သီရိလင်္ကာနိုင်ငံ မြို့တော်ကိုလံဘိုအနီးရှိ အကျဉ်းထောင်တစ်ခုအတွင်း ဆူပူအုံကြွမှုဖြစ်ပွားခဲ့ရာ အနည်းဆုံး လူ ၂၅ ဦးသေဆုံးပြီး ၁၀၀ ကျော် ထိခိုက်ဒဏ်ရာရရှိခဲ့ကြောင်း ပြည်တွင်းရုပ်သံ သတင်းဌာနတစ်ခုက ဇူလိုင် ၆ ရက်တွင် ထုတ်ပြန်ခဲ့သည်။
ကိုလံဘိုမြို့တော်၏ မြောက်ဘက် ၂၂ မိုင်အကွာ နီဂွန်ဘိုမြို့ရှိ အကျဉ်းထောင်တွင် ဇူလိုင် ၅ ရက်မှစတင်ကာ ဆူပူမှုဖြစ်ပွားခဲ့ပြီး နောက်တစ်နေ့အထိ ဆက်လက်ဖြစ်ပွားခဲ့ကြောင်း ရဲတပ်ဖွဲ့က ပြောသည်။
ထိခိုက်သေဆုံးသူများတွင် အကျဉ်းသားများအပြင် အကျဉ်းထောင်ဝန်ထမ်းများလည်း ပါဝင်နေကြောင်း Hiru ဒေသတွင်းရုပ်သံဌာနက ဖော်ပြခဲ့သည်။
အကျဉ်းထောင် ပြောရေးဆိုခွင့်ရှိသူက “အကျဉ်းသားတွေအချင်းချင်း ရန်ဖြစ်ကြတာကို အကျဉ်းထောင်ဝန်ထမ်းတွေက ဝင်ရောက်ထိန်းသိမ်းဖို့ ကြိုးစားခဲ့ပါတယ်။ အဲဒီမှာ အကျဉ်းသားတွေက ဝန်ထမ်းတွေကို ပါ တိုက်ခိုက်ခဲ့ကြတာ” ဟု သတင်းထောက်များကိုပြောသည်။
ထို့ပြင် အကျဉ်းသားအချို့က ထောင်မှထွက်ပြေးရန် ကြိုးပမ်းခဲ့မှုများလည်းရှိပြီး အချိန်မီတားဆီးနိုင်ခဲ့ကြောင်း ၎င်းက ဖြည့်စွက်ပြောသည်။
ယင်းဒေသရှိ ဆေးရုံမှတာဝန်ရှိသူတစ်ဦးက အကျဉ်းထောင်ဖြစ်ရပ်ကြောင့် ထိခိုက်ဒဏ်ရာရသူ ၁၀၀ ကျော်ကို ဆေးရုံတင်ထားရကြောင်း အတည်ပြုပြောကြားသည်။
သီရိလင်္ကာနိုင်ငံ၏ အကျဉ်းထောင်စနစ်တစ်ခုလုံးတွင် အကျဉ်းသား ၁၀၀၀၀ ခန့်သာ ထားနိုင်သော်လည်း လက်ရှိတွင် အကျဉ်းသား ၃၉၀၀၀ ကျော်ကို ပြွတ်သိပ်ထိန်းသိမ်းထားသည့်အတွက် အကျဉ်းထောင်များတွင် အလွန်လူပြည့်ကျပ်နေသည်။
