မတ် ၂၈ ရက်က ဘရာဇီးတောင်ပိုင်းတွင် တစ်ပတ်ကြာ မဲဆွယ်မှုနောက်ဆုံးနေ့၌ သမ္မတဟောင်း လူလာကို တွေ့ရစဉ် (Photo: AFP)
လာမည့်အောက်တိုဘာတွင် ကျင်းပမည့် သမ္မတရွေးကောက်ပွဲများ၌ အနိုင်ရရန် တစ်ပြေးနေသည့် ဘရာဇီးသမ္မတဟောင်း လူးဝစ်အင်နာစီယိုလူလာဒါဆေးဗားသည် ၂၄ နာရီအတွင်း ရဲတပ်ဖွဲ့ထံ အဖမ်းခံပြီး ၎င်းအား ချမှတ်ထားသောထောင်ဒဏ် ၁၂ နှစ် ပြစ်ဒဏ်ကို ကျခံရန်အတွက် တရားသူကြီးတစ်ဦးက ဧပြီ ၅ ရက်တွင် ညွှန်ကြားခဲ့သည်။
Car Wash ဟုခေါ်သော အကျင့်ပျက် ခြစားမှု တိုက်ဖျက်ရေးကို ဦးဆောင်နေသည့် တရားသူကြီး ဆာဂျီယိုမိုရိုက ယင်းကဲ့သို့ အမိန့်ထုတ်ပြန်ခဲ့သည့်အချိန်သည် လူလာ၏ရှေ့နေများကို လုံးဝအံ့အားသင့်စေခဲ့သည်။ လူလာသည် အနည်းဆုံးအားဖြင့် လာမည့် သီတင်းပတ်ရောက်မှသာ ထောင်ဒဏ်ကျခံရနိုင်သည်ဟု ထိုရှေ့နေများက မျှော်လင့်ထားခြင်း ဖြစ်သည်။ မြို့ကြီးတစ်မြို့ဖြစ်သော ဆော်ပေါ်လိုမြို့အနီး နေထိုင်သည့် လူလာသည် Car Wash စုံစမ်းစစ်ဆေးမှုအခြေစိုက်သည့် နိုင်ငံတောင်ပိုင်းရှိ ကာရီတီဘာမြို့ရှိ ရဲတပ်ဖွဲ့ထံ ဧပြီ ၆ ရက် ဒေသစံတော်ချိန် ညနေ ၅ နာရီ (ဂရင်းနစ်စံတော်ချိန် ၂၀၀၀ နာရီ) ၌ ကိုယ်တိုင်သွားရောက်အဖမ်းခံရန် မိုရိုက ညွှန်ကြားခဲ့ခြင်းဖြစ်သည်။
ယင်းသည် တရားရင်ဆိုင်နေရသော်လည်း လူထုသဘောထားစစ်တမ်းများတွင် အသက် ၇၂ နှစ်ရှိ လူလာက အပြတ်အသတ် ဦးဆောင်နေသည့် သမ္မတရွေးကောက်ပွဲနှင့်ဆိုင်သော ကြီးမားသည့်နောက်ဆက်တွဲတစ်ခု ဖြစ်သည်။ ၁၉၆၄-၁၉၈၅ ခုနှစ်က စစ်အာ ဏာရှင်စနစ်အား လူသိရှင်ကြား ဂုဏ်ပြုခဲ့သော သဘောထားတင်းမာသည့် စစ်ဘက် တာဝန်ရှိသူဟောင်း Jair Bolsonaro လတ်တလောတွင် လူလာ၏နောက်၌ ဒုတိယနေရာတွင် ရပ်တည်နေသည်။
ကမ္ဘာတွင် လူထုထောက်ခံမှု အမြင့်မားဆုံး ရရှိထားသည့်နိုင်ငံရေးသမားများအနက် တစ်ဦးဖြစ်သော လူလာက ရုတ်တရက်ထုတ်ပြန်လိုက်သော ယင်းအမိန့်သည် အဓိပ္ပါယ်မရှိကြောင်း CBN ရေဒီယိုသို့ ပြောကြားခဲ့သည်။ ထိုအမိန့်အား လိုက်နာမည်လားဟု မေးမြန်းခဲ့ရာ လူလာက ၎င်းရှေ့နေ၏ အကြံပေးချက်အတိုင်း လုပ်ဆောင်မည်ဟု ဖြေကြားခဲ့သည်။
တရားသူကြီးမိုရို၏အမိန့်တွင် လူလာ၏အရေးပါမှုကို ထည့်သွင်းစဉ်းစားလျက် အထူးအကျဉ်းခန်းတစ်ခုအား ကြိုတင်စီစဉ်ထားပြီး ၎င်းအား အခြားအကျဉ်းသားများ နှင့် ခွဲခြား၍ သီးသန့်နေထိုင်ရမည်ဖြစ်သောကြောင့် စိတ်ပိုင်း သို့မဟုတ် ရုပ်ပိုင်းဆိုင်ရာ ခိုင်မြဲမှုအတွက် မည်သည့်အန္တရာယ်မျှ မကြုံ နိုင်ကြောင်း ဖော်ပြခဲ့သည်။
၂၀၀၃ ခုနှစ်မှ ၂၀၁၁ ခုနှစ်အထိ သက်တမ်းနှစ်ကြိမ် ထမ်းဆောင်ခဲ့ပြီး တတိယအကြိမ် သက်တမ်းထမ်းဆောင်ရန် ကြိုးပမ်းနေသော လူလာသည် ဆောက်လုပ်ရေးကုမ္ပဏီကြီးထံမှ ပင်လယ်ကမ်းခြေကို မျက်နှာမူသည့် ဇိမ်ခံတိုက်ခန်းတစ်ခန်း လာဘ်ထိုးမှုအား လက်ခံခဲ့ကြောင်း စွဲချက်ဖြင့် ပြီးခဲ့သော နှစ်၌ ထောင်ဒဏ်ချမှတ်ခံခဲ့ရသည်။ လူလာသည် ယင်းပြစ်ဒဏ်အား အောက်အယူခံတရားရုံးကို အယူခံဝင်ခဲ့သော်လည်း ပြီးခဲ့သော ဇန်နဝါရီတွင် ပယ်ချခံခဲ့ရသည်။ အထက်အယူခံတရားရုံးများထံ အယူခံတက်ရန် ပြင်ဆင်နေစဉ် လွတ်လပ်စွာနေထိုင်ခွင့်ပြုရန် လူလာက တရားရုံးချုပ်ထံ အယူခံဝင်မှုသည်လည်း ဧပြီ ၄ ရက်တွင် ပယ်ချခံခဲ့ရသည်။
