ဆက်သွယ်ရေးကဏ္ဍ လျင်မြန်စွာ တိုးတက်ပြောင်းလဲလာသည့် ယခုနှစ်များအတွင်း ကျွနု်ပ်တို့သည် ဆက်သွယ်ရေး အော်ပရေတာများကို လွတ်လပ်စွာ ရွေးချယ် အသုံးပြုလာခဲ့ကြပြီး မိုဘိုင်းဖုန်း အသုံးပြုမှုများသည်လည်း တစ်နေ့ထက်တစ်နေ့ ပိုမို များပြားလာလျက် ရှိသည်။
လတ်တလောတွင် MPT အစရှိသော ဆက်သွယ်ရေး အော်ပရေတာ သုံးခု ရှိနေပြီး ၎င်းတို့က ဆင်းမ်ကတ်များကို ဈေးကွက်အတွင်း ကျယ်ပြန့်စွာ ဖြန့်ချိခဲ့သည့်အတွက် မိုဘိုင်းဖုန်း (လက်ဝယ်ရှိ) အသုံးပြုနိုင်သော နိုင်ငံသားဦးရေမှာ လျင်မြန်စွာ တိုးတက်လာခဲ့ခြင်း ဖြစ်သည်။
တစ်ဆက်တည်းမှာပင် ဆက်သွယ်ရေး အော်ပရေတာများက ဝန်ဆောင်မှုပုံစံ အမျိုးမျိုး၊ နှုန်းထားအမျိုးမျိုး၊ Package အမျိုးမျိုးကို မိတ်ဆက်ပေးလျက် ရှိသည့်အတွက် သုံးစွဲသူများအနေဖြင့် ရွေးချယ်စရာ များပြားလာသော်လည်း ပြောင်းလဲနေသော ဝန်ဆောင်မှုနှင့် ဈေးနှုန်းများကြောင့် ၎င်းတို့နှင့် သင့်လျော်သည့် ဝန်ဆောင်မှု အမျိုးအစားကိုပင် မရွေးချယ်နိုင်အောင် ဖြစ်နေတတ်သည်။
အခြေခံအကျဆုံးဖြစ်သည့် “တစ်မိနစ် ဖုန်းပြောလျှင် ဖုန်းပြောဆိုခ ဘယ်လောက်ကျသင့်ပါသလဲ” ဟူသည့် မေးခွန်းကိုပင်လျှင် သုံးစွဲသူများ တိကျစွာ အဖြေပေးနိုင်မည် မဟုတ်ပါ။ အဘယ်ကြောင့်ဆိုသော် မိမိအသုံးပြုသော အစီအစဉ်နှင့် မိမိခေါ်ဆိုမှု အများဆုံး အော်ပရေတာအပေါ် မူတည်ကာ အချက်အလက်များစွာကို စဉ်းစားရသောကြောင့် ဖြစ်သည်။
ဆက်သွယ်ရေး အော်ပရေတာအချို့ အနေဖြင့် အစီအစဉ်အချို့ကို ရပ်နားမှုများ ရှိခဲ့ပြီးနောက် အော်ပရေတာတစ်ခု၏ အခြေခံနှုန်းထားမှာ တစ်မိနစ် ၂၇ ကျပ်နှင့် အင်တာနက် အသုံးပြုခမှာ 1 MB လျှင် ၈ ကျပ်ကျသင့်သည်။ အခြားအော်ပရေတာ တစ်ခုမှာ တစ်မိနစ်လျှင် ၂၃ ကျပ်နှင့် အင်တာနက်အသုံးပြုခမှာ 1 MB လျှင် ၆ ကျပ် ကျသင့်လျက် ရှိသည်။
MPT ကလည်း ၎င်း၏ Unlimited Voice Package ကို ၆၅ မိနစ် Voice Package အဖြစ် ပြင်ဆင်လိုက်သော်လည်း အခြားဖုန်းအသုံးပြုခ ဈေးနှုန်းများကို ပြင်ဆင်ခြင်း မရှိသည့်အတွက် MPT ဖုန်းအချင်းချင်း ခေါ်ဆိုပါက တစ်မိနစ်လျှင် ၁၅ ကျပ်၊ အခြားအော်ပရေတာများသို့
ဖုန်းခေါ်ဆိုတိုင်း တစ်မိနစ်လျှင် ၂၅ ကျပ်နှင့် အင်တာနက် အသုံးပြုခ 1 MB လျှင် ၈ ကျပ် (ရှယ်ပြောအစီအစဉ်) သို့မဟုတ် 1 MB လျှင် ၆ ကျပ် (ဆွေသဟာ အစီအစဉ်) စသော ရွေးချယ်စရာ အစီအစဉ်နှစ်ခုဖြင့် ဆက်လက် ဦးဆောင်လျက် ရှိသည်။
အော်ပရေတာအလိုက် ဖုန်းခေါ်ဆိုခ နှုန်းထားများကို mobilecharges.compare.com.mm တွင် ဝင်ရောက်တွက်ချက် လေ့လာကြည့်ရှုနိုင်သည်။
သုံးစွဲသူ ၂၅ သန်းကျော် ရှိနေသည့် MPT ၏ ရှယ်ပြော အစီအစဉ်သည် တစ်မိနစ်လျှင် ၁၅ ကျပ်ဖြင့် ၂၅ သန်းသော သုံးစွဲသူများနှင့် အချိန်တိုင်း ဆက်သွယ်နိုင်ခြင်းကြောင့် လက်ရှိတွင် အော်ပရေတာများအနက် ဖုန်းပြောဆိုခ အသက်သာဆုံး အစီအစဉ်တစ်ခု ဖြစ်သည်။
အင်တာနက် အသုံးပြုသူများအကြားတွင်လည်း Facebook ၊ Viber ၊ Line ၊ COC ၊ Clash Royale တို့ကို 1MB လျှင် တစ်ကျပ်ဖြင့် အသုံးပြုနိုင်သည့် MPT ၏ Social package မှာ အထူးရေပန်းစားလျက် ရှိသည်။
အော်ပရေတာများက အခမဲ့ အစီအစဉ်များကို ရပ်နားခြင်း၊ သုံးစွဲခနှုန်းထားများကို ပြင်ဆင်တိုးမြှင့် သတ်မှတ်ခြင်းတို့ကို သုံးစွဲသူများအနေဖြင့် အပြည့်အ၀ သဘောပေါက် နားလည်ခြင်း မရှိသည့်အတွက် ဖုန်းပြောဆိုခ၊ အင်တာနက် အသုံးပြုခများမှာ ပုံမှန်ထက် ပိုမိုကုန်ကျနေသည်ဟု ခံစားရလျက် ရှိသည်။
ထို့ကြောင့် သုံးစွဲသူများသည် မိမိတို့ လက်ရှိ အသုံးပြုလျက်ရှိသော အော်ပရေတာများ၏ သတ်မှတ်နှုန်းထားများကို သေချာစွာ စိစစ်ကြည့်သင့်ပြီး မိမိ၏ သုံးစွဲမှုပုံစံနှင့် အသင့်လျော်ဆုံး ဝန်ဆောင်မှုပုံစံကို ရယူအသုံးပြုကြရန် အကြံပြုလိုက်ရပါသည်။
