အဂတိလိုက်စားခြင်းသည် ပြဿနာကြီးတစ်ရပ် ဖြစ်ရုံသာမက ယိုယွင်းပျက်စီးပြီး ဂုဏ်သိက္ခာကင်းမဲ့သော ကိစ္စလည်းဖြစ်သည်။ သို့သော် အဂတိလိုက်စားခြင်းသည် ရပ်တန့်သွားခြင်း မရှိဘဲ အမြဲတစေ မြင့်တက်လာနေပုံရသည်။ ပို၍ဆိုးသည်မှာ အဂတိလိုက်စားမှု၌ ပါဝင်ပတ်သက်သူများသည် အခြားသူများ၏ ရှုတ်ချပြစ်တင်ခံရမှုမှ လွတ်ကင်းနေခြင်းပင်ဖြစ်သည်။ ၎င်းတို့သည် မိမိတို့ကိုယ်ကိုယ် အချိန်တိုအတွင်း ငွေကြေးများစွာ ရှာဖွေနိုင်သူများအဖြစ် ဂုဏ်ယူ၍ပင် နေကြသေးသည်။ ပို၍ဆိုးရွားသောအနေအထား၌ အဂတိလိုက်စားမှု၌ ပါဝင်ပတ်သက်သူများသည် ပို၍ကောင်းမွန်သော ရာထူးများနှင့် အခွင့်အလမ်းများကို ရရှိနိုင်ခြင်းဖြစ်သည်။ ပြည်သူတို့အနေဖြင့်လည်း အဂတိလိုက်စားမှုအား ၎င်းတို့၏ အလုပ်ပြီးမြောက်ရန် တစ်ခုတည်းသောနည်းလမ်းဟု သဘောထားလိုက်ကြပြီး အဂတိလိုက်စားမှုကို အားပေးခြင်းမရှိပါက မိမိတို့၏အလုပ်များ အချိန်ကြာမြင့်စွာ ဆိုင်းငံ့ထားခံရသည့် (သို့မဟုတ်) လုံးဝလုပ်ကိုင်ရန် မဖြစ်နိုင်တော့သည့် အနေအထားသို့ ဆိုက်ရောက်သွားမည်ဟု လက်ခံလိုက်ကြတော့သည်။ အဂတိလိုက်စားခြင်း၏ ပြည်သူတို့အပေါ် သက်ရောက်မှုအချို့ကို အောက်ပါအတိုင်း တွေ့နိုင်သည်။
အများပြည်သူဝန်ဆောင်မှုများ၌ အရည်အသွေးလျော့နည်းခြင်း - အဂတိလိုက်စားမှုများ ရှိနေသည့် စနစ်တစ်ရပ်တွင် အများပြည်သူဝန်ဆောင်မှု လုပ်ငန်းများမှာ အရည်အသွေး ရှိမည်မဟုတ်ပါ။ တစ်စုံတစ်ဦးအနေဖြင့် အရည်အသွေးကို တောင်းဆိုပါက ယင်းအတွက် လာဘ်ငွေပေးရန် လိုအပ်လာလိမ့်မည်။ ယင်းကဲ့သို့သော အနေအထားသည် စည်ပင်သာယာရေး၊ လျှပ်စစ်နှင့် သက်သာချောင်ချိရေး ဝန်ဆောင်မှုကဏ္ဍများ၌ ဖြစ်ပေါ်နိုင်သည်။
မှန်ကန်သည့်တရားစီရင်မှု ချို့တဲ့ခြင်း - တရားရေးစနစ်၌ အဂတိလိုက်စားမှုရှိပါက တရား ဥပဒေစိုးမိုးမှု ရှိတော့မည်မဟုတ်ပါ။ ကျူးလွန်ခံရသူများ ထိခိုက်နစ်နာကြရသည်။ သက်သေအထောက်အထား မခိုင်လုံခြင်း (သို့မဟုတ်) သက်သေအထောက်အထားများကို ဖျောက်ဖျက်ပစ်ခြင်းတို့ကြောင့် ပြစ်မှုများကို သံသယ၏အကျိုးဟု ခေါ်ဆိုကာ ပယ်ဖျက်ပစ်နိုင်သည်။ ရဲတပ်ဖွဲ့စနစ်အတွင်း အဂတိလိုက်စားမှုရှိပါက စုံစမ်းစစ်ဆေးမှုလုပ်ငန်း စဉ်များသည် ဆယ်စုနှစ်နှင့်ချီလျက် ကြာမြင့်၍သွားနိုင်သည်။ ကြန့်ကြာနေသော တရားမျှတမှုမှသည် ငြင်းပယ်ခံလိုက်ရသော တရားမျှတမှု ဖြစ်သွားတတ်သည်။
အလုပ်လက်မဲ့ပြဿနာ - ဥပမာအားဖြင့်ဆိုရလျှင် ပညာရေးကို အထောက်အကူ ပြုစေရန်အတွက် ပုဂ္ဂလိကကျောင်းများနှင့် သင်တန်းများကို ခွင့်ပြုမိန့် (ပါမစ်) များဖြင့် ခွင့်ပြုထား သည်။ ယင်းပါမစ်သည် အခြေခံအဆောက်အအုံ ပြည့်စုံမှုနှင့် လုံလောက်သော အရည်အချင်းရှိ၍ တရားဝင်သော ဆရာ/ဆရာမ၊ ဝန်ထမ်းများ စုစည်းထားနိုင်မှုအပေါ် အခြေခံ၍ ထုတ်ပေးခြင်းဖြစ်သည်။ သို့သော် အဂတိလိုက်စားမှုကြောင့် အရည်အသွေး ပြည့်မီခြင်းမရှိသည့် ကျောင်းများနှင့် သင်တန်းများကို ခွင့်ပြုလိုက်ကြသည်။ အဆိုပါ ကျောင်းများနှင့် သင်တန်းများက အရည်အသွေး မပြည့်မီသူများကိုသာ မွေးဖွားပေးလိုက်သောကြောင့် ဘွဲ့ရသော်လည်း အရည်အချင်းမရှိသောကြောင့် အလုပ်လက်မဲ့ဖြစ်ကြရသည်။
ညံ့ဖျင်းသော ကျန်းမာရေးနှင့် သန့်ရှင်းရေး - အဂတိလိုက်စားမှု ပိုမိုများပြားသော နိုင်ငံများတွင် ပြည်သူများအကြား၌ ကျန်းမာရေးပြဿနာများ ပိုမိုဖြစ်ပွားနိုင်သည်။ အဂတိလိုက်စားမှု များပြားခြင်းသည် သန့်ရှင်းသည့် သောက်သုံးရေမရခြင်း၊ ကောင်းမွန်သည့်လမ်းများ မရှိခြင်း၊ အစားအသောက်များ အရည်အသွေး ညံ့ဖျင်းခြင်း အစရှိသည်တို့ကို ဖြစ်ပေါ်စေသောကြောင့် ဖြစ်သည်။
ပတ်ဝန်းကျင် ညစ်ညမ်းခြင်း - ရေထုညစ်ညမ်းမှု၊ လေထုညစ်ညမ်းမှုနှင့် မြေထုညစ်ညမ်းမှုတို့သည် မော်တော်ယာဉ်များနှင့် စက်ရုံများမှ လာသည်။ အစိုးရအနေဖြင့် ၎င်းတို့အား ပုံမှန်ထိန်းချုပ်စောင့်ကြည့်ရန် လိုသည်။ အစိုးရဌာနများအတွင်း အဂတိလိုက်စားမှုများရှိပါက စက်ရုံများနှင့် လုပ်ငန်းများက အန္တရာယ်ရှိသည့် အညစ်အကြေးများအား မြစ်ချောင်းများနှင့် မြေထုထဲသို့ စွန့်ပစ်ခြင်းအား မျက်နှာလွှဲထားကြမည်ဖြစ်သည်။
ယာဉ်တိုက်မှုများ ဖြစ်ပွားခြင်း - ယာဉ်မောင်းလိုင်စင်များကို စနစ်ကျမှန်ကန်သည့် စစ်ဆေးမှုများ မလုပ်ဘဲ ထုတ်ပေးပါက ယာဉ်တိုက်မှုများနှင့်အတူ သေဆုံးမှုများ ဖြစ်ပွားနိုင်သည်။ အဂတိလိုက်စားမှုကြောင့် မည်သည့်စမ်းသပ်စစ်ဆေးမှုကိုမျှ မခံရဘဲ ယာဉ်မောင်းလိုင်စင် ရရှိနိုင်သည့် နိုင်ငံများ ရှိနေသည်။
ထို့ကြောင့် ပြည်သူတို့အတွက် ထိခိုက်နစ်နာမှုများ ကြီးမားစွာရှိနေသည့် အဂတိလိုက်စားမှုများကို တိုက်ဖျက်ရန် ကျောသားရင်သား မခွဲခြားဘဲ ထိရောက်သောအရေးယူမှုများ ပြုလုပ်နိုင်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(ဧပြီ ၂၁ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
