အောက်စီဂျင် လုံလောက်စွာမရှိသော မီးများမှနေ၍ ထွက်ပေါ်လာသော မီးခိုး၌ မီးတောက်အဖြစ် လောင်ကျွမ်းစေနိုင်သော ဓာတ်ပေါင်းပါဝင်မှုနှုန်း မြင့်မားသည်။ ထို့ကြောင့် မီးခိုးထုကြီးသည် လေထု၌မှ အောက်စီဂျင်နှင့် ထိတွေ့သည့်အခါ မီးမွှေးနိုင်သည့် အလားအလာရှိပြီး လေထုထဲ၌ နောက်ထပ် မီးတောက်ကြီး ဖြစ်ပေါ်စေနိုင်သည်။ မီးခိုးကို ရှူသွင်းရခြင်းသည် မီးခိုး၏ အန္တရာယ်တစ်ရပ်ဖြစ်ပြီး ပြင်းထန်သော ကျန်းမာရေး ထိခိုက်မှုမှသည် သေဆုံးသည်အထိ ဖြစ်စေနိုင်သည်။ မီးများမှ ထွက်ပေါ်လာသော မီးခိုး၌ ပါဝင်သည့် ဓာတ်ပေါင်းများစွာတို့သည် ကျန်းမာရေးကို ထိခိုက်စေရုံသာမက အဆိပ်ဖြစ်စေမှု လွန်စွာမြင့်မားသည်။ အကြီးမားဆုံး အန္တရာယ်မှာ ကာဗွန်မိုနောက်ဆိုက်မှနေ၍ ကာဗွန်မိုနောက်ဆိုက် အဆိပ်သင့်ခြင်း ဖြစ်ပေါ်မှုပင်ဖြစ်သည်။ ကာဗွန်မိုနောက်ဆိုက်နှင့်အတူ ဟိုက်ဒရိုဂျင်ဆိုက်ယာနိုက်နှင့် ဖော့စ်ဂျင်းအဆိပ်သင့်ခြင်းတို့လည်း ပူးတွဲဖြစ်ပေါ်နိုင်သည်။ ထို့ကြောင့် မီးခိုးများ ရှူသွင်းမိခြင်းသည် အင်အားချည့်နဲ့သွားခြင်းနှင့် သတိလစ်သွားခြင်းကို အလျင်အမြန်ဖြစ်ပေါ်စေသည်။ မီးခိုးတွင် ပါဝင်သည့် ဆာလ်ဖာအောက်ဆိုက်၊ ဟိုက်ဒရိုဂျင်ကလိုရိုဒ်နှင့် ဟိုက်ဒရိုဂျင်ဖလိုရိုဒ်တို့သည် အငွေ့ပုံသဏ္ဌာန်များရှိ ဆာဖျူရစ်အက်စစ်၊ ဟိုက်ဒရိုကလိုရစ်အက်စစ်နှင့် ဟိုက်ဒရိုဖလိုရစ်အက်စစ်တို့နှင့် ထိတွေ့သည့်အခါ အရာဝတ္ထုများကိုသာမက အဆုတ်များကိုပါ စားပစ်လိုက်နိုင်သည့် ဂုဏ်သတ္တိရှိသည်။ အိပ်ပျော်နေသည့်အခါ နှာခေါင်းသာမက ဦးနှောက်သည်ပင်လျှင် မီးခိုးကို အာရုံခံစားနိုင်ခြင်း မရှိပါ။ အဆုတ်ထဲ၌ မီးခိုးများဖုံးလာသည့်အခါမှသာ ဦးနှောက်သည် နိုးကြားလာပြီး လူကနိုး၍လာသည်။ သို့သော် မီးခိုးကြောင့် အားအင်ချည့်နဲ့သွားလျှင်သော်လည်းကောင်း၊ အရက်မူး၊ ဆေးမူးနေသည့်အခါတွင်လည်းကောင်း ယင်းဖြစ်စဉ်က အလုပ်မဖြစ်တော့ပေ။
မီးခိုးများအနက် စီးကရက်မီးခိုးသည် အဆုတ်ရောဂါ၊ နှလုံးရောဂါနှင့်ကင်ဆာရောဂါတို့ ဖြစ်ပွားစေနိုင်သည့် ထပ်ဆင့်အန္တရာယ်ရှိသည်။ ပတ်ဝန်းကျင်လေထုအတွင်း ညစ်ညမ်းသည့်အရာများ ပါဝင်မှုနှုန်းသည် စီးကရက်မီးခိုး၌ ပါဝင်မှုနှုန်းထက် နည်းပါးသော်လည်း ကျောက်မီးသွေးများ လောင်ကျွမ်းမှု၊ တောမီးလောင်ကျွမ်းမှုနှင့် အခြားရင်းမြစ်များကြောင့် ပတ်ဝန်းကျင်လေထုအတွင်း မီးခိုးများ ရောနှောပါဝင်နေတတ်သည်။ တရုတ်နိုင်ငံ ပေကျင်းမြို့ကဲ့သို့သော မြို့ကြီးများတွင် ဖြစ်ပေါ်လေ့ရှိသည့် လေထုအတွင်း ညစ်ညမ်းမှု ၈၈၀ မိုက်ခရိုဂရမ်/ ကုဗမီတာလျှင် PM 2 . 5 ကို တစ်နေ့ထိတွေ့ရခြင်းသည် ခန္ဓာကိုယ်အလေးချိန်ကိုလိုက်၍ စီးကရက်တစ်လိပ်သို့မဟုတ် နှစ်လိပ်၏ မီးခိုးများကို ရှူသွင်းရခြင်းနှင့် ညီမျှသည်။ သို့သော် ပတ်ဝန်းကျင် လေထုအမျိုးမျိုးအတွင်း ရှိနိုင်သည့် အော်ဂဲနစ်ဓာတ်ပေါင်းများသည် စီးကရက်မီးခိုးထက် ကင်ဆာဖြစ်ပွားနိုင်ခြေပို၍ မြင့်မားနိုင်သောကြောင့် လေ့လာဆန်းစစ်ရန် ခက်ခဲရှုပ်ထွေးမှုများရှိသည်။ မီးခိုးများသည် မြင်နိုင်စွမ်းကို မှုန်ဝါးသွားစေသောကြောင့် မီးလောင်မှုဖြစ်ပွားသော နေရာများမှနေ၍ နေထိုင်သူများကို ဖယ်ရှားရာ၌ အဟန့်အတားဖြစ်စေသည်။ ၎င်းအပြင် ထူထဲသော မီးခိုးများသည် မီးသတ်သမားများကို စိတ်ရှုပ်ထွေးသွားစေနိုင်ပြီး အချိန်၊ နေရာအစရှိသည်တို့ကို စဉ်းစားမရ ဖြစ်သွားစေနိုင်သည်။
မည်သည့်နိုင်ငံ၌မဆို အစိုးရဟူသည် အများပြည်သူတို့၏ ဘေးကင်းလုံခြုံမှုကို တာဝန်ခံထားရသည်သာမက လေထုညစ်ညမ်းမှုကဲ့သို့သော ပတ်ဝန်းကျင်ဆိုင်ရာကိစ္စများ အတွက်လည်း တာဝန်ရှိသည်ဖြစ်၍ အများပြည်သူများ ရင်ဆိုင်ကြုံတွေ့နေရသည့် မီးခိုး၏ အန္တရာယ်များကို အမြန်ဆုံး ဖယ်ရှားရှင်းလင်းပေးနိုင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(ဧပြီ ၂၅ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)
