပါတယ်။ စက်ရုံသွားတဲ့အခါမှာ မော်တော်ကား သိုလှောင်ရုံဖြစ်နေတာကို တွေ့ခဲ့ရပါတယ်။ သူတို့ တခြားနေရာကို ပြောင်းသွားပြီးဆိုတာကို ကြားသိခဲ့ရပါတယ်။ နဂိုက ငှားရမ်းလုပ်ကိုင်တာ ဖြစ်ပါတယ်။ တခြားဇုန် United Beauty Place ဆိုပြီးတော့ ထည်ထောင်နေတယ်ဆိုတာကို ကြားသိထားရပါတယ်။ လှိုင်သာယာစက်မှုဇုန်မှာ ၄ ရက် ၆ လ ၂၀၁၈ ထဲက ပိတ်သိမ်းသွားပြီးလို့ သိရပါတယ်။  Kuwahara အထည်စစ်စက်ရုံပါ အလုပ်သမားကတော့ ၃၅ ယောက်ပဲရှိပါတယ်။ သူက ၁၅ ရက် ၆ လ ၂၀၁၈ ရက်ထဲက ပိတ်သိမ်းတယ်ဆိုတာကို ဇုန်ကို အကြောင်းကြားထားပါတယ်။ စက်တွေလည်း လုံးဝမရှိတော့တာကို သွားတဲ့အခါ တွေ့ရပါတယ်။ TMP ငါးဖမ်းပိုက်စက်ရုံက အလုပ်သမား ၅၆ ယောက်ရှိပါတယ်။ ဒါပေမဲ့ သူကပိတ်သိမ်းပြီးတော့ အလုပ်သမားတွေကိုလည်း တစ်ယောက်မှလည်း မရှိတော့ဘူး။ ဘာမှမရှိတော့ဘဲနဲ့ ၄ ရက် ၆ လ ၂၀၁၈ ရက်ကတည်းက ပိတ်သိမ်းတဲ့စာရင်းကို ထည့်သွင်းထားပါတယ်။

ကျွန်မတို့က ဒီလိုစက်ရုံတွေဆိုတာကြားတော့ တခြားဇုန်တွေက ဥက္ကဋ္ဌတွေက သူတို့ကို အဲဒီမျိုးလာလုပ်ပေးပါဆိုတော့ လူကြီးတွေကို ခွင့်ပြုချက်တောင်းလိုက်ပါဦးမယ်။ ကျွန်မတို့က လွှတ်တော်ပိုင်းဆိုတော့ လွှတ်တော်ဥက္ကဋ္ဌရှိမှာ ခွင့်ပြုချက်တောင်းမယ်။ တောင်းပြီးရင်တော့ တတ်နိုင်သလောက် စက်မှုဇုန် အကြီးကြီးတွေဖြစ်တဲ့ မင်္ဂလာဒုံမှာဆိုရင် စက်မှုဇုန်နှစ်ခု၊ လှိုင်သာယာဆိုရင် ရွှေပြည်သာရယ်၊ ရွှေလင်ဗန်းစက်မှုဇုန်ရှိမယ်။ ဒီလိုစက်မှုဇုန်တွေကိုတော့ လွှတ်တော်မစမီမှာ သေသေချာချာ သွားကြည့်မှာပါ။ Popular အထည်ချုပ်စက်ရုံက သြဂုတ်လမှာ ပိတ်သိမ်းပြီးတော့  တခြားဇုန်မှာသွားမှာ ဖြစ်ပါတယ်။ တခြားလုပ်ငန်းရှင်အသစ်နဲ့ လက်ပြောင်းလက်လွဲလုပ်ပြီးတော့ တခြားနေရာမှာ သွားဖွင့်မယ်လို့ ပြောပါတယ်။ North Shore Group Co.,Ltd အထည်ချုပ်စက်ရုံက North Shore Group ဆိုတဲ့နာမည်နဲ့  ၁၄ ရက် ၆ လ၂၀၁၈ ရက်နေ့ပါပဲ ပိတ်သိမ်းလိုက်ပါပြီ ။ ဒါပေမဲ့ ပါတနာတစ်ယောက် မင်္ဂလာဒုံ စက်မှုဇုန်ပိုင်ရှင်အသစ်၊ စက်ရုံအသစ်နဲ့ သွားရောက်ဖွင့်လှစ်မယ်လို့ရပါတယ်။ ဒါဆိုရင် စက်ရုံ ၁၄ ရုံထဲကမှာ လက်ရှိဖွင့်နေတဲ့ စက်ရုံနှစ်ရုံ ဖွင့်လှစ်ထားပါသေးတယ်။

■မေး -          အခုပိတ်သိမ်းခဲ့တဲ့ စက်ရုံတွေက အကြီးစားစက်ရုံတွေလား၊ အသေးစားအလတ်စား စက်ရုံတွေလား။

■ ဖြေ -အဓိကကတော့ ကျွန်မတို့က micromanagement လိုက်လုပ်ပြီးတော့ ဒီစက်ရုံတွေဘာကြောင့် ပိတ်သိမ်းသွားရတာလည်း ဆိုတာကိုသိချင်တာ ဖြစ်ပါတယ်။ ဒီစက်ရုံတွေ အားလုံးဟာ SME စက်ရုံအဆင့်တွေပဲ ဖြစ်ပါတယ်။ နိုင်ငံခြားသားပဲဖြစ်ဖြစ်၊ မြန်မာနိုင်ငံသားပဲဖြစ်ဖြစ် SME အဆင့်တွေကို ကာကွယ်စောင့်ရှောက်ဖို့ ကျွန်မတို့နိုင်ငံတော် SME ချေးငွေတွေ ထုတ်ချေးပေးနေတယ်။ ဒါဆိုရင် စဉ်းစားရတော့ ငွေချေးတာတစ်ခုတည်းနဲ့ SME တွေ ရပ်တည်နိုင်မလားစဉ်းစားရတဲ့ အခါမှာ ဒီကနေ အဖြေတစ်ခုရလာတယ်။ နယ်စပ်ဒေသကနေ တရားမဝင်ဝင်လာတဲ့ ကုန်ပစ္စည်းတွေအပေါ်မှာ ကန့်သတ်ထိန်းချုပ်မှု မူဝါဒတွေ နဲ့ မှန်မှန်မဆောင်ရွက်နိုင်သေးရွှေ့ SME ရပ်တည်ဖို့ခက်ခဲမယ်ဆိုတဲ့ အဖြေတစ်ခုကို ရရှိပါတယ်။ နောက်တစ်ခုကတော့ လုပ်ငန်းတွေအားလုံးဟာ ယနေ့ လှိုင်သာယာ စက်မှုဇုန်တစ်ခုတည်း ရှိပါသေးတယ်။ ရွှေပြည်သာတို့၊ ရွှေလင်ဗန်းတို့ မင်္ဂလာဒုံစက်မှုတွေကို ဒီလိုပိတ်သိမ်းသွားတဲ့ စက်ရုံတွေ ရှိသေးလားဆိုတာ လိုက်ပြီးတော့ စာရင်းကောက်ဖို့ ရှိပါတယ်။ ဘာဖြစ်လို့ ဒါမျိုးလေးတွေကို လိုက်ပြီးကောက်ရတာလည်းဆိုတော့ စက်ရုံတွေ လူမသိသူမသိ အချိန်မှာ ပိတ်သိမ်းလိုက်တယ်။ ဘယ်အချိန်မှသိသလဲဆိုရင် အခုကျွန်မပြောတဲ့ စာရင်းတွေက အလုပ်သမားဦးစီးဌာနကို ရောက်ဦးမှာ မဟုတ်ဘူး။ ဘာလို့လဲဆိုတော့ အခုပိတ်သိမ်းလိုက်တဲ့ သူတွေကို မေးကြည့်လိုက်အခါမှာ သူတို့မှာ အဖြေမရှိဘူး။ ဒါပေမဲ့ စက်မှုကြီးကြပ်ဦးစီးဌာနတို့၊ လူမှုဖူလုံရေးတို့ တက်ဇ်တို့ ဒါတွေက တစ်နှစ်တစ်ကြိမ် လာရောက်ကောက်ခံတဲ့အချိန်မှ ဒီစက်ရုံမရှိဘူးဆိုတဲ့ဟာ တေ့ွရတာဖြစ်ပါတယ်။ သူတို့သွားရောက်စစ်ဆေးခဲ့သည်ရှိသော်မှ ဒီစက်ရုံပိတ်သိမ်းသွားတာကို သိမှာဖြစ်ပါတယ်။ အဲဒီတော့ စက်ရုံပိတ်သိမ်းတာကလည်း များသောအားဖြင့် မြန်မာစက်ရုံတွေ ဖြစ်တယ်။ သူတို့တွေက အလုပ်ရှင်သမား၊ အလုပ်သမားညှိပြီးတော့ သဘောတူညီချက်ရရင် ပိတ်ပြီးတော့ ဖျက်သွားလိုက်ကြတယ်။ စက်ရုံတွေကလည်း ငှားထားတဲ့ စက်ရုံတွေ ဖြစ်တဲ့အတွက် ပြန်အပ်ပြီး ထွက်သွားလိုက်ကြပါတယ်။ အဲဒီတော့ အလုပ်သမားဦးစီးဌာနကိုလည်း အကြောင်းကြားရမယ်ဆိုတာလည်း နားမလည်ဘူး။ အဓိကတော့ အခွန်ကိစ္စတွေနဲ့လည်း သက်ဆိုင်မယ်လို့ ထင်ပါတယ်။ ကျွန်မတို့ကကျတော့ ဘယ်စက်ရုံက ဘယ်သူနဲ့ပေါင်းပြီးတော့ ဘယ်နေရာ နာမည်အသစ် ဖြစ်နေပြီး အလုပ်သမားအသစ်တွေနဲ့လား။ အလုပ်သမားအဟောင်း ဘယ်လောက်ယူသွားသလဲဆိုတဲ့ စာရင်းတွေကို ပိတ်သိမ်းတဲ့ ဟာတွေမှာ အတိအကျကောက်ပါတယ်။ အလုပ်သမားဦးစီးဌာနကတော့ ဝန်ထမ်းအင်အား နည်းတာလည်းပါတယ်။ သူတို့အကြောင်းမကြားတာပါတော့ သူတို့အနေနဲ့ မသိဘူး။ တချို့က တရုတ်လုပ်ငန်းရှင်ဆိုပေမယ့် လုပ်ငန်းရှင် အကြီးကြီးတွေမဟုတ်ဘူး။ သေးသေးလေးတွေ လာလုပ်တာရှိတယ်။ သူတို့ဘာသာသူတို့ ပိတ်သိမ်းပြီးတော့ ထွက်သွားတာတွေလည်း ရှိပါတယ်။ micromanagement  မှာမှ ကိန်းဂဏန်းမှန်မှ macromanagement မှန်ကန်စွာလုပ်နိုင်မှ ဖြစ်ပါတယ်။ နို့မို့ဆိုရင် စက်ရုံပိတ်တာ ရှိသလား၊ စက်ရုံပိတ်တာ မရှိပါဘူး။ ကျွန်တော်တို့ကို သတင်းလာပို့ထားတာ မရှိပါဘူး။ အမှန်က ကျွန်မတို့မြေပြင်မှာ စစ်လိုက်တဲ့အခါမှာ မြေပြင်စက်ရုံမရှိတော့ဘူး။ ဒါတွေက ကွဲလွဲမှုရှိနေတယ်ဆိုတာကို သိချင်တာပါ။ ဌာနကပို့တဲ့ စာရင်းကိုပဲအပေါ်က ထိုင်ပြီးတော့ ဖတ်နေမယ်ဆိုရင်တော့ မြေပြင်အခြေအနေအများကြီး ကွာနေမှာပါ။ အခုကျွန်မတို့ရဲ့ ကော်မတီက မြေပြင်ကိုသွားရောက်ပြီး ပိတ်လိုက်တဲ့လူ တွေနဲ့တွေ့တယ်။ တွေ့ခွင့်မရတဲ့လုပ်ငန်းရှင် စက်ရုံတွေဆိုရင် ကိုယ်တိုင်သွားကြည့်ကြတယ်။ အဲဒီနေရာမှာတွေမှာ တကယ်ပိတ်သိမ်းနေပြီး သူတို့မှာ အခက်အခဲတွေရှိနေပြီးဆိုတာ တွေ့ရတယ်။

■မေး -          အခုလို စက်ရုံတွေ ပိတ်သိမ်းခဲ့ရတာက လုပ်ခလစာတိုးလာတာနဲ့ကော သက်ဆိုင်မှုရှိသလား။

■ဖြေ - ကျွန်မတို့တိုင်းပြည်မှာ လုပ်ငန်းရှင်တစ်ယောက်ဖြစ်ဖို့ အရမ်းခဲယဉ်းပါတယ်။ လုပ်ငန်းရှင်တစ်ယောက်ဖြစ်ပြီးရင် ဖျက်ရတာ အရမ်းလွယ်ကူတယ်။ အဲဒီတော့ လွန်ခဲ့တဲ့နှစ်ပေါင်း ၂၀ လောက်ကတည်းက ရပ်တည်လာတယ်။ ဘာကြောင့် လုပ်ငန်းတွေရပ်သွားရတာလဲ အဖြေရှိဖို့လိုအပ်ပါတယ်။ တိုင်းဒေသကြီးအစိုးရအနေနဲ့ ဘာတွေပံ့ပိုးကူညီးပေးလို့ ရမှာလဲဆိုတဲ့အဖြေကို ရှာပေးလို့ရမှာ ဖြစ်ပါတယ်။ ဒါကြောင့် ကျွန်မတို့တွေက စက်ရုံတွေကို သွားရောက်ကြည့်ရှုတာတွေ၊ စက်ရုံ မြေပြင်ကို လက်တွေ့သွားကြည့်ပြီးတော့ ဒီလိုမျိုး ကြေညာပေးရခြင်းသည် အလုပ်သမားခ ကျပ် ၄၈၀၀ နဲ့လည်း ဘာမှမဆိုင်ဘူး။ အလုပ်သမားတွေ ဆန္ဒပြတာတွေနဲ့မဆိုင်ဘူး။ အဓိကတော့ လုပ်ငန်းရှင်တွေ ဘာကြောင့်လုပ်ငန်းတွေ ပိတ်သိမ်းရသလဲ။ ပိတ်သိမ်းသွားတဲ့လုပ်ငန်းရှင်တွေ ပြန်လည်ထူထောင်နိုင်အောင် ရန်ကုန်တိုင်းဒေသကြီးအစိုးရ၊ တိုင်းဒေသကြီး လွှတ်တော်အနေနဲ့ ဘာတွေပံ့ပိုးကူညီပေးရမလဲဆိုတာ အဓိကရည်ရွယ်ချက်ပါပဲ။