အကြမ်းအားဖြင့် ယုံကြည်စွာ အပ်နှင်းထားသော အာဏာကို မိမိပုဂ္ဂလိက အကျိုးအတွက် အလွဲသုံးစား ပြုလုပ်ခြင်းကို အဂတိလိုက်စားမှုဟု ခေါ်သည်။ နိုင်ငံရေးဆိုင်ရာ ဆုံးဖြတ်ချက် ချမှတ်သူများက မူဝါဒများနှင့် အင်စတီကျူးရှင်းများကို ကိုင်တွယ်ရာ၌ လည်းကောင်း၊ ရင်းမြစ်များနှင့် ဘဏ္ဍာငွေများ ခွဲဝေချထားရာ၌ လည်းကောင်း လုပ်ငန်းစဉ် စည်းမျဉ်းများကို မလျော်မကန်ပြုခြင်းအား နိုင်ငံရေးဆိုင်ရာ အဂတိလိုက်စားမှုဟု ခေါ်သည်။ မိမိ၏အာဏာ တည်မြဲရေး၊ မိမိရောက်ရှိနေသည့် အနေအထား တည်မြဲရေးနှင့် ချမ်းသာ ကြွယ်ဝရေးတို့အတွက် မိမိ၏ ရာထူးအာဏာကို အလွဲသုံးစား ပြုလုပ်ခြင်းဖြစ်သည်။
ပွင့်လင်းမြင်သာမှုဟူသည် စည်းမျဉ်းစည်းကမ်းများ၊ အစီအစဉ်များ၊ လုပ်ငန်းစဉ်များနှင့် လုပ်ဆောင်ချက်များတို့နှင့် ပတ်သက်၍ အများပြည်သူကို ပွင့်ပွင့်လင်းလင်း အသိပေးခြင်းဖြစ်သည်။ မည်သည့်အတွက်ကြောင့်၊ မည်သို့မည်ပုံ၊ မည်သည့်အရာကို၊ မည်ရွေ့မည်မျှ ပြုလုပ်မည်ကို အသိပေးခြင်း ဖြစ်သည်။ အများပြည်သူနှင့်ဆိုင်သော အရာရှိများ၊ အစိုးရဝန်ထမ်းများ၊ မန်နေဂျာများ၊ ဘုတ်အဖွဲ့ဝင်များနှင့် လုပ်ငန်းရှင်များက အများမြင်သာအောင်နှင့် နားလည်အောင် လုပ်ဆောင်ခြင်းနှင့် ၎င်းတို့၏ လုပ်ဆောင်ချက်များနှင့် ပတ်သက်၍ အစီရင်ခံ တင်ပြခြင်းတို့သည် ပွင့်လင်းမြင်သာမှုရှိခြင်း၌ ပါဝင်သည်။ အများပြည်သူ တို့အနေဖြင့် ၎င်းတို့၏ လုပ်ဆောင်ချက်များကို သိရှိမှသာ ၎င်းတို့ကို တာဝန်ခံနိုင်မည်ဖြစ်သည်။ ပွင့်လင်းမြင်သာမှုသည် အဂတိလိုက်စားမှု တိုက်ဖျက်ရေးအတွက် အသေချာဆုံး နည်းလမ်းဖြစ်ပြီး ပြည်သူအားလုံး၏ အနာဂတ်ဘဝများ ရပ်တည်နေသည့် လူများနှင့် အင်စတီကျူးရှင်းများအပေါ် အများပြည်သူ ယုံကြည်မှု တိုးတက်ရေးအား အထောက်အကူပြုသည်။
အဂတိလိုက်စားမှုသည် လူ့အဖွဲ့အစည်းအား နည်းလမ်းပေါင်းစုံဖြင့် သက်ရောက်မှုရှိသည်။ အဆိုးရွားဆုံး ကိစ္စများ၌ လူအများ၏ အသက်များပင် ဆုံးရှုံးစေနိုင်သည်။ အနည်းဆုံးအနေဖြင့် အဂတိလိုက်စားမှုများကြောင့် အများပြည်သူတို့၏ လွတ်လပ်မှု၊ ကျန်းမာရေးနှင့် ငွေကြေးတို့ ဆုံးရှုံးရသည်။ နိုင်ငံရေး မျက်နှာစာတွင် အဂတိလိုက်စားမှုသည် ဒီမိုကရေစီရေးနှင့် တရားဥပဒေ စိုးမိုးရေးအတွက် အဓိက အဟန့်အတား တစ်ရပ်ဖြစ်သည်။ ဒီမိုကရေစီ စနစ်တစ်ရပ်တွင် ရုံးများနှင့် အင်စတီကျူးရှင်းများသည် မိမိတို့၏ ကိုယ်ကျိုးစီးပွား အတွက် အလွဲသုံးစားပြုသည့်အခါ ၎င်းတို့၏ တရားဝင်ဖြစ်မှုကို ဆုံးရှုံးလိုက်ရသည်။ အဂတိလိုက်စားမှုသည် အခြေကျပြီးသား ဒီမိုကရေစီနိုင်ငံများ၌ပင် အကြီးအကျယ် ထိခိုက်မှုများ ဖြစ်စေနိုင်ရာ အခြေတည်စ ဒီမိုကရေစီနိုင်ငံများ အတွက်မူ ထိခိုက်မှုမှာ ဆိုဖွယ်ရာပင် မရှိတော့ပေ။ အဂတိလိုက်စားမှုများ ရှိနေသည့် အခြေအနေ တစ်ရပ်အောက်၌ တာဝန်ခံမှုရှိသော နိုင်ငံရေး ခေါင်းဆောင်မှုတစ်ရပ် ဖွံ့ဖြိုးရန်မှာ အလွန်အမင်း ကြီးမားသည့် စိန်ခေါ်မှုကြီး တစ်ရပ်ဖြစ်သည်။ အဂတိလိုက်စားမှုများကြောင့် နိုင်ငံရေးစနစ်အပေါ်သို့ လည်းကောင်း၊ အင်စတီကျူးရှင်းများအပေါ်သို့ လည်းကောင်း၊ ခေါင်းဆောင်မှုအပေါ်သို့ လည်းကောင်း၊ အများပြည်သူတို့၏ ယုံကြည်မှုသည် ယုတ်လျော့ကျဆင်း၍ လာမည်ဖြစ်သည်။ ပြည်သူများအနေဖြင့် နိုင်ငံရေးအပေါ် အယုံအကြည်ကင်းမဲ့ကာ စိတ်မဝင်စားတော့ပါက အဂတိလိုက်စားမှု တိုက်ဖျက်ရေးမှာလည်း ပို၍ပင် ဝေး၍သွားမည်ဖြစ်သည်။
မည်သို့သော အဂတိလိုက်စားမှု တိုက်ဖျက်ရေး ဥပဒေများ ပြဋ္ဌာန်းစေကာမူ နိုင်ငံရေးသမားများ၊ ရုံးများ၊ အင်စတီကျူးရှင်းများ အစရှိသည်တို့ အနေဖြင့် ပွင့်လင်းမြင်သာမှု မရှိပါက လည်းကောင်း၊ အများပြည်သူတို့ အနေဖြင့် ၎င်းတို့အပေါ် အယုံအကြည်ကင်းမဲ့ကာ စိတ်ပါဝင်စားမှုမရှိပါက လည်းကောင်း ထိရောက်သည့် အဂတိလိုက်စားမှု တိုက်ဖျက်ရေး ဖြစ်လာနိုင်မည် မဟုတ်ပါကြောင်း The Daily Eleven သတင်းစာက ရေးသားအပ်ပါသည်။
မတ်လ ၁၀ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
