လူမှုအဝန်းအဝိုင်းအတွင်း မှန်ကန်၍ခိုင်မာသည့် ကတိကဝတ်များ၊ စည်းမျဉ်းစည်းကမ်းများဖြင့် ရပ်တည်လုပ်ဆောင်လျက်ရှိသော အဖွဲ့အစည်း၊ အစုအဖွဲ့များ၊ လုပ်ငန်း များရှိသကဲ့သို့ အထွေထွေအဆင်မပြေမှုများနှင့် လိုအပ်ချက်များရှိနေသူများအတွက် မက်လုံးပေး လိမ်လည်နေခြင်းများစွာလည်း ရှိနေသည်ကို သတိပြုကြရမည်ဖြစ်သည်။ ထိုအထဲတွင် အတိုးနှုန်းမြင့်မားစွာပေးမှု၊ အစုရှယ်ယာအပေါ် အမြတ်ဝေစု များပြားစွာ ခွဲဝေပေးမှု၊ ဆင့်ပွားဈေးကွက်ပုံစံဖြင့် မက်လုံးပေးမှု (Multi-Level Marketing - MLM) များလည်း အပါအဝင်ဖြစ်နေရာ ယင်းကဲ့သို့ လုပ်ဆောင်နေခြင်းများကို ပြည်သူများအနေဖြင့် အထူးသတိပြုရှောင်ရှားရန် အစိုးရက ပန်ကြားလွှာထုတ်ပြန်၍ သတိပေးမှုများ ပြုလုပ်လျက်ရှိပါသည်။
အတိုးနှုန်းမြင့်မားစွာပေးမှု၊ အစုရှယ်ယာအပေါ် အမြတ်ဝေစု များပြားစွာ ခွဲဝေပေးမှု၊ ဆင့်ပွားဈေးကွက်ပုံစံဖြင့် မက်လုံးပေးမှု (Multi-Level Marketing - MLM) များကို ပြည်သူများအနေဖြင့် အထူးသတိပြု ရှောင်ရှားရန် စီမံကိန်းနှင့် ဘဏ္ဍာရေးဝန်ကြီးဌာနနှင့် မြန်မာနိုင်ငံတော်ဗဟိုဘဏ်တို့ က နိုင်ငံပိုင်သတင်းစာတွင် အောက်တိုဘာ ၁၁ ရက်က အသိပေးပန်ကြားချက် ထုတ်ပြန်ခဲ့ခြင်း ဖြစ်သည်။
မြန်မာနိုင်ငံတွင် ဘဏ်လုပ်ငန်း၊ ငွေကြေးဝန်ဆောင်မှုကုမ္ပဏီ လုပ်ကိုင်မည်ဆိုပါက မြန်မာနိုင်ငံတော်ဗဟိုဘဏ် ဥပဒေ၊ ငွေရေးကြေးရေး အဖွဲ့အစည်းဥပဒေများနှင့်အညီ လုပ်ကိုင်ရမည်ဖြစ်ပြီး မြန်မာနိုင်ငံတော်ဗဟိုဘဏ်က လုပ်ကိုင်ခွင့်ပြုခြင်း၊ ကြီးကြပ်ကွပ်ကဲခြင်း၊ စစ်ဆေးကြပ်မတ်ခြင်းတို့ကို ဆောင်ရွက်နေကြောင်း၊ အသေးစား ငွေရေးကြေးရေး ဝန်ဆောင်မှုလုပ်ငန်း ဆောင်ရွက်မည်ဆိုပါက အသေးစားငွေရေးကြေးရေး ဝန်ဆောင်မှုလုပ်ငန်း ဥပဒေနှင့်အညီ လုပ်ကိုင်ရမည်ဖြစ်ပြီး ငွေရေးကြေးရေး ကြီးကြပ်စစ်ဆေးရေး ဦးစီးဌာနမှ လုပ်ကိုင်ခွင့်ပြုခြင်း၊ ကြီးကြပ်ကွပ်ကဲခြင်း၊ စစ်ဆေးကြပ်မတ်ခြင်းတို့ ဆောင်ရွက်နေကြောင်း၊ ထို့အတူ အာမခံကုမ္ပဏီများအနေဖြင့်လည်း အာမခံလုပ်ငန်း လုပ်ကိုင်ခွင့်ဥပဒေနှင့်အညီ ဆောင်ရွက်ရမည်ဖြစ်ပြီး အာမခံလုပ်ငန်း ကြီးကြပ်ရေးအဖွဲ့က လုပ်ကိုင် ခွင့်ပြုခြင်း၊ ကြီးကြပ်ကွပ်ကဲခြင်း၊ စစ်ဆေးကြပ်မတ်ခြင်းတို့ ဆောင်ရွက်နေကြောင်း စသည်ဖြင့် ငွေကြေးဝန်ဆောင်မှုလုပ်ငန်းများကို လုပ်ကိုင်ခွင့်မရှိဘဲ လုပ်ကိုင်နေသူများ၊ အစုရှယ်ယာ ရောင်းချခွင့်မရှိဘဲ ရောင်းချနေသူများကြောင့် အချို့နေရာဒေသများတွင် မသိနားမလည်သူ ပြည်သူများအနေဖြင့် မှားယွင်း ရင်းနှီးမြှုပ်နှံမိရာမှာ ငွေကြေးနစ်နာ ဆုံးရှုံးမှုများ ဖြစ်ပေါ်ခဲ့သည်ကို ကြားသိရကြောင်း စသည်ဖြင့် “မိဘပြည်သူများသို့ ပန်ကြားလွှာ” ဟူ၍ စီမံကိန်းနှင့် ဘဏ္ဍာရေးဝန်ကြီးဌာနနှင့် မြန်မာနိုင်ငံတော်ဗဟိုဘဏ်က ကြေညာချက် ထုတ်ပြန်ခဲ့ခြင်းဖြစ်သည်။ မြန်မာနိုင်ငံတွင် လုပ်ကိုင်ခွင့်ရသည့် နိုင်ငံပိုင်ဘဏ်လေးခု၊ ပုဂ္ဂလိကဘဏ် ၂၄ ခု၊ စုစုပေါင်းဘဏ် ၂၈ ခုရှိပြီး ငွေကြေးဝန်ဆောင်မှုကုမ္ပဏီ စုစုပေါင်း ၁၅ ခုရှိကြောင်း၊ အသေးစား ငွေရေးကြေးရေး ဝန်ဆောင်မှု လုပ်ငန်း ၁၆၈ ခုကို ခွင့်ပြုပေးထားပြီး ငွေချေးသက်သေခံ လက်မှတ်လဲလှယ် ရောင်းဝယ်ရေးကုမ္ပဏီ စုစုပေါင်းခြောက်ခုကို ခွင့်ပြုပေးထားကြောင်းကိုလည်း ထည့်သွင်း အသိပေးထားသည်။
သို့ပါ၍ မလျော်ကန်သောနည်းများဖြင့်သော် လည်းကောင်း၊ သတ်မှတ်စည်းမျဉ်း ဥပဒေများကို ချိုးဖောက်၍ မက်လုံးများပေးကာ အများပြည်သူ လူထုကို နစ်နာဆုံးရှုံးမှုများ ဖြစ်စေသည့် လုပ်ဆောင်မှုများအား သတိပြုသင့်ပါကြောင်း The Daily Eleven သတင်းစာက ရေးသားအပ်ပါသည်။
(အောက်တိုဘာ ၁၂ ရက်ထုတ် The Daily Eleven သတင်းစာ၏ အယ်ဒီတာ့ အာဘော်)
