အချက်အလက်ခေတ်ဟု ခေါ်ဆိုသော ယနေ့ခေတ်အား အဆုံးအဖြတ်ပေးသော နည်းပညာမှာ အင်တာနက်ဖြစ်သည်။ ၂၁ ရာစု အစောပိုင်းတွင် ကြိုးမဲ့ဆက်သွယ်ရေး ပေါက်ကွဲမှုနှင့်အတူ အနှေးအမြန်၊ ထိရောက်မှုနှင့် ဈေးနှုန်းများ အကြီးအကျယ် မညီမျှမှုများ ရှိသော်လည်း ယခုအခါ လူသားအားလုံးနီးပါးသည် အချင်းချင်း ဆက်သွယ်၍ရပြီဟု ဆိုနိုင်သည်။ လူများ၊ ကုမ္ပဏီများနှင့် အင်စတီကျူးရှင်းများသည် နည်းပညာပြောင်းလဲမှု နက်ရှိုင်းလာခြင်းကို ခံစားလာရပြီဖြစ်သည်။ သို့သော် ဥပမာအားဖြင့် အင်တာနက်ကို အပြင်းအထန်သုံးစွဲမှုသည် အထီးကျန်ဆန်ခြင်း၊ လူ့အသိုက်အဝန်းမှ ဆုတ်ခွာကာ လူ့ အသိုက်အဝန်းနှင့် ကင်းကွာလာခြင်းတို့ ပိုမိုများပြားလာသည်ဟု ဖော်ပြတတ်ကြသည်။ မည်သို့ပင်ဆိုစေ ရရှိနိုင်သော အထောက်အထားများအရ အင်တာနက်သည် လူများကို အထီးကျန်ဆန်ခြင်း သို့မဟုတ် လူမှုရေးနှင့် ကင်းကွာလာစေခြင်းဖြစ်စေမှု မရှိဘဲ အမှန်တကယ်၌ လူမှုရေး ပိုမိုတိုးတက်လာခြင်း၊ လူ့အသိုက်အဝန်းထဲ ဝင်ဆံ့လာခြင်းနှင့် မိသားစု နှင့် မိတ်ဆွေအပေါင်းအသင်းတို့၏ ဆက်ဆံရေး ပိုမိုအားကောင်းလာခြင်းတို့ကိုပင် ဖြစ်ပေါ်စေကြောင်း တွေ့ရှိရသည်။
လူမှုကွန်ရက်များသည် ဒီဂျစ်တယ်တော်လှန်ရေး၏ ထွက်ကုန်တစ်ရပ်ဖြစ်ပြီး လူမှု- ယဉ်ကျေးမှုနှင့်ပတ်သက်၍ အဓိကအပြောင်းအလဲအချို့ကို ဖြစ်ပေါ်စေခဲ့သည်။ ယင်းတို့ ထဲမှ တစ်ခုမှာ မိမိကိုယ်ကိုယ် ဗဟိုပြုသည့် လူ့အဖွဲ့အစည်းတစ်ရပ် ပေါ်ထွန်းလာခြင်းဖြစ် သည်။ ယင်း၏ အမှတ်လက္ခဏာအဖြစ် တစ်ဦးချင်းဆိုင်ရာ ကြီးထွားမှုကို အဓိကထားမှု မြင့်တက်လာခြင်းနှင့် နေရာ၊ အလုပ်၊ မိသားစုနှင့် အထွေထွေ သဘောအကြောင်းရင်းခံများအားဖြင့် လူ့အသိုက်အဝန်းအပေါ် နားလည်မှု လျော့ကျလာခြင်းတို့ဖြစ်သည်။ သို့သော် တစ်သီးပုဂ္ဂလဆန်လာခြင်းသည် အထီးကျန်ဆန်ခြင်းဟု အဓိပ္ပာယ်မရသကဲ့သို့ လူ့အသိုက်အဝန်း ပျောက်ဆုံးခြင်းဟုလည်း အဓိပ္ပာယ်မရပေ။ ယင်းအစား လူမှုဆက်ဆံရေးကို တစ်ဦးချင်းအကျိုးစီးပွားများ၊ စံတန်ဖိုးများနှင့် မျှော်မှန်းချက်များအပေါ် အခြေခံလျက် ပြန်လည်တည်ဆောက်မှုပြုခြင်းဟု ဆိုနိုင်သည်။ အွန်လိုင်းပေါ်နှင့် အွန်လိုင်းပြင်ပ အပြန်အလှန်တုံ့ပြန်မှု၊ ဆိုက်ဘာဝန်းကျင်နှင့် တကယ့်ဝန်းကျင်တို့ ပေါင်းစပ်ထားသောဖြစ်စဉ်တစ်ရပ်၌ တစ်သီးပုဂ္ဂလလူသား၏ နှစ်သက်ခံလိုမှုဘက် တိမ်းညွတ်သော ရှာပုံတော်များမှ တစ်ဆင့် လူ့အသိုက်အဝန်းတစ်ရပ်ကို ဖွဲ့စည်းလိုက်ခြင်းဖြစ်သည်။
တစ်ကမ္ဘာလုံးအနေဖြင့် ကြည့်ပါက ၂၀၀၇ ခုနှစ် နိုဝင်ဘာတွင် လူမှုကွန်ရက်များကို အသုံးပြုသည့်အချိန်သည် အီးမေးလ်များကို အသုံးပြုသည့်အချိန်ထက် ကျော်လွန်သွားခဲ့သည်။ ၂၀၀၉ ခုနှစ် ဇူလိုင်တွင် လူမှုကွန်ရက်များကို အသုံးပြုသူအရေအတွက်သည် အီး မေးလ်များကို အသုံးပြုသူအရေအတွက်ထက် ကျော်လွန်သွားခဲ့သည်။ ယနေ့တွင် လူမှုကွန်ရက်များသည် လုပ်ဆောင်ချက်အမျိုးအစားအားလုံးနှင့် တစ်ဦးချင်းအလိုက်နှင့် လုပ်ငန်းအလိုက် နှစ်ရပ်စလုံးတို့အတွက် အများပိုမိုနှစ်သက်ရာ ပလက်ဖောင်းများ ဖြစ်လာခဲ့ ပြီဖြစ်သည်။ လူမှုဆက်ဆံရေးစွမ်းရည်သည် သိသိသာသာမြင့်တက်လာခဲ့ပြီဖြစ်သော်လည်း ယင်းမှာ ကွဲပြားခြားနားသော လူမှုဆက်ဆံရေးစွမ်းရည် ဖြစ်လာသည်။ Facebook အသုံးပြုသူအများစုသည် နေ့စဉ်အသုံးပြုကြပြီး ဒိုင်မေးရှင်းအမျိုးမျိုးမှ ဆက်သွယ်ကြ သည်။ သို့သော် ၎င်းတို့ရွေးချယ်သော ဒိုင်မေးရှင်းများသာဖြစ်သည်။ အွန်လိုင်းပေါ်မှ ဘဝသည် တကယ့်ရုပ်ပိုင်းဆိုင်ရာအရ အကောင်အထည်ရှိသောဘဝထက် ပို၍လူမှုရေး ဆန်လာသည်။
မည်သို့ပင်ဆိုစေကာမူ လူ့အဖွဲ့အစည်းအပေါ် အင်တာနက်၏ သက်ရောက်မှုသည် ကြီးမားလွန်းပြီး လူမှုဆက်ဆံရေးအတွက်ပင် အဓိကကျ၍လာနေသည်ကို သတိပြုရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။
(ဖေဖော်ဝါရီ ၆ ရက် ထုတ် The Daily Eleven သတင်းစာ၏ အယ်ဒီတာ့အာဘော်)
