ဥရောပနိုင်ငံ ကိုးနိုင်ငံနှင့် ယူကရိန်းနိုင်ငံတို့သည် ပဲ့ထိန်းဒုံးကျည်ဆန့်ကျင်ရေး ညွန့်ပေါင်းအဖွဲ့ ဖွဲ့စည်းလိုက်ကြောင်း ဇူလိုင် ၁၃ ရက်က ကြေညာခဲ့သည်။

ပဲ့ထိန်းဒုံးကျည်များ၏ ခြိမ်းခြောက်မှုအန္တရာယ် ပိုမိုကြီးမားလာသည်ကို ထောက်ပြပြီး ဥရောပတွင် စစ်မှန်သော ခုခံကာကွယ်ရေးအတွက် ပဲ့ထိန်းဒုံးကျည်ဆန့်ကျင်ရေး စွမ်းဆောင်ရည်များ ဖွံ့ဖြိုးတိုးတက်လာစေရန် ယခုကဲ့သို့ မဟာမိတ်အဖွဲ့ဖွဲ့စည်းခြင်းဖြစ်ကြောင်း ကြေညာချက်တွင် ဖော်ပြထားသည်။

ယူကရိန်းနိုင်ငံအပေါ် ကူညီထောက်ပံ့မှုများကို ထပ်လောင်းအတည်ပြုရန်နှင့် ယခုအခါ ငါးနှစ်ထဲသို့ ဝင်ရောက်လာပြီဖြစ်သော စစ်ပွဲကို အဆုံးသတ်ရန် ရုရှားအပေါ် ဖိအားပေးမှုများ မြှင့်တင်ရန်အတွက် ယူကရိန်း၏ မဟာမိတ်များအစည်းအဝေးသို့ တက်ရောက်ရန် ယူကရိန်းသမ္မတ ဗိုလိုဒီမာဇယ်လန်းစကီးသည် ဇူလိုင် ၁၃ ရက်က ပါရီမြို့သို့ ရောက်ရှိခဲ့သည်။

“ဥရောပကို ကာကွယ်စောင့်ရှောက်ဖို့ဆိုရင် နောင်လာမယ့် ဒုံးကျည်ခြိမ်းခြောက်မှုတွေကို ဟန့်တားအနိုင်ယူနိုင်မယ့် ဘက်ပေါင်းစုံပေါင်းစည်းထားတဲ့ ကမ္ဘာလုံးဆိုင်ရာ ကာကွယ်ရေးယန္တရားတစ်ခု လိုအပ်တယ်လို့ ကျွန်တော်တို့ ယုံကြည်ပါတယ်” ဟု ဒိန်းမတ်၊ ပြင်သစ်၊ ဂျာမနီ၊ အီတလီ၊ နယ်သာလန်၊ နော်ဝေး၊ စပိန်၊ ဆွီဒင်၊ ယူကရိန်းနှင့် ဗြိတိန်နိုင်ငံတို့၏ ပူးတွဲကြေညာချက်တွင် ဖော်ပြထားသည်။

“ကျွန်တော်တို့ရဲ့ ကာကွယ်ရေးစက်မှု အခြေခံ၊ သုတေသနလုပ်ငန်းတွေနဲ့ လက်တွေ့စစ်ဆင်ရေး အတွေ့အကြုံတွေကို ပေါင်းစပ်ပြီး ဥရောပအတွက် ဘုံပဲ့ထိန်းဒုံးကျည် ဆန့်ကျင်ရေး စွမ်းဆောင်ရည်တစ်ခု တည်ဆောက်ဖို့ ရည်ရွယ်ပါတယ်” ဟု ထုတ်ပြန်ချက်တွင် ရေးသားထားသည်။

ထို့ပြင် ပြီးခဲ့သည့် သီတင်းပတ်များအတွင်း ရုရှား၏ ပဲ့ထိန်းဒုံးကျည်များဖြင့် အကြိမ်ကြိမ် တိုက်ခိုက်ခြင်းခံခဲ့ရသည့် ယူကရိန်း၏ အတွေ့အကြုံကို ကိုးကားပြီး မိမိတို့၏ ညွန့်ပေါင်းအဖွဲ့သည် မည်သည့်ပြည်သူ တစ်ဦးတစ်ယောက်ကိုမဆို ဆန့်ကျင်ရန် ဖွဲ့စည်းခြင်းမဟုတ်ဘဲ မိမိတို့၏ ပြည်သူများကို ကာကွယ်ရန်သာ ဖွဲ့စည်းခြင်းဖြစ်ကြောင်းလည်း ထပ်လောင်းဖော်ပြထားသည်။

ပါရီအစည်းအဝေးသို့ အနည်းဆုံး နိုင်ငံ့အကြီးအကဲ ၂၅ ဦး တက်ရောက်မည်ပြီး အချို့မှာ ယူကရိန်းအပေါ် ထောက်ခံမှုကို အထူးပြုထုတ်ဖော်ပြသမည့် ဇူလိုင် ၁၄ ရက်တွင် ကျင်းပမည့် ပြင်သစ်နိုင်ငံ၏ အမျိုးသားနေ့ စစ်ရေးပြအခမ်းအနားအထိ ပါရီတွင် ဆက်ရှိနေမည်ဖြစ်သည်။           

Ref;AFP