မြန်မာ့ရုပ်ရှင်လောကမှာ ရှားပါးတဲ့ အမျိုးသမီးဒါရိုက်တာတွေထဲက တစ်ဦးဖြစ်ပြီး သူ့ရဲ့အနုပညာအရည်အသွေးအပေါ် အားလုံးရဲ့အသိအမှတ်ပြုမှုတွေကို လက်ခံရရှိထားသူက ဒါရိုက်တာ ကြည်ဖြူသျှင်ပါ။ ၂၀၁၂ ခုနှစ်ကစလို့ အမျိုးသားဒီမိုကရေစီအဖွဲ့ချုပ်ရဲ့ နိုင်ငံရေး လှုပ်ရှားဆောင်ရွက်မှုတွေမှာ ပူးပေါင်းပါဝင်ခဲ့ပြီး အနုပညာလှုပ်ရှားမှုပိုင်းမှာ နည်းသွားတဲ့ ဒါရိုက်တာ ကြည်ဖြူသျှင်အနေနဲ့ ၂၀၁၇ ခုနှစ်အတွင်းမှာတော့ ဂျပန်-မြန်မာ နှစ်နိုင်ငံချစ်ကြည်ရေးအတွက် ရည်ရွယ်သလို မြန်မာနိုင်ငံရဲ့ သမိုင်တစ်ကွေ့မှာ ပါဝင်ခဲ့ကြတဲ့ နိုင်ငံရေးလှုပ်ရှားသူတွေရဲ့ ဘဝကိုပါ ထင်ဟပ်ပြသထားတဲ့ ‘ဇာတိမြေ’ (My Country My Home) ဇာတ်ကားကြီးကို ရိုက်ကူးခဲ့ပါတယ်။ ဒီဇာတ်ကားရဲ့ Premier Show ကို ရန်ကုန်မှာပြုလုပ်ခဲ့ပြီးဖြစ်သလို ဂျပန်နိုင်ငံရုပ်ရှင်ပွဲတော်တွေနဲ့ ရုပ်သံလိုင်းတွေမှာလည်း ပြသမယ်လို့ သိရပါတယ်။ ဒါ့ကြောင့်  မြန်မာနိုင်ငံမှာလည်း ရုံတင်ဖို့စီစဉ်နေတဲ့ ‘ဇာတိမြေ’ ဇာတ်ကားရဲ့ဇာတ်ညွှန်းနဲ့ဒါရိုက်တာ ကြည်ဖြူသျှင်နဲ့ ဇာတ်ကားအကြောင်း တွေ့ဆုံမေးမြန်းဖြစ်ခဲ့ပါတယ် .  .  .  .

■ မေး- ‘ဇာတိမြေ’ ဇာတ်ကားလေး စပြီးရိုက်ကူးဖြစ်တဲ့ အကြောင်းလေးကို အရင်သိပါရစေ။

■ ဖြေ- ၂၀၁၇ ခုနှစ် ဖေဖော်ဝါရီမှာ လုပ်တဲ့ ဂျပန်-မြန်မာ ပွဲတော်ကိုတက်တော့ ရွှေသံလွင်မီဒီယာက ဒေါ်နန်း မောက်လောင်ဝ်ဆိုင်(မမီး)နဲ့ တွေ့ပြီး သူတို့အနေနဲ့ဂျပန်နဲ့ ပူးပေါင်းပြီး ဇာတ်ကားရိုက်ဖို့ရှိတယ်၊ စကားပြောချင်တယ်လို့ ပြောတယ်။ အဲဒီချိန်မှာပဲ တိုက်တိုက်ဆိုင်ဆိုင် အမက ဂျပန်နိုင်ငံအစိုးရနေ တည်ထောင်ထားတဲ့ ဂျပန်ဖောင်ဒေးရှင်ကနေ ရုပ်ရှင်၊ သဘင်၊ ဂီတကနေ အနုပညာရှင်တစ်ယောက်ကို တစ် နှစ်ကိုတစ်ယောက် ဂျပန်နိုင်ငံကို လေ့လာရေးနဲ့ စကောလားရှစ် အနေနဲ့ပေးတာကို ရထားပြီး ဂျပန်ကို သွားစရာရှိနေတယ်။ဒါ့ကြောင့် ဂျပန်ခရီးစဉ်က ပြန်လာရင် ဆက်ပြီးဆွေးနွေးကြမယ်ဆိုပြီး ပြောခဲ့တယ်။ အဲဒီခရီးစဉ်မှာလည်း အစ်မလေ့လာချင်တဲ့ ရုပ်ရှင်အကြောင်းအရာတွေအပြင် ဂျပန်နိုင်ငံက ပြည်သူတွေရဲ့ ဘဝတွေကိုပါ လေ့လာခွင့်တွေရရှိခဲ့တယ်။ အဲဒီက ပြန်လာတော့ မမီးနဲ့တိုင်ပင်တဲ့အခါ သူက NHK က ဂျပန်လူမျိုးရေးတဲ့ ဇာတ်လမ်းကျဉ်းလေးပေးတယ်။ အဲဒီဇာတ်လမ်းကို အစ်မထည့်ချင်တဲ့ အကြောင်းအရာတွေကို ပြန်ပြီးထည့်တယ်။ အဲဒီမှာ ဂျပန်လူမျိုးတွေအရမ်းတန်ဖိုးထားတဲ့ မာချာ့ (မြန်မာတွေတဲ့ Green Tea) ကို ဒီဇာတ်လမ်းမှာ ထည့်ဖို့စဉ်းစားမိတယ်။ ဘာလို့လဲဆိုတော့ အဲဒါက သူတို့တွေတန်ဖိုးထားသလို မြန်မာလူမျိုးတွေကလည်း လက်ဖက်ကို တန်ဖိုးထားတယ်။ အဲဒီတူညီတဲ့ နှစ်ခုကိုလည်း ဒီဇာတ်လမ်းလေးထဲမှာ အကြောင်းအရာလေးတစ်ခုအနေနဲ့ ထည့်ချင်တာလေးတွေ ထပ်ထည့်ဖြစ်ပြီး ပြန်ရေးခဲ့တယ်။

■ မေး- ဇာတ်ညွှန်းအတွက်ရော အမဘက်က ပြင်ဆင်ကြိုးစားခဲ့ရတာတွေကို ပြောပြပေးပါဦး။

■ ဖြေ- ဒီဇာတ်ကားကို စိတ်ကူးယဉ်ခြင်းဆိုတာ ထက်လက်တွေ့ဆန်တာကို ပိုဦးစားပေးခဲ့တယ်။ ဇာတ်လမ်းကျဉ်းမှာ မိုရီဆာကီဝင်းနေရာထက် အောင်ရဲလင်း၊ ကိုရန်အောင်နဲ့ ဝတ်မှုံရွှေရည်တို့နေရာတွေကို ပိုဖြည့်ပြီး ရေးလိုက်တယ်။ ဇာတ်လမ်းကျဉ်းကို သူတို့နဲ့ အကြိမ်ကြိမ်ဆွေးနွေးပြီးတော့မှ ဇာတ်ညွှန်း ရေးခင်ဂျပန်ကို သွားခဲ့ရတယ်။ အဲဒီမှာခရီးစဉ်မှာ မိုရီဆာကီဝင်းနဲ့ စကားပြောတယ်။ အဲဒီချိန်မှာ သူက ခုချိန်ထိမြန်မာနိုင်ငံ ပတ်စ်ပို့ကိုင်ထားတဲ့ မြန်မာနိုင်ငံသားပဲဆိုတာ သိလိုက်ရတယ်။  ဒီဇာတ်လမ်းထဲမှာ မိုရီဆာကီဝင်းကနေ ခိမုယဆိုတဲ့ နာမည်ပြောင်းသွားတာကလွဲလို့ ကျန်တာတွေက သူ့ရဲ့တကယ့် ဘဝပါပဲ။ ကျန်တဲ့ဇာတ်ကောင်တွေနေရာမှာ ဆိုရင်လည်း ဂျပန်နိုင်ငံမှာ ကျောင်းတက်အလုပ်လုပ်နေတဲ့ လူငယ်တွေရဲ့ဘဝ၊ ဂျပန်နိုင်ငံရောက် မြန်မာနိုင်ငံက နိုင်ငံရေးသမားတွေနဲ့ တွေ့ဆုံစကားပြောပြီးတော့မှပဲ တကယ့်ဘဝတွေနဲ့အနီးစပ်ဆုံး ဇာတ်ညွှန်းဖြစ်အောင် ပြင်ဆင်ခဲ့တယ်။

■ မေး- ဂျပန်နိုင်ငံနဲ့ လူတွေနဲ့ ပူးပေါင်းရိုက်ကူးခဲ့တာဖြစ်လို့ သူတို့နဲ့ ပူးပေါင်းရိုက်ကူးတဲ့ အတွေ့အကြုံတွေကိုလည်း ပြောပြပေးပါဦး။

■ ဖြေ-ဇာတ်လမ်းအကျဉ်းကို သဘောတူပြီးချိန်မှာ အခန်းစဉ်အတွက် အကြိမ်ကြိမ် ဆွေးနွေးရတယ်။ ဇာတ်ညွှန်းမရေးခင်မှာလည်း ဇာတ်လမ်းမှာပါမယ့်နေရာတွေထဲမှာ ကိုယ်သုံးချင်တဲ့နေရာတွေကို လိုက်ပြတယ်။ ပြီးတော့မှ ဇာတ်ညွှန်းရေးတယ်။ ဇာတ်ညွှန်းပြီးချိန်မှာလည်း ဇာတ်ကားရဲ့ ဇာတ်ဝင်ခန်းတစ်ခုချင်းစီအတွက် တကယ်ရိုက်မယ့် ဇာတ်ဝင်ခန်းတစ်ကဒ်ချင်းစီအတွက် ကင်မရာ၊ မီး၊ ဒါရိုက်တာနဲ့ ဆက်တင်က ဦးဆောင်မယ့် သူတွေကရိုက်မယ့် နေရာတစ်ခုချင်းစီကိုသွားပြီး တစ်ကဒ်ချင်းစီအတွက် ဘယ်လိုတွေ ရိုက်မယ်ဆိုတာကို သွားကြည့်ပြီးပါးစပ်နဲ့ တစ်ခါတည်းပြောပြင်ဆင်တယ်။ နောက်ပြီး သရုပ်ဆောင်တစ်ယောက်ချင်းစီရဲ့ ဇာတ်ဝင်ခန်းအလိုက်ဝတ်မယ့် အဝတ်အစားတွေကိုလည်း ကြိုပြီးဝတ်ပြတာကို ဓာတ်ပုံရိုက်ပြီး သူ့အခန်းအလိုက် သိမ်းဆည်းပြင်ဆင်ပေးတယ်။ ကိုယ်တွေအတွက်တော့ အရင်ကဇာတ်ကားတစ်ကားကို ဒီလောက်ထိ အများကြီး မပြင်ဆင်ခဲ့ဖူးဘူူးပေါ့။

■ မေး- ဇာတိမြေဇာတ်ကားအတွက် အစ်မအနေနဲ့ ဘယ်လိုအရာတွေကို စိုးရိမ်ခဲ့လဲ။

■ ဖြေ- မရိုက်ခင်တုန်းကလည်း ဘာပဲလုပ်လုပ် ကြားကစကားပြန်နဲ့ ပြောရမှာဆိုတော့ စိတ်ပူခဲ့တာရှိပေမဲ့ ဇာတ်ကားမရိုက်ခင်မှာ အရမ်းကို ပြင်ဆင်ခဲ့တာကြောင့် အဆင်ပြေခဲ့တယ်။ နောက်စိုးရိမ်တာက ကိုယ်ကသူတို့နဲ့ အလုပ်တွဲလုပ်တဲ့အခါမှာ သူတို့က ကိုယ့်အပေါ်မြင်မှာက မြန်မာအမျိုးသမီးဒါရိုက်တာ ဆိုတာပဲလေ။ ဒီတော့ ကိုယ့်လူမျိုးတွေက မညံ့ဘူး၊ ကြိုးစားနိုင်တယ်ဆိုတာကို ပြသနိုင်ဖို့အတွက်လည်း အစ်မဘက်က အများကြီး ကြိုးစားပြင်ဆင်ခဲ့တယ်။ ရိုက်ပြီးသွားတဲ့ အချိန်မှာလည်း ဒီဇာတ်ကားက ရှစ်လေးလုံးအ ရေးတော်ပုံကာလမှာ ဖြတ်သန်းပါဝင်ခဲ့ကြတဲ့ နိုင်ငံရေးသမားတွေရဲ့ ဘဝတစ်စိတ်တစ်ပိုင်းကို တင်ပြထားတာဖြစ်လို့ ကြည့်မယ့်နိုင်ငံရေးသမားတွေက ဘယ်လိုပြောမလဲဆို တာစိတ်ပူခဲ့တယ်။ ဒါပေမဲ့ လွှတ်တော်ထဲမှာ ပြသချိန်မှာရော Premier Show မှာ ကြည်ကြတဲ့သူတွေကရော ချီးကျူးတဲ့အတွက် အစ်မဝမ်းသာရပါတယ်။

■ မေး- ‘ဇာတိမြေ’ ဇာတ်ကားရဲ့ နောက်ဆုံးဇာတ်သိမ်းပိုင်းလေးမှာ တင်ပြသွားတာလေးကို စိတ်ကူးဖြစ်တဲ့ အကြောင်းလည်း သိချင်ပါတယ်။

■ ဖြေ - အစ်မဒီဇာတ်ကား နဂိုဇာတ်ညွှန်းမှာ ဇာတ်သိမ်းက ဒီလိုမပါဘူး။ ဇာတ်ကားကန်တော့ ပွဲလုပ်ပြီးချိန်မှာ ရှစ်လေးလုံးနှစ်ပတ်လည်ကို ကိုမင်းကိုနိုင်တို့တွေက သူတို့လူရင်းတွေချည်းစုပြီး မြို့တော်ခန်းမရှေ့မှာ ကဗျာရွတ်၊ ဖြတ်သန်းမှုတွေပြော၊ အလေးပြုတာတွေ လုပ်ကြတယ်။ အဲဒီကအများပြည်သူကိုလည်း အသိပေးတာမျိုးမလုပ်ဘူး။ အစ်မဇာတ်ကားအတွက် မှတ်တမ်းမှာပါတဲ့ (တကသ) က မင်းသူကျော်က ရှစ်လေးလုံးအထိမ်းအမှတ်လေး ရှိတယ်ဆိုပြီး ဖုန်းဆက်တာကြောင့် အစ်မရောက်သွားပြီး သူတို့တွေ ပြောတာနားထောင်ရင်းနဲ့မှ ဒီမြို့တော်ခန်းမရှေ့နေရာမှာ မြန်မာ့ဒီမိုကရေစီအတွက် လူတွေအများကြီး အသက်ပေးခဲ့ကြရတာကို လေးစားအသိအမှတ်ပြုစိတ်တွေ ပိုဖြစ်လာခဲ့တယ်။ ဒါ့ကြောင့် သူတို့ရဲ့အသက်ဝိညာဉ်တွေ ပေးဆပ်ခဲ့တဲ့ ဒီနေရာလေးကို အစ်မက ဒီဇာတ်ကားမှာ အစ်မခံစားရတဲ့အတိုင်း ဂုဏ်ပြုတင်ဆက်ခဲ့တာပါ။

■ မေး- ‘ဇာတိမြေ’ ဇာတ်ကားနဲ့ပတ်သက်ပြီး ပရိသတ်ကို ပြောချင်တာရှိရင်။

■ ဖြေ- ဒီဇာတ်ကားကို မြန်မာလူမျိုးတွေအားလုံး အထူးသဖြင့် ပြည်ပရောက်နေတဲ့ မြန်မာနိုင်ငံသားတွေနဲ့ သူတို့မိသားစုတွေကို ကြည့်စေချင်ပါတယ်။ မြန်မာနိုင်ငံရဲ့ သမိုင်းအချိုးအကွေ့တစ်ခုနဲ့ပတ်သက်တဲ့ ဒီလိုဇာတ်ကားမျိုးကို ရိုက်ကူးခွင့်ရတဲ့အတွက်လည်း အရမ်းကျေနပ်ဝမ်းသာရပါတယ်။ အဲဒီအတွက် ဝိုင်းဝန်းခဲ့ကြသူတွေအားလုံးကို ကျေးဇူးအရမ်းတင်တယ်လို့ ပြောချင်ပါတယ်။ နောက်ပြီး ဒီဇာတ်ကားကို အစ်မတို့ အနုပညာရှင်တွေအားလုံးက သေချာကြိုးစားထားပါတယ်။ အစ်မအနေနဲ့ မြန်မာဒါရိုက်တာ တစ်ယောက်ရဲ့ အနုပညာကို ဂျပန်လူမျိုးတွေက ဘယ်လိုတုံ့ပြန်မလဲဆိုတာကို စိတ်ပူခဲ့ပေမဲ့ ဒီဇာတ်လမ်းကိုကြည့်ပြီးတဲ့ ဂျပန်လူမျိုးတွေရဲ့ ချီးကျူးမှုရသလို Osaka Asia Film Festival 2018 မှာရော NHK ရုပ်သံလိုင်းမှာပါ ပြသခွင့်ရမှာဖြစ်လို့ အစ်မအနေနဲ့အများကြီး ကျေနပ်ပီတိဖြစ်ရပါတယ်။ မြန်မာနိုင်ငံမှာလည်း အမြန်ဆုံးရုံတင်နိုင်ဖို့အစ်မတို့ ကြိုးစားနေပါတယ်။