Myanmar Development Effectiveness Roundtable အခမ်းအနားကို တွေ့ရစဉ်
ဖွံ့ဖြိုးတိုးတက်ရေးအတွက် ဘဏ္ဍာရေး လိုအပ်ချက်များကို အစိုးရ-ပုဂ္ဂလိက ပူးပေါင်းခြင်း၊ နိုင်ငံအချင်းချင်းနှင့် နိုင်ငံတကာ ရင်းနှီးမြှုပ်နှံမှုများကို ကြိုဆိုခြင်းတို့ဖြင့် ရင်းနှီးမြှုပ်နှံမှုပုံစံကို ပြောင်းလဲမည်ဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ်က ပြောကြားသည်။
“မြန်မာနိုင်ငံအတွက် ဖွံ့ဖြိုးမှုအကူအညီတွေ ပေးအပ်နေတဲ့ နိုင်ငံတကာ အသိုက်အဝန်းတွေရဲ့ စိတ်ကောင်းစေတနာတွေကို အသိအမှတ်ပြုသလို မြန်မာနိုင်ငံအနေနဲ့ စဉ်ဆက်မပြတ် ဖွံ့ဖြိုးမှုပန်းတိုင်ကို ရောက်ရှိဖို့ ကြိုးပမ်းဆောင်ရွက်နေတဲ့ အချိန်မှာ မိမိတို့ ဖွံ့ဖြိုးမှု အကူအညီများ ညှိနှိုင်းရေးအဖွဲ့က မျက်ခြည်မပြတ်ခဲ့ပါဘူး။ ဒီလိုဆောင်ရွက်ရာမှာ မိမိတို့အတွက် အဓိကကျတဲ့ဖွံ့ဖြိုးမှု မိတ်ဖက်အဖွဲ့အစည်း တစ်ရပ်ဖြစ်တဲ့ ပုဂ္ဂလိကကဏ္ဍ အဖွဲ့အစည်းများနဲ့ အတူတကွ လက်တွဲသွားမှာ ဖြစ်ပါတယ်။ နိုင်ငံရဲ့ ဖွံ့ဖြိုးတိုးတက်မှုအတွက် ဘဏ္ဍာရေး လိုအပ်ချက်များကို အစိုးရ-ပုဂ္ဂလိက ပူးပေါင်းခြင်း၊ နိုင်ငံအချင်းချင်းနဲ့ နိုင်ငံတကာ ရင်းနှီးမြှုပ်နှံမှုများကို ကြိုဆိုခြင်းအားဖြင့် မြန်မာနိုင်ငံ ဖွံ့ဖြိုးဖို့အတွက် ရင်းနှီးမြှုပ်နှံမှုပုံစံကို ကျွန်မတို့ ပြောင်းလဲသွားမှာ ဖြစ်ပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။
နေပြည်တော်ရှိ MICC-2 ခန်းမတွင် ဖေဖော်ဝါရီ ၂၆ ရက်က ပြုလုပ်သော မြန်မာနိုင်ငံ ဝန်ကြီးဌာနများ၊ အလှူရှင်နိုင်ငံများ၊ အပြည်ပြည်ဆိုင်ရာ မိတ်ဖက်အဖွဲ့အစည်းများနှင့် ကုလသမဂ္ဂ အဖွဲ့အစည်းများ၊ ပြည်တွင်း ပြည်ပ ပုဂ္ဂလိက အဖွဲ့အစည်းများ တက်ရောက် ဆွေးနွေးသည့် မြန်မာနိုင်ငံ၏ ဖွံ့ဖြိုးမှုအကူအညီများ ထိရောက်မှုရှိစေရေး ဆွေးနွေးပွဲ Myanmar Development Effectiveness Roundtable တွင် ယင်းကဲ့သ့ို ပြောကြားခဲ့ခြင်းဖြစ်သည်။
မိမိတို့၏ ဦးစားပေး လုပ်ငန်းများကို ဖွံ့ဖြိုးမှု အကူအညီဆိုင်ရာမူဝါဒ (DAP) တွင် ထည့်သွင်းဖော်ပြထားပြီး ယင်းမူဝါဒကို အခမ်းအနားတွင် တရားဝင် မိတ်ဆက်မည်ဖြစ်ကြောင်း၊ အဆိုပါမူဝါဒသည် မြန်မာနိုင်ငံအတွက် ပထမဆုံး ထုတ်ပြန်သည့် မူဝါဒဖြစ်ပြီး မိမိတို့ပြည် သူလူထုကောင်းကျိုးအတွက် ဖွံ့ဖြိုးမှုအကူအညီတွေကို အကျိုးရှိထိရောက်ပြီး ပွင့်လင်းမြင်သာစွာ အသုံးပြုနိုင်ရေးအတွက် ပြီးပြည့်စုံသည့်မူဝါဒ လမ်းညွှန်ချက်များ၊ လုပ်ထုံးလုပ်နည်းများကို ထည့်သွင်းရေးဆွဲထားကြောင်း နိုင်ငံတော်၏ အတိုင်ပင်ခံပုဂ္ဂိုလ်က ပြောကြားသည်။
“DAP ကို ရေးဆွဲရာမှာ ဒီဖွံ့ဖြိုးမှုအကူအညီကို သင့်လျော်တဲ့ စောင့်ကြည့်စစ်ဆေး အကဲဖြတ်မှုလုပ်ဖို့ လိုအပ်တယ်ဆိုတဲ့ အချက်ကို မချန်လှပ်ခဲ့ဘဲ ထိရောက်တဲ့ လုပ်ထုံးလုပ်နည်းတွေဖြစ်စေဖို့ DACU ကို တောင်းဆိုခဲ့ပါတယ်။ အထူးသဖြင့် သက်ဆိုင်ရာ ဝန်ကြီးဌာနတွေ၊ အစိုးရ အဖွဲ့အစည်းတွေအနေနဲ့ သူတို့ရရှိတဲ့ အကူအညီတွေကို မိမိတို့ပိုင်အဖြစ် ပိုမိုစီမံခန့်ခွဲနိုင်အောင် တာဝန်ပေးလိုတဲ့ ရည်ရွယ်ချက်နဲ့ ဒီ DAP ကို ရေးဆွဲခဲ့တာ ဖြစ်ပါတယ်။ မိမိအနေနဲ့ ဖွံ့ဖြိုးမှုအကူအညီဆိုင်ရာမူဝါဒ ရေးဆွဲထုတ်ပြန်နိုင်ခဲ့တာကို အထူးပင် ကျေနပ်မိပါတယ်။ ဆွေးနွေးပွဲကို တက်ရောက်လာကြတဲ့ ဖွံ့ဖြိုးမှုမိတ်ဖက်များ အနေနဲ့လည်း ထုတ်ပြန်ထားတဲ့ မူဝါဒအတိုင်း လိုက်နာဆောင်ရွက်ကြဖို့ ကျွန်မအနေနဲ့ တိုက်တွန်းလိုပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ်က ပြောကြားသည်။
ဖွံ့ဖြိုးမှု အကူအညီများ ရယူရာတွင် ကောင်းမွန်သေချာသည့် ညှိနှိုင်းမှုရှိရန်နှင့် ပွင့်လင်းမြင်သာမှုရှိရန် ကဏ္ဍအလိုက် ညှိနှိုင်းဆောင်ရွက်မှု အဖွဲ့များသည် မရှိမဖြစ် လိုအပ်ကြောင်း၊ သို့မှသာ ပြည်ထောင်စုဝန်ကြီးများ အနေဖြင့် ၎င်းတို့အခန်းကဏ္ဍတွင် အကောင်းဆုံး ဆောင်ရွက်နိုင်ဖို့ လိုအပ်သည့် သတင်းအချက်အလက်များကို ရရှိကြမည်ဖြစ်ကြောင်း၊ အချို့အဖွဲ့များအနေဖြင့် ကဏ္ဍဆိုင်ရာ စီမံကိန်းများနဲ့ မဟာဗျူဟာများ ရေးဆွဲဆောင်ရွက်နေပြီး အချို့က ဘဏ္ဍာငွေ ကုန်ကျစရိတ်တွေကို ပြုစုဆောင်ရွက်နေသည်ဟုလို့ သိရကြာင်း ၎င်းက ပြောကြားသည်။
“ဒါဟာ အရေးကြီးတဲ့ လုပ်ငန်းပါ။ ဘာလို့လဲဆိုတော့ အောင်အောင်မြင်မြင် လုပ်နိုင်မယ်ဆိုရင် တစ်နှစ်စာ စီမံကိန်းနဲ့ ဘတ်ဂျက်စက်ဝန်းကနေ ကျွန်မတို့ ရုန်းထွက်နိုင်မှာဖြစ်ပြီး ကာလရှည်၊ ကာလလတ်အတွက် မဟာဗျူဟာကျကျ စဉ်းစားပြီး စီမံကိန်း ချမှတ်သွားနိုင်မှာ ဖြစ်ပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ်က ပြောကြားသည်။
အရပ်ဘက် လူမှုအဖွဲ့အစည်းများနှင့် ပုဂ္ဂလိကကဏ္ဍ အဖွဲ့အစည်းများမှ ကိုယ်စားလှယ်များအနေဖြင့် ကဏ္ဍဆိုင်ရာ ပေါင်းစပ်ညှိနှိုင်းရေး အဖွဲ့များတွင် ပါဝင်ဆောင်ရွက် သွားစေလိုကြောင်း၊ လုပ်ငန်းစီမံချက် အစီအစဉ်များကို အကောင်အထည်ဖော်ရာတွင် ၎င်းတို့သည် ရှေ့တန်းမှ ဆောင်ရွက်ရမည် ဖြစ်သည့်အတွက် အရပ်ဘက် လူမှုအဖွဲ့အစည်းများနှင့် ပုဂ္ဂလိကကဏ္ဍ အဖွဲ့အစည်းများ၏ အတွေးအမြင်များ၊ ကျွမ်းကျင်မှုများကိုလည်း ကြိုဆိုတန်ဖိုးထားကြောင်း ၎င်းကပြောကြားသည်။
