လုပ်ငန်းခွင်၌ ခေါင်းဆောင်တစ်ဦးသည် ဝန်ထမ်းများအပေါ် လှုံ့ဆော်နိုင်စွမ်းနှင့် စေ့ဆော်နိုင်စွမ်း ရှိခြင်းသည် ယုံကြည်မှုအပေါ်၌ အခြေခံသည်။ လူများက မိမိအပေါ်၌ ယုံကြည်သည့်အခါ မိမိ၏ဆုံးဖြတ်ချက်များကိုလည်း ယုံကြည်ကြမည်ဖြစ်သည်။ မရေရာသော အနေအထား၌ပင်လျှင် ၎င်းတို့အပေါ် မိမိ၏ ခေါင်းဆောင်မှုက သြဇာသက်ရောက်နိုင်သည်။ ယင်းကဲ့သို့ ဖြစ်ရခြင်းမှာ ၎င်းတို့က မိမိသည်ပြောသည့်အတိုင်း လုပ်လိမ့်မည်ဟု မျှော်လင့်ထားသောကြောင့် ဖြစ်သည်။ ခေါင်းဆောင်တစ်ဦးအနေဖြင့် ယုံကြည်မှု တည်ဆောက်နိုင်သည့် နည်းလမ်းခြောက်ရပ်ကို ဖော်ပြအပ်ပါသည်။
ယုံကြည်မှု တည်ဆောက်ခြင်းသည် အလုပ်ပြင်းပြင်းထန်ထန် လုပ်ရကြောင်း သိမြင်ပါ - မိမိပြောဆိုသည့်အတိုင်း ကတိတည်ခြင်းနှင့် မိမိ၏ အမူအကျင့်များသည် မိမိသတ်မှတ်ထားသည့် စံတန်ဖိုးများနှင့် ကိုက်ညီခြင်းတို့ကို အများသိရှိခြင်းမှနေ၍ ယုံကြည်မှု ဖြစ်ပေါ်လာသည်။ ယုံကြည်မှု တည်ဆောက်ခြင်းသည် အလုပ်ပြင်းပြင်းထန်ထန်လုပ်ကာ အားထုတ်မှုမှ လာခြင်းဖြစ်သောကြောင့် ယင်းယုံကြည်မှု ဆုံးရှုံးသွားသည်နှင့် ပြန်လည်ရရှိရန် လွန်စွာခက်ခဲသွားနိုင်သည်။
ရိုးသား၍ ထောက်ကူမှုပေးပါ - သိသင့်သော ဝန်ထမ်းများ၏ လိုအပ်ချက်ကို နားလည်ပြီး ၎င်းတို့၏ အားထုတ်မှုများနှင့် ၎င်းတို့ သည်းမခံနိုင်သော ခံစားမှုများကို စဉ်းစားချင့်ချိန်၍ အချက်အလက်များအရ ဆက်ဆံမှုပြုလုပ်ပါ။ အမှားပြုလုပ်သည့်အခါ၌ပင်လျှင် မိမိ၏အဖွဲ့ဝင်များအပေါ် နားလည်မှုနှင့် ထောက်ကူမှုကို ပြသပါ။ ခေါင်းဆောင်တစ်ဦးအဖြစ် ယုံကြည်မှု တည်ဆောက်ခြင်းသည် ရှည်လျားသော ခရီးစဉ်တစ်ရပ်ဖြစ်သည်။
ပြောထားသည့်အတိုင်း ဆုံးခန်းတိုင်ပြုလုပ်ပါ - အကောင်းဆုံး ရည်ရွယ်ချက်ပါသည့် အပြောများသည်ပင်လျှင် သက်ဆိုင်ရာ လုပ်ဆောင်ချက် နောက်မှလိုက်ပါလာခြင်းမရှိပါက အနှစ်မပါ ဗလာသက်သက်သာဖြစ်သည်။ မိမိအနေဖြင့် ပြောသည့်အတိုင်း လုပ်နိုင်မှသာလျှင် တစ်စုံတစ်ရာ ပြုလုပ်မည်ဟု ပြောဆိုရမည်ဖြစ်ပြီး မိမိအနေဖြင့် လုပ်ဆောင်နိုင်မည့် အခွင့်အလမ်းမရှိပါက ကတိပြုပြောဆိုခြင်း မပြုအပ်ပေ။ ပေးထားသည့်ကတိကို ချိုးဖောက်ခြင်းသည် မိမိ တည်ဆောက်ယူထားသည့် ယုံကြည်မှုကို ပျက်စီးစေသည့်အပြင် လူအများက မိမိအား နောင်တွင်လည်း ယုံကြည်ကြတော့မည် မဟုတ်ပေ။
တစ်သမတ်တည်းဖြစ်ပါစေ - အချိန်နှင့်အမျှ ယုံကြည်မှု တည်ဆောက်နေသည်ဆိုပါက တစ်သမတ်တည်း လုပ်ဆောင်ရန် လိုသည်။ မည်သည့်အရာကိုမျှ စိတ်ရူးပေါက်သလို ပြောဆိုပြုလုပ်ခြင်းမပြုပါနှင့်။ ပြောထားသည့်ကတိများကို ထိန်းသိမ်းထားခြင်းသည် ဆက်ဆံရေးအားလုံး၌ မိမိအမူအကျင့်၏ အနှစ်သာရဖြစ်ပြီး တစ်နေ့ထက်တစ်နေ့ တစ်နှစ်ထက် တစ်နှစ် ပိုမိုခိုင်မာ၍လာသည်။
ကောင်းမွန်သည့် အမူအကျင့်ကို စံပြုသတ်မှတ်ထားပါ - အဖွဲ့အစည်းတည်းဟူသည့် ယဉ်ကျေးမှုတစ်ရပ်တွင် ခေါင်းဆောင်ဖြစ်သူ၏ အမူအကျင့်ထက် ပို၍ကျယ်ကျယ်လောင်လောင် ပြောဆိုကြသောအရာဟူ၍ မရှိပေ။ ခေါင်းဆောင်၏ အမူအကျင့်သည် ဝန်ထမ်းများ၏ လုပ်ဆောင်ချက်များအပေါ် သြဇာသက်ရောက်ပြီး ရလဒ်များဆီသို့ မောင်းနှင်နိုင်စွမ်းလည်းရှိသည်။ မိမိအနေဖြင့် အဖွဲ့လိုက် လုပ်ဆောင်မှုသည် အရေးကြီးသည်ဟု ပြောပါက အဖွဲ့များနှင့် လုပ်ငန်းဆောင်တာများတစ်လျှောက် ပူးပေါင်းဆောင်ရွက်သည့် အချက်ကို အထူးအားပေးရမည် ဖြစ်သည်။ မည်သူမဆို ကောင်းမွန်စွာ လုပ်ဆောင်နိုင်ပါက အသိအမှတ်ပြု ချီးကျူးရမည်ဖြစ်ပြီး ချီးကျူးသည့် ယဉ်ကျေးမှုတစ်ရပ်ကို တည်ဆောက်ရမည် ဖြစ်သည်။
တာဝန်ခံမှုဖြင့် တည်ဆောက်ပါ - ခေါင်းဆောင်များအနေဖြင့် မိမိတို့၏ အောင်မြင်မှုများကိုသာမက အမှားများကိုလည်း သိမြင်ရမည်ဖြစ်သည်။ ဝန်ထမ်းများက မိမိအား ယုံကြည်ရသူအဖြစ် တွေ့ရှိမှသာ မိမိ၏ ခေါင်းဆောင်မှုနောက်သို့ လိုက်လိမ့်မည်ဖြစ်သည်။ ရိုးသားသည့် အပြန်အလှန် ဆွေးနွေးမှုများနှင့် တာဝန်ခံမှုများကို အားပေးကျင့်သုံးရမည်ဖြစ်သည်။
မည်သို့ပင်ဆိုစေကာမူ ခေါင်းဆောင်တစ်ဦးအနေဖြင့် လူအများအား မိမိ၏ ခေါင်းဆောင်မှုနောက်သို့ လိုက်စေလိုပါက ယုံကြည်မှုအား ရေရှည်ခိုင်မြဲအောင် တည်ဆောက်သွားရမည်ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
ဇူလိုင်လ ၆ ရက်နေ့ထုတ် The Daily Eleven သတင်းစာ အယ်ဒီတာ့အာဘော်
