ဆောက်လုပ်ရေး၊ စက်မှု၊ လျှပ်စစ်နှင့် စွမ်းအင်ဆိုင်ရာကော်မတီအား အမျိုးသားလွှတ်တော်တွင် ဖွဲ့စည်းခဲ့သည်။
မတ် ၂၁ ရက်ကပြုလုပ်သည့် အမျိုးသားလွှတ်တော် အစည်းအဝေးတွင် ယင်းကော်မတီနှင့်ပတ်သက်ပြီး ကော်မတီ၏တာဝန်၊ လုပ်ပိုင်ခွင့်၊ ရပိုင်ခွင့်၊ သက်တမ်းများနှင့် ပတ်သက်ပြီး အမျိုးသားလွှတ်တော်ဥက္ကဋ္ဌက တာဝန်ပေးအပ်သည့် လွှတ်တော်ကိုယ်စားလှယ် ဦးမင်းဦးက ဖတ်ကြားတင်ပြခဲ့ကာ ကော်မတီတွင် ပါဝင်သူများ၏ အမည်စာရင်းများ လွှတ်တော်သို့တင်ပြခဲ့ပြီး အမျိုးသားလွှတ်တော်က အတည်ပြုခဲ့သည်။
ကော်မတီ၏ လုပ်ငန်းတာဝန်များအနေဖြင့် ဆောက်လုပ်ရေး၊ စက်မှု၊ လျှပ်စစ်နှင့် စွမ်းအင်ဆိုင်ရာလုပ်ငန်းများကို အကောင်အထည်ဖော် ဆောင်ရွက်နေသည့် ဝန်ကြီးဌာန၊ အဖွဲ့အစည်းများ၏မူဝါဒ၊ ရည်မှန်းချက်များ၊ စီမံကိန်းများ၊ လုပ်ငန်းစဉ်များ အကောင်အထည်ဖော် ဆောင်ရွက်နေမှု၏ လက်ရှိရောက်ရှိနေသော အခြေအနေများကို လေ့လာသုံးသပ်အကြံပြုခြင်း၊ ကဏ္ဍများအလိုက် သုံးသပ်အကြံပြုရန်၊ ဆောက်လုပ်ရေးကဏ္ဍကို စနစ်ကျန၍ ခေတ်မီစွာဖွံ့ဖြိုးတိုးတက်စေရန်၊ မြို့ပြနှင့် ကျေးလက်ဒေသနေ ပြည်သူလူထု၏ လူမှုစီးပွားဘ၀ တိုးတက်မြင့်မားလာစေရေးအတွက် လမ်းတံတားများကို အဆင့်မီ အသစ်ဖောက်လုပ်တည်ဆောက်ခြင်း၊ မွမ်းမံပြင်ဆင်ခြင်း၊ ပြည်သူလူထုအတွက် သင့်လျော်ကောင်းမွန်သည့် အိမ်ရာများကို ဖြည့်ဆည်းဆောင်ရွက်ရန်ဖြစ်ကြောင်း ဦးမင်းဦးက လွှတ်တော်သို့တင်ပြခဲ့သည်။
လျှပ်စစ်ဓာတ်အား လုံလောက်ပြည့်ဝစွာ ဖြန့်ဖြူးပေးနိုင်ရေးအတွက် ရနိုင်သမျှ ရေအား၊ လေအား၊ နေအား၊ အပူစွမ်းအင်နှင့် အခြားစွမ်းအင်အရင်းအမြစ်များကို အသုံးပြု၍ လျှပ်စစ်ဓာတ်အား ထုတ်လုပ်ပြီး ထိရောက်အကျိုးရှိစွာ အသုံးပြုနိုင်စေရန်၊ လျှပ်စစ်ဓာတ်အားထုတ်လုပ်ခြင်း၊ ဖြန့်ဖြူးခြင်းလုပ်ငန်းများကို ခေတ်မီနည်းစနစ်များနှင့်အညီ ဆောင်ရွက်၍ ဒေသအလိုက် ဖြန့်ဖြူးရေးလုပ်ငန်းများတွင် ပုဂ္ဂလိကပိုင်းမှ ပါဝင်ဆောင်ရွက်မှုကို အားပေးမြှင့်တင်သွားရန်၊ စွမ်းအင်ကဏ္ဍတွင် ပုဂ္ဂလိကအပိုင်းမှ ပိုမိုပါဝင်လာစေရေးကို မြှင့်တင်ဆောင်ရွက်ရန်၊ စွမ်းအင်အမျိုးအစားသစ်များနှင့် ပြန်လည်ပြည့်ဖြိုးမြဲ စွမ်းအင်အရင်းအမြစ်များကို ကျယ်ကျယ်ပြန့်ပြန့် အသုံးပြုနိုင်ရေးအတွက် မြှင့်တင်ဆောင်ရွက်ရန် စသည့်အချက်များသည် ကော်မတီ၏ လုပ်ငန်းတာဝန်များဖြစ်ကြောင်း သိရသည်။
အမျိုးသားလွှတ်တော် ဆောက်လုပ်ရေး၊ စက်မှု၊ လျှပ်စစ်နှင့် စွမ်းအင်ဆိုင်ရာကော်မတီဥက္ကဋ္ဌအဖြစ် ကရင်ပြည်နယ် မဲဆန္ဒနယ် အမှတ် (၁) မှ ဦးစောမိုးမြင့် (ခ) ဆင်မြူရယ်၊ အတွင်းရေးမှူးအဖြစ် မကွေးတိုင်းဒေသကြီး မဲဆန္ဒနယ်အမှတ် (၉) မှ ဦးမြမင်းဆွေ၊ အဖွဲ့ဝင်များအဖြစ် ကချင်ပြည်နယ်မဲဆန္ဒနယ် အမှတ် (၁၂) မှ ဦးနိုင်ကိုကို၊ ကယားပြည်နယ် မဲဆန္ဒနယ်အမှတ် (၁) မှ ဦးဖြေရယ် (ခ) ဦးမြင့်သန်းထွန်း၊ ကရင်ပြည်နယ် မဲဆန္ဒနယ်အမှတ် (၅) မှ ဦးစိုင်းသန်းနိုင်၊ ချင်းပြည်နယ် မဲဆန္ဒနယ် အမှတ် (၁) ဦးငွန်ဟေး၊ စစ်ကိုင်းတိုင်းဒေသကြီး မဲဆန္ဒနယ်အမှတ် (၈) မှ ဦးကိုကိုနိုင်၊ တနင်္သာရီတိုင်းဒေသကြီး မဲဆန္ဒနယ်အမှတ် (၇) မှ ဦးဇော်ဟိန်း၊ မန္တလေးတိုင်းဒေသကြီး မဲဆန္ဒနယ်အမှတ် (၉) မှ ဦးမောင်မောင်ဆွေ၊ မွန်ပြည်နယ် မဲဆန္ဒနယ်အမှတ် (၁၀) မှ ဦးစိုးသီဟ (ခ) မောင်တူး၊ ရခိုင်ပြည်နယ်မဲဆန္ဒနယ် အမှတ် (၈) မှ ဦးကျော်ကျော်ဝင်း၊ ရန်ကုန်တိုင်းဒေသကြီး မဲဆန္ဒနယ်အမှတ် (၇) မှ ဦးရဲမြင့်ဦး၊ ရှမ်းပြည်နယ် မဲဆန္ဒနယ်အမှတ် (၁၀) မှ ဦးမိုဏ်းအုန်းခိုင်၊ ဧရာဝတီတိုင်းဒေသကြီး မဲဆန္ဒနယ်အမှတ် (၁) မှ ဦးစိုးမိုး၊ တပ်မတော်သားကိုယ်စားလှယ် ဗိုလ်မှူးကြီးဇော်လွင်တို့ဖြစ်ကြောင်း လွှတ်တော်က အတည်ပြုခဲ့သည်။
ဦးစောမိုးမြင့် (ခ) ဆင်မြူရယ်က “မြန်မာပြည်ကလမ်း အာရှလမ်းပိုင်းထဲ ပါဝင်လာမှာဖြစ်တဲ့အတွက် လမ်းတွေကို နိုင်ငံတကာအဆင့်မီအောင် လုပ်ဖို့လိုတယ်။ အခုလည်း တိုင်းပြည်ရဲ့ ဘဏ္ဍာရေးအခြေအနေကြောင့် လမ်းတွေကို နိုင်ငံတကာချေးငွေနဲ့လုပ်ဖို့ ကြိုးစားနေတာလည်းရှိတယ်။ တစ်ချိန်တည်းမှာပဲ B.O.T နဲ့လုပ်နေတဲ့ ကုမ္ပဏီတွေကနေပြီးတော့ ခရီးသွားလူထုတွေ စိတ်ချမ်းသာမှုပေးနိုင်တဲ့ အခြေအနေမရှိဘူးလေ။ ဒါတွေကတော့ မေးရမယ့်အပိုင်းတွေပေါ့” ဟု သတင်းထောက်များအား ပြောကြားသည်။
