ခေါင်းဆောင်မှုအခန်းကဏ္ဍနှင့် ပတ်သက်၍ အဖွဲ့အစည်းတစ်ရပ်အနေဖြင့် တန်ဖိုးမြှင့်တင်လိုပါက ဆုံးဖြတ်ချက်များကို တောင်စဉ်ရေမရ ပေါက်ကရပုံစံမျိုးမဟုတ်ဘဲ ချီတုံချတုံပုံစံမျိုးမဟုတ်ဘဲ ချမှတ်နိုင်ရန် အရေးကြီးသည်။ အာဏာရှင်လက္ခဏာရပ်များ မပြဘဲ မိမိတို့၏ လုပ်ပိုင်ခွင့်ကို ယုံယုံကြည်ကြည် အသုံးပြုလျက် ဆုံးဖြတ်ချက်များ ချမှတ်နိုင်သည့် ကြီးကြပ်သူများနှင့် မန်နေဂျာတို့သည် လူတို့၏ လေးစားမှုကို ရရှိတတ်ကြသည်။  အဖွဲ့များကို ဦးဆောင်နိုင်စွမ်းရှိကြောင်း ပြသရန်အတွက် မိမိ၏ လုပ်ငန်းတာဝန်ပိုင်းဆိုင်ရာ ကျွမ်းကျင်မှုကို ပိုမိုထက်မြက်အောင် ပြုလုပ်ခြင်းနှင့် ကောင်းမွန်သော ဆက်ဆံရေးနှင့် မှန်ကန်သော လုပ်ငန်းသဘောတရားများကို အသုံးပြုခြင်းတု့ိ လိုအပ်သည်။

မိမိ၏အခန်းကဏ္ဍကို ကျွမ်းကျင်ပိုင်နိုင်မှုရှိသော၊ အများလက်ခံသော၊ ယုံကြည်အားကိုးရသော ခေါင်းဆောင်တစ်ဦးအဖြစ် ခိုင်မာစွာ ပြသနိုင်ရန်လိုသည်။ ယင်းသည် ဆုံးဖြတ်ချက်ပြတ်သားသော ခေါင်းဆောင်တစ်ဦး၏ အခြေခံအရည်အချင်းဖြစ်ပြီး ဝန်ထမ်းများ သို့မဟုတ် လုပ်သားများသည်လည်း ကြီးကြပ်သူ သို့မဟုတ် မန်နေဂျာများ၌ ယင်းအရည်အချင်းကို ရှာဖွေတတ်ကြသည်။ အခြားဝန်ထမ်းများက မိမိ၏ အရည်အချင်းနှင့် အရည်အသွေးများကို  ယုံကြည်မှုရှိအောင် တည်ဆောက်ရမည့်အပြင် ကျွမ်းကျင်ပိုင်နိုင်မှုကိုလည်း ပြသရမည် ဖြစ်သည်။ ကျွမ်းကျင်ပိုင်နိုင်မှုကို တည်ဆောက်ခြင်းဟူသည် မိမိတာဝန်ယူရာဌာန၏ လုပ်ငန်းဆောင်တာများကို ညွှန်ကြားရန် လိုအပ်သော လုပ်ငန်းဆိုင်ရာ ကျွမ်းကျင်မှုကို  ပြသခြင်းဖြစ်သည်။

မှန်ကန်သော ဆုံးဖြတ်မှုမျိုးကို ကျင့်သုံးနိုင်ရန်လိုသည်။ ကောင်းမွန်သည့် ဆုံးဖြတ်ချက်များ ချနိုင်သည့် ကျွမ်းကျင်မှုများသည် ခေါင်းဆောင်မှု ကျွမ်းကျင်ခြင်းသာမက လုပ်ငန်းတာဝန်များ ဆောင်ရွက်ရာတွင် မှန်ကန်သော ဆုံးဖြတ်မှုမျိုးကို ကျင့်သုံးနိုင်သည့် အရည်အသွေးအပေါ်၌ မူတည်နေသည်။ မှန်ကန်သော ဆုံးဖြတ်မှုဟူသည် လုံလောက်သော အချက်အလက်များ မရသေးမီအထိ မိမိကောက်ချက်များကို အရန်အဖြစ်သာ သိုမှီးထားခြင်းနှင့် ခိုင်မာသည့် အချက်အလက်မပါဘဲ လက်တန်းဆုံးဖြတ်ချက်ချမှုမျိုး မပြုလုပ်ခြင်း ဖြစ်သည်။ လုပ်ငန်းခွင်အကြောင်းအရာများကို ဖြေရှင်းရန် အခြားသူများ၏ အဆိုပြုမှုများအပေါ်သာ မှီခိုမည့်အစား မိမိ၏ ကိုယ်ပိုင်သုတေသနပြုမှုမျိုး လိုအပ်သည်။

မိမိလက်အောက်ဝန်ထမ်းများ၏ အရည်အသွေးများ၊ ကျွမ်းကျင်မှုများနှင့် အကျိုးစီးပွားများကို သိရှိမှုအပေါ် အခြေခံလျက် တာဝန်နှင့်ဝတ္တရားတို့နှင့်ပတ်သက်၍ ၎င်းတို့ကိုယ်စား တာဝန်ခံရမည် ဖြစ်သည်။ ဆောင်ရွက်နိုင်မှု အဆင့်အတန်းများအလိုက် တာဝန်နှင့် ဝတ္တရားများကို ခွဲဝေချထားပေးရမည် ဖြစ်သော်လည်း လက်အောက်ဝန်ထမ်းများအား အသေးစိတ် စီမံခန့်ခွဲရန် မလိုအပ်ပါ။ အသေးစိတ် စီမံခန့်ခွဲခြင်းကြောင့် လက်အောက်ဝန်ထမ်းများအနေဖြင့် ၎င်းတို့၏ ကျွမ်းကျင်မှုအား မိမိအနေဖြင့် ယုံကြည်မှုမရှိဟု အထင်ရောက်စေနိုင်သည်။ အသေးစိတ် စီမံခန့်ခွဲသော ခေါင်းဆောင်များကို လက်အောက်ဝန်ထမ်းများက ကြောက်ရွံ့တတ်ကြသည်။ ခေါင်းဆောင်သည် ၎င်းတို့၏ ဆောင်ရွက်ချက်၌ အမြဲတမ်း အပြစ်အနာအဆာ ရှာနေသည်ဟု အထင်ရောက်သွားတတ်သည်။

မိမိ၏ လုပ်ပိုင်ခွင့်၊ အတွေ့အကြုံနှင့် လုပ်ငန်းဆိုင်ရာ အသိအမြင် အဆင့်အတန်းများပေါ် မူတည်၍ ရွေးချယ်မှုများ ပြုလုပ်ရမည်။ လက်အောက်ဝန်ထမ်းများ၏ အကြံဉာဏ်ဆိုင်ရာ ထည့်ဝင်မှုများကို လေးစားရမည်ဖြစ်သော်လည်း ဆုံးဖြတ်ချက်ချရာ၌ ဝန်ထမ်းတစ်ဦးတစ်ယောက်တည်း၏ တင်ပြချက်ကို အသုံးပြုခြင်းအား ရှောင်ကြဉ်ရမည်။ မိမိ၏အားနည်းချက်များကို ပွင့်ပွင့်လင်းလင်း ဝန်ခံပြီး မိမိ၏ လက်အောက်ဝန်ထမ်းများထံမှ လိုအပ်သည်များကို ပွင့်ပွင့်လင်းလင်း လေ့လာသင်ယူရမည်။ ကြီးကြပ်သူများနှင့်  မန်နေဂျာများသည် အရာရာပြည့်စုံသူများ မဟုတ်ကြပါ။ သို့သော် မိမိ၏ အားနည်းချက်များနှင့် ပတ်သက်၍ မိမိလက်အောက်ဝန်ထမ်းများအပေါ် ရိုးသားမှုရှိပါက ၎င်းတို့အနေဖြင့် မိမိသည် ဆုံးဖြတ်ချက် ပြတ်သားသော လုပ်ဆောင်ချက် ပြုလုပ်သည့်အခါ ယုံကြည်နိုင်မည် ဖြစ်သည်။ မိမိ၏ အားနည်းချက်များနှင့် မိမိကိုယ်မိမိ ယုံကြည်မှုတို့သည် ဟန်ချက်ညီရမည် ဖြစ်သည်။ မိမိသည် ပြည့်စုံသူတစ်ဦး မဟုတ်ကြောင်း အဆက်မပြတ် ဝန်ခံနေခြင်းမျိုးကို မိမိကိုယ်ရည်ကိုယ်သွေးထဲအထိ ပေါင်းထည့်ခြင်းမျိုးဖြစ်အောင် မပြုသင့်ပါ။ ယင်းက မိမိသည် ယုံကြည်ရလောက်သည့် ခေါင်းဆောင်တစ်ဦးမဟုတ်ကြောင်း ဖော်ထုတ်ပြနေသကဲ့သို့ ဖြစ်စေနိုင်သည်။ သြဇာတိက္ကမနှင့် ပြည့်စုံသော ခေါင်းဆောင်ဟူသည် မိမိ၏ အရည်အသွေးကို အခြားသူများအား ဦးဆောင်နိုင်ခြင်းနှင့် အခြားသူများထံမှ လေ့လာသင်ယူနိုင်ခြင်းတု့ိနှင့် ပေါင်းစပ်ထားခြင်း ဖြစ်သည်။

မည်သည့်အဖွဲ့အစည်းမဆို ဆုံးဖြတ်ချက်ပြတ်သားသော ခေါင်းဆောင်မှုမျိုး မရှိပါက ကျရှုံးမှုဆီသို့သာ ဦးတည်သွားလိမ့်မည် ဖြစ်ပါကြောင်း The Daiy Eleven သတင်းစာက ရေးသားအပ်ပါသည်။

(ဒီဇင်ဘာ ၅ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)